Solomone o furalla Molimo
1Khosi Solomone o ne a rata basali ba bangata ba balichaba. Kantle ho morali oa Faro, o ne a nyetse basali ba Moabe, le ba Baamone, le ba Baedomo, le ba Basidone, le ba Bahete. 2A ba nyala le hoja Morena a ne a itse ho bana ba Iseraele: “Le se ke la nyallana le bona, hobane ruri ba tla le khelosetsa ho melimo ea bona.” Empa Solomone a ba rata haholo. 3O ne a e-na le basali ba makholo a supileng, bao e neng e le likhosatsana, a e-na le basali ba mafielo ba makholo a mararo. Basali bana ba hae ba mo khelosa.
4Ha Solomone a se a tsofetse, basali bana ba hae ba mo khelosa hore a sebeletse melimo e meng. Pelo ea hae ea se ke ea hlola e tšepahala ka ho tlala ho Morena Molimo oa hae, joalokaha pelo ea Davida, ntat'ae, eona e ne e tšepahala. 5Solomone a khumamela Asetarote, molimo oa Basidone, le Milekome, e leng manyala a Baamone. 6Solomone a etsa bobe mahlong a Morena, a se ke a hlola a latela Morena ka ho tlala, joalokaha Davida, ntat'ae, a ne a ile a latela Morena.
7Holim'a leralla le ka bochabela ho Jerusalema, Solomone a hahela Kemoshe, e leng manyala a Moabe, le Milekome, e leng manyala a Baamone, aletare ea mahlabelo. 8Le basali ba hae, ba balichaba, a ba etsetsa joalo, 'me ba chesa mokubetso, ba nyehella melimo ea bona ka mahlabelo.
9Morena a halefela Solomone, hobane pelo ea hae e ne e furaletse Morena Molimo oa Iseraele, ea neng a ile a itlhahisa ho eena ka makhetlo a mabeli, 10'me a mo laela hore a se ke a latela melimo e meng, empa Solomone a se ke a phetha seo Morena a mo laetseng sona. 11Ka baka leo, Morena a re ho Solomone: “Kaha u entse hona, 'me u sa bōlōka selekane sa ka, le litaelo tseo ke u laetseng tsona, ruri ke tla u amoha 'muso, ke o nee mohlanka oa hao. 12Feela ka baka la Davida, ntat'ao, nke ke ka etsa ntho ena ha u ntse u phela, empa ke tla e etsa ha ho busa mora oa hao. 13Leha ho le joalo, ha ke na ho amoha mora oa hao 'muso oohle. Ka baka la mohlanka oa ka Davida, le ka baka la Jerusalema eo ke ikhethetseng eona, ke tla siela mora oa hao morabe o le mong.”
Lira tsa Solomone
14Morena a hlahisetsa Solomone sera se mo loantšang, e leng Hadade oa Moedomo, oa lelapa la khosi ea Edomo. 15Hoba Davida a hlōle Baedomo, Joabe, molaoli oa lebōtho, a nyoloha ho ea epela babolauoa. Joabe o ne a ile a bolaea banna bohle ba ahileng Edomo, 16'me a qeta khoeli tse tšeletseng a le moo le Baiseraele bohle, ho fihlela a fietse banna bohle ba Edomo. 17Empa Hadade le Baedomo ba bang, bao e neng e le bahlanka ba ntat'ae, ba balehela Egepeta. Hadade e ne e sa le moshanyana. 18Ba tloha Midiane, 'me ha ba fihla Parane, ba nka banna ba Parane ba ea le bona Egepeta, ho Faro, khosi ea Egepeta. Khosi ea Egepeta ea nea Hadade ntlo, ea mo fepa, ea mo abela naha.
19Faro o ne a rata Hadade haholo, hoo a bileng a mo nea moena oa mosali oa hae, e leng ngoan'abo mofumahali Tahepenese. 20Ngoan'eo oabo Tahepenese a tsoalla Hadade mora ea bitsoang Genubate. Ha ngoana eo a e-khoa, Tahepenese a mo hōlisetsa tlung ea Faro, 'me Genubate a ba lapeng la Faro, har'a bana ba Faro.
21Eare ha Hadade a tsebisoa hore Davida o orohetse ho bo-ntat'ae, le hore Joabe, molaoli oa mabōtho, o shoele, a re ho Faro: “Ntumelle ke tsamaee, ke khutlele naheng ea heso.”
22Faro a re ho eena: “Ke eng eo u e hlokang, ha e le moo u batla ho khutlela naheng ea heno?”
Hadade a mo araba, a re: “Le letho! Feela, leha ho le joalo, ntumelle ke tsamaee.”
23Molimo a boela a hlahisetsa Solomone sera se seng, e leng Resone, mora oa Eleada, ea neng a balehe mong'a hae Hadade-Esere, khosi ea Soba. 24E ne e ile eare ha Davida ahlōla Hadade-Esere, Resone a bōkella banna, 'me ea e-ba eena molaoli oa sehlopha sena. Bo-Resone ba ikela Damaseka, ba aha teng, 'me Resone ea e-ba khosi ea Damaseka. 25Resone ea e-ba sera sa Solomone ka nako eohle ea bophelo ba Solomone, 'me a eketsa likhathatso holim'a tse bakiloeng ke Hadade. Eena Resone eo, ea neng a nyonya Baiseraele, ea e-ba khosi ea Arame.
Tšepiso ea Molimo ho Jeroboame
26Jeroboame, mora oa Nebate, Moefraime oa Sereda, mohlanka oa Solomone, le eena a fetohela khosi Solomone. Lebitso la 'm'ae e ne e le Serua, mosali oa mohlolohali.
27Sesosa se neng se etse hore Jeroboame a fetohele khosi ke sena: Solomone o ne a ntse a haha lerako la Milo, a thiba likheo lerakong la Motse oa Davida, ntat'ae. 28Jeroboame e ne e le monna ea matla. Ha Solomone a bona hore mohlankana enoa o mafōlōfōlō, a 'mea hore e be mookameli oa makhoba 'ohle a sebetsang seterekeng sa morabe oa Josefa.
29Ka tsatsi le leng ha Jeroboame a e-tsoa Jerusalema, a khahlana le moporofeta Ahiea, oa Shilo. Ahiea o ne a apere seaparo se secha, 'me e le bona ba babeli feela naheng moo. 30Ahiea a hlōbōla seaparo se secha, seo a neng a se apere, a se nka, a se tabola litsekana tse leshome le metso e 'meli. 31Eaba o re ho Jeroboame: “Nka litsekana tse leshome, hobane Morena Molimo oa Iseraele, o re: ‘Ke tla amoha Solomone 'muso, ebe uena ke u nea merabe e leshome. 32Empa eena o tla salloa ke morabe o le mong feela, ka baka la mohlanka oa ka Davida, le ka baka la Jerusalema, e leng motse oo ke ikhethetseng oona har'a merabe eohle ea Iseraele. 33Ke kahobane Solomone o mphuraletse. O khumametse Asetarote, molimo oa Basidone, le Kemoshe, molimo oa Bamoabe, le Milekome, molimo oa Baamone. Ha a ea tsamaea ka litsela tsa ka, ha a ea etsa ho lokileng mahlong a ka, 'me ha a ea bōlōka litaelo tsa ka le likahlōlo tsa ka, joalokaha Davida, ntat'ae, eena a ile a li bōlōka.
34“ ‘Leha ho le joalo, ha ke na ho mo amoha 'muso oohle, empa ke tla o etsa khosana ka matsatsi 'ohle a ho phela ha hae, ka baka la Davida, mohlanka oa ka, eo ke ileng ka mo khetha, hobane a ile a bōlōka melao ea ka le litaelo tsa ka. 35Empa ke tla amoha mora oa hae 'muso, ebe uena ke u nea merabe e leshome. 36Mora oa hae eena ke tla mo nea morabe o le mong, e le hore Davida, mohlanka oa ka, a 'ne a buse kamehla motseng oa Jerusalema, e leng motse oo ke o khethetseng hore ke be ho oona. 37Ke tla u nka, 'me u buse kahohle kamoo u lakatsang kateng, u be khosi ea Iseraele. 38Haeba u ka mamela tsohle tseo ke u laelang tsona, ua tsamaea ka litsela tsa ka, ua etsa ho lokileng mahlong a ka, ka ho bōlōka litaelo tsa ka le melao ea ka, joalokaha Davida, mohlanka oa ka, a ile a etsa, ke tla ba le uena. Ke tla tisa lelapa la hao, joalokaha ke ile ka tiisa la Davida, 'me ke u nee sechaba sa Iseraele. 39Ka hona ke tla hlōkōfatsa litlōhōlō tsa Davida, empa e seng kamehla eohle.’ ”
40Ka lebaka lena Solomone a batla ho bolaea Jeroboame, empa Jeroboame a balehela Egepeta, ho Shishake, khosi ea Egepeta. A lula Egepeta ho fihlela Solomone a e-shoa.
Lefu la Solomone
41Liketso tse ling tsa Solomone, le tsohle tseo a li entseng, le bohlale ba hae, li ngotsoe Bukeng ea Liketso tsa Solomone. 42Solomone a busa Iseraele eohle, a le Jerusalema, ka lilemo tse mashome a mane. 43Solomone a shoa, a epeloa Motseng oa Davida, ntat'ae, moo ho epetsoeng bo-ntat'ae, 'me Rehoboame, mora oa hae, a mo hlahlama.
