1 LIKHOSI 10

₁Ha mofumahali oa Sheba a utloa kamoo Morena a tumisitseng Solomone kateng, a mo etela, ho ea mo nonya maikutlo ka lipotso tse thata. ₂A ea Jerusalema a e-na le phiphitha ea balateli; ho e-na le likamele tse belesitsoeng linōko, le khauta e ngata, le mahakoe a bohlokoa. Ha a fihla ho Solomone a 'motsa lipotso tsohle tseo a neng a e-na le tsona. ₃Solomone a araba lipotso tsohle tsa hae; ha se ke ha e-ba le letho le thatafallang khosi, leo e sitoang ho le hlalosa. ₄Ha mofumahali oa Sheba a se a bone bohlale bohle ba Solomone, a bone le ntlo eo khosi e e hahileng, ₅le lijo tseo a li jang, le moo matona a hae a lulang teng, le moo basebeletsi ba hae ba emang teng, le liaparo tsa bona, le baqhatsetsi ba hae, le linyehelo tsa secheso ka Tempeleng ea Morena, a khathala matla.

₆Eaba mofumahali o re ho khosi: “Ruri seo ke ileng ka se utloa ha ke le naheng ea ka, malebana le liketso tsa hao, le bohlale ba hao, ke 'nete! ₇Ke ne ke sa kholoe ho fihlela ke e-tla mona, ke ipontša ka mahlo a ka, empa ruri ba mpoleletse linyane feela: Bohlale ba hao, le katleho ea hao li feta botumo boo ke bo boleletsoeng. ₈Batho ba hao baa ithaba; bahlanka bana ba hao, ba u sebeletsang kamehla, ba utloang bohlale ba hao, le bona baa ithaba. ₉Ho bokoe Morena Molimo oa hao, ea khahliloeng ke uena, 'me a u bea hore u be khosi ea Iseraele! Kahobane Morena o rata Baiseraele kamehla eohle, o u entse khosi ea bona, hore u ahlōle hantle, ka toka.”

₁₀Eaba o nea khosi khauta eo boima ba eona bo fetang likilo tse likete tse 'ne, le linōko tse ngata, le mahakoe a bohlokoa. Ha hoa ka ha hlola ho tlisoa linōko tse ngata ho feta tsena tseo mofumahali oa Sheba a ileng a li fa khosi Solomone.

₁₁Le likepe tsa Hirame, tse neng li ile tsa tlisa khauta e tsoang Ofire, tsa tlisa le thepa e ngata ea lifate tsa alemaka, le mahakoe a bohlokoa. ₁₂Ka lifate tsena tsa alemaka khosi ea etsa mehato e nyolohelang ka Tempeleng ea Morena, le ka tlung ea khosi; ea etsa le liharepa le likatara tsa libini. Ha hoa ka ha hlola ho tlisoa lifate tsa alemaka tse kang tsena; le ho bonoa ha li e-s'o bonoe ho fihlela kajeno-ea-bokajeno.

₁₃Khosi Solomone a fa mofumahali oa Sheba tsohle tseo a neng a li lakatsa, le tsohle tseo a ileng a li kōpa, kantle ho limpho tseo khosi e mo fileng tsona ka ho rata. Eaba mofumahali oa Sheba o khutlela naheng ea hae, a e-na le bahlanka ba hae.

₁₄Ka selemo se seng le se seng khosi Solomone o ne a fumana khauta e ka etsang boima ba likilo tse likete tse mashome a mabeli a metso e meraro, ₁₅ntle ho eo a neng a e fumana ka lekhetho le lefisoang bahoebi, le ka lithèlo tse neng li e-tsoa ho likhosi tsa Arabia, le babusi ba litereke tsa Iseraele.

₁₆Khosi Solomone a etsa lithèbè tse makholo a mabeli ka khauta e thutsoeng, 'me thèbè e 'ngoe le e 'ngoe ea etsoa ka khauta e etsang boima ba likilo tse supileng. ₁₇A boela a etsa lithejana tse makholo a mararo ka khauta e thusoeng, 'me thejana e 'ngoe le e 'ngoe ea etsoa ka khauta e etsang boima ba likilo tse peli. Eaba khosi e li bea ka tlung e bitsoang Moru oa Lebanone.

₁₈Hape khosi ea etsa terone e kholo, e entsoeng ka manaka a tlou, 'me ea a maneha khauta e hloekisitsoeng. ₁₉Terone ena e ne e e-na le mehato e tšeletseng, bokaholimo ba terone bo le bochitja kamorao, ho e-na le letsoho la ho itšetleha ka lehlakoreng le leng le le leng la setulo, 'me pel'a matsoho ao ho eme litau tse peli. ₂₀Ka lehlakoreng le leng le le leng la mohato o mong le o mong oa mehato ena e tšeletseng ho ne ho eme tau, kaofela e le litau tse leshome le metso e 'meli. Ho ne ho e-s'o be 'muso le o mong o kileng oa e-ba le terone e tjena.

₂₁Linoelo tsohle tsa khosi Solomone li ne li entsoe ka khauta; le thepa eohle ea ntlo ea Moru oa Lebanone e ne entsoe ka khauta e hloekisitsoeng. Ho ne ho se tse entsoeng ka silefera, hobane mehleng ea Solomone silefera e ne e sa talingoe e le letho. ₂₂Leoatleng khosi e ne e-na le likepe tsa Tarashishe, tse neng li e-na le tsa Hirame. Hanngoe kamora' lilemo tse tharo, sehlopha sa likepe tsena tsa Tarashishe se ne se ee se tle, se tlise khauta, le silefera, le manaka a litlou, le likhabō, le lipikoko.

₂₃Ka mokhoa ona, khosi Solomone a feta likhosi tsohle tsa lefatše ka matlotlo le ka bohlale, ₂₄'me batho ba lefatše lohle ba tla ho eena, ho tla utloa bohlale boo Molimo a mo fileng bona. ₂₅Motho ka mong o ne a mo tlisetsa mpho ea hae: lintho tse entsoeng ka silefera le ka khauta, le liaparo, le lihlomo, le linōko, le lipere, le limmeile. Hona ho ne ho etsahala ka selemo le selemo.

₂₆Solomone a bōkella likariki tsa ntoa, le bahlabani ba palamang. O ne a e-na le likariki tsa ntoa tse sekete le makholo a mane, le bahlabani ba palamang ba likete tse leshome le metso e 'meli. A ba bea metseng ea likariki tsa ntoa le Jerusalema, ho khosi. ₂₇Khosi ea etsa hore motseng oa Jerusalema silefera e be ngata joaloka majoe, le lifate tsa likedare li be ngata joaloka lifate tsa monokotšoai tse phuleng. ₂₈Bahoebi ba khosi Solomone ba ne ba mo rekela lipere Egepeta le Kue. ₂₉Kariki ea ntoa e ne e rekoa Egepeta ka silefera e ka etsang boima ba likilo tse supileng, pere eona e le kilo le halofo. Bahoebi ba ne ba li rekisetsa likhosi tsa Bahete le likhosi tsa Baarame.