Molimo o iponahatsa ho Solomone hape
1Ha Solomone a se a qetile ho haha ntlo ea Morena, le ntlo ea khosi, le tsohle tseo a neng a rata ho li etsa, 2Morena a iponahatsa ho Solomone khetlo la bobeli, joalokaha a ne a iponahatse ho eena ha a le Gibeone.
3Morena a re ho Solomone: “Ke utloile thapelo ea hao le kōpo ea hao, tseo u li entseng ho 'na. Ke halalelitse ntlo ena, eo u e hahileng hore e be ea ka kamehla eohle. Ke tla e lebela, ke e boulele kamehla eohle.
4“Haeba le uena u ka ntšebeletsa ka botšepehi le ka ho loka joaloka Davida, ntat'ao, ua etsa tsohle tseo ke u laetseng tsona, 'me ua bōlōka litaelo tsa ka le likahlōlo tsa ka, 5ke tla tiisa bokhosi ba hao naheng ea Iseraele kamehla eohle, joalokaha ke ne ke tšepise Davida, ntat'ao, ka re: ‘Bokhosi ba hao bo ke ke ba hloka mohlahlami.’
6“Empa haeba uena, kapa bana ba hao, u ka nkoenehela, ua khaotsa ho ntšebeletsa, 'me ua se ke ua bōlōka melao ea ka le litaelo tsa ka, tseo ke u laetseng tsona, eaba u sebeletsa melimo e meng, ua e khumamela, 7ke tla falatsa Baiseraele naheng eo ke ba neileng eona. Ntlo ena, eo ke e halalelitseng ho tlōtla lebitso la ka, ke tla e furalla, 'me Baiseraele e tla ba sesomo le pale har'a lichaba tsohle. 8Ntlo ena, leha e phahame hakana, e tla fetoha lesupi. Bohle ba fetang pel'a eona ba tla khōtsa, ba nyekethōlōtse, ba re: ‘Ke ka lebaka la'ng Morena a entseng naha ee tjee, le ntlo ee tjee?’ 9Ba tla be ba ikarabe, ba re: ‘Ke kahobane Baiseraele ba furaletse Morena Molimo oa bona, ea ileng a ntša bo-ntat'a bona naheng ea Egepeta. Joale ba khomaretse melimo e meng, baa e khumamela, baa e sebeletsa, 'me ka baka lena Morena o ba tliselitse bobe bona bohle.’ ”
Tumellano ea Solomone le Hirame
10Ha ho se ho fetile lilemo tse mashome a mabeli, tseo ka tsona Solomone a neng a ntse a haha matlo ana a mabeli, e leng ntlo ea Morena, le ntlo ea khosi, 11khosi Solomone a nea Hirame, khosi ea Tire, metse e mashome a mabeli naheng ea Galelea; hobane Hirame ke eena ea neng a thuse Solomone ka lifate tsa likedare, le ka lifate tsa molutu, le ka khauta, ho ea kamoo Solomone a neng a lakatsa kateng. 12Hirame a tloha Tire, a ea bona metse eo Solomone a mo neileng eona, empa ea se ke ea mo khotsofatsa. 13Joale Hirame a re: “Ngoan'eso, ke metse meng ee, eo u 'neileng eona?” Eaba o e bitsa Kabule, 'me le kajeno-ea-bokajeno e ntse e bitsoa joalo. 14Hirame o ne a ile a rōmela khosi Solomone khauta e boima bo feta-fetang likilo tse likete tse 'ne.
Mesebetsi e meng ea Solomone
15Khosi Solomone o ne a ile a sebelisa makhoba hore a hahe ntlo ea Morena, le ntlo ea hae, le Milo, le lerako la Jerusalema, le Hasore, le Megido, le Gesere. 16Faro, khosi ea Egepeta, o ne a ile a nyoloha, a hapa Gesere, a e chesa ka mollo, a bolaea Bakanana ba neng ba ahile motseng oo; eaba o phahlela morali oa hae, mosali oa Solomone, ka motse oo. 17Solomone a tsosa marako a Gesere, a haha le Bete-Horone e tlase, 18le Baalate, le Tamare e lehoatateng la Juda, 19le metse eohle ea Solomone, e nang le lisiu, le metse eo ho bōlōkoang likariki tsa ntoa ho eona, le metse ea bahlabani ba palamang, le tsohle tseo Solomone a neng a lakatsa ho li etsa Jerusalema, le Lebanone, le naheng eohle eo a neng a e busa.
20Masalla 'ohle a sechaba sa Baamore, le Bahete, le Baperise, le Bahife, le Bajebuse, ao e neng e se bana ba Iseraele, 21le bana ba bona ba ileng ba sala naheng eo, bao bana ba Iseraele ba ileng ba sitoa ho ba timetsa ho hang, Solomone o ile a ba fetola makhoba ho fihlela kajeno-ea-bokajeno. 22Empa Solomone ha aa ka a fetola bana ba Iseraele makhoba. Bona e ne e le bahlabani ba hae, le bahlanka ba hae, le mahosana a hae, le baokameli ba mabōtho a hae, le balaoli ba likariki tsa hae tsa ntoa, le bahlabani ba palamang.
23Baokameli ba neng ba okamela balisa ba makhoba a neng a etsa mesebetsi ea Solomone, ba ne ba le makholo a mahlano le mashome a mahlano.
24Hoba morali oa Faro a falle Motseng oa Davida, a ee tlung ea hae, eo Solomone a neng a mo hahetse eona, eaba Solomone a haha Milo.
25Hararo ka selemo Solomone o ne a ee a etse nyehelo ea secheso, le nyehelo ea teboho, a li etsetse holim'a aletare eo a neng a e hahetse Morena, 'me a chesetse le mokubetso holim'a aletare eona eo ea Morena. Eaba o qeta ho haha ntlo.
26Khosi Solomone a haha le lebōtho la likepe Esione-Gebere, pel'a Elate, lebōpong la Leoatle la Lehlaka, naheng eo Edomo. 27Hirame a rōmela bahlanka ba hae ba tsebang ho sesisa likepe ho ea sebetsa le bahlanka ba Solomone. 28Ba ea naheng ea Ofire ka likepe, ho ea lata khauta teng. Ba tlisetsa khosi Solomone khauta e boima ba likilo tse feta-fetang likete tse leshome le metso e mene.
