Davida o hlōla Baamone le Baarame
1Kamorao ho mona, khosi ea Baamone ea e-shoa, 'me Hanune, mora oa eona, a e hlahlama. 2Davida a re: “Hanune, mora oa Nahashe, ke tla mo etsetsa tse molemo, joalokaha ntat'ae a ile a nketsetsa tse molemo.” Ka baka leo, Davida a rōma bahlanka ba hae ho mo isetsa matšeliso, ka baka la lefu la ntat'ae.
Ha bahlanka ba Davida ba fihla naheng ea Baamone, 3mahosana a Baamone a re ho Hanune, mong'a 'ona: “U bona eka ke hobane Davida a tlōtla ntat'ao ha a rōmetse maqōsa ho tla u tšelisa? Na hase ho tla hlahloba motse, le ho o hloela, hore a tle a o hape?”
4Eaba Hanune o tšoara bahlanka ba Davida, o ba beola litelu tsa mohlaare o mong, o hahōla liaparo tsa bona ka lehare, ho ea fihla libonong, a nt'o re ba tsamaee. 5Hoba Davida a bolelloe taba ena, a re ba e'o khahlanyetsoa, hobane bao ba ne ba hlabiloe ke lihlong haholo. Eaba khosi Davida o re ho bona: “Lulang moo Jeriko ho fihlela litelu tsa lōna li hlōmela, ebe joale lea khutla.”
6Ha Baamone ba bona hore ba khopisitse Davida, ba ea hira Baarame ba ahileng Bete-Rehobe, le ba ahileng Soba. E ne e le banna ba litaaso ba likete tse mashome a mabeli. Khosi ea Maaka eona e ne e e-na le banna ba sekete, ha banna ba Tobe bona ba ne ba le likete tse leshome le metso e 'meli.
7Ha Davida a utloa taba ena, a rōmela Joabe le lebōtho lohle la bahlabani. 8Baamone ba tsoa, ba thea thekō ea ntoa khorong ea motse. Baarame ba tsoang Soba, le ba tsoang Rehobe, le banna ba tsoang Tobe le Maaka, bona ba ne ba le naheng ba le bang.
9Ha Joabe a bona hore ba lireng ba mo hlahile kapele le kamorao, a khetha mokhetho har'a bahale bohle ba Baiseraele, a o emisa ka thekō, oa thulana le Baarame. 10Bahlabani ba bang bona a ba bea tlas'a taolo ea ngoan'abo, Abishai, le bona ba thea thekō, ba thulana le Baamone. 11Joabe a re: “Haeba Baarame ba ka nkimela, uena u tla nthusetsa; le uena, haeba u ka imeloa ke Baamone, ke tla u thusetsa. 12Tiisa matla, re loanele sechaba sa habo rōna, le metse ea Molimo oa rōna ka sebete. Morena a ke a etse seo eena a bonang hore se lokile.”
13Joale Joabe le bahlabani ba neng ba e-na le eena ba atamela thekōng ea ntoa, 'me lithekō tsa kopana. Baarame ba ba baleha. 14Ha Baamone ba bona hore Baarame ba balehile, le bona ba baleha Abishai, ba ba ba ea kena motseng. Joale Joabe a khaotsa ho ba phalalisa, a khutlela Jerusalema.
15Ha Baarame ba bona hore Baiseraele ba ba hlōtse, ba boela ba khōbōkanya mabōtho. 16Hadade-Esere a laela hore ho latoe Baarame ba neng ba le kamose oane ho nōka. Baarame bao ba fihla Helame, ba e-na le Shobake, molaoli oa mabōtho a Hadade-Esere, a ba eteletse pele.
17Ha Davida a tsebisoa hona, a khōbōkanya bahlabani bohle ba Baiseraele, a tšela Jorodane, a fihla Helame. Baarame ba thea thekō ea ntoa, ba loantša Davida. 18Baarame ba baleha Baiseraele. Davida a bolaea Baarame ba makholo a supileng ba palamang likariki tsa ntoa, le banna ba likete tse mashome a mane ba palamang lipere. A bolaea le Shobake, molaoli oa mabōtho a bona, 'me a shoela hona moo. 19Ha likhosi tsohle tse busoang ke Hadade-Esere li bona hore Baiseraele ba li hlōtse, tsa etsa khotso le bona, tsa ba sebeletsa.
Ka baka leo, Baarame ba tšaba ho 'na ba thusetsa Baamone.
