Davida le Mefiboshete
1Davida a botsa, a re: “Na ho sa na le e mong ea setseng oa ntlo ea Saule, eo nka mo etsetsang molemo ka baka la Jonathane?”
2Ho ne ho e-na le mohlanka oa lelapa la Saule, ea neng a bitsoa Siba. Ha a se a bitselitsoe ho Davida, khosi ea re ho eena: “Na ke uena Siba?”
Eena a re: “Ke 'na mohlanka oa hao, Siba.”
3Khosi ea re: “Na ho sa na le e mong oa lelapa la Saule, eo nka 'montšang lerato la Molimo?”
Siba a re ho khosi: “Jonathane o ntse a e-na le mora, feela o holofetse maoto.”
4Khosi ea re ho eena: “O kae?”
Siba a re ho khosi: “O Lo-Dabare, lapeng la Makiri, mora oa Amiele.”
5Eaba khosi Davida o rōma maqōsa Lo-Dabare ho ea lata Mefiboshete, lapeng la Makiri, mora oa Amiele.
6Ha Mefiboshete, mora oa Jonathane, setlōhōlō sa Saule, a fihla ho Davida, a itihela fatše ka sefahleho, a isa hlompho.
Davida a re: “Mefiboshete!”
Eena a araba, a re: “Ke 'na eona, mohlanka oa hao!”
7Davida a re ho eena: “U se ke ua tšaba, hobane ruri ke tla u etsetsa molemo ka baka la ntat'ao Jonathane. Ke tla u buseletsa naha eohle ea ntat'ao-moholo Saule, 'me ke tla u fepa kamehla.”
8Mefiboshete a obama, a re: “Ebe 'na, mohlanka oa hao, ke eng, hoo u ka tsotellang ntja e shoeleng, e kang 'na tjee?”
9Joale khosi ea bitsa Siba, mohlanka oa Saule, ea re ho eena: “Tsohle tseo e neng e le tsa Saule le tsa lelapa lohle la hae, ke li neile mora oa mong'a hao. 10Ka baka leo, uena le bara ba hao, le bahlanka ba hao, le tla mo lemèla, le be le mo kotulele, e le hore mora oa mong'a hao a tle a be le lijo. Empa Mefiboshete, mora oa mong'a hao, o tla ja le 'na kamehla.” Siba o ne a e-na le bara ba leshome le metso e mehlano, le bahlanka ba mashome a mabeli.
11Eaba Siba o re ho khosi: “'Na, mohlanka oa hao, ke tla etsa tsohle tseo mong'a ka a ntaelang tsona.”
Mefiboshete a ja le khosi, joalokaha eka ke e mong oa bara ba khosi.
12Mefiboshete o ne a e-na le mora ea neng a sa le monyenyane, lebitso la hae e le 'Mika. Bohle ba neng ba phela lapeng la Siba e ne e le bahlanka ba Mefiboshete. 13Eaba Mefiboshete o aha Jerusalema, a 'na a ja le khosi, le hoja a ne a holofetse maoto a mabeli hakaalo.
