2 SAMUELE 8

₁Kamora' tsena, Davida a hlōla Bafilesita, a ba busa.

₂A hlōla Bamoabe, a re ba paqame fatše, a ba bala; hlopheng se seng le se seng sa bathōpuoa ba bararo a bolaea ba babeli, a siea a le mong. Bamoabe ea e-ba bahlanka ba Davida, ba mo thèllang.

₃Davida a hlōla Hadade-Esere mora oa Rehobe, khosi ea Soba, ha Hadade-Esere a ne a il'o tsosa puso ea hae pel'a nōka ea Euferatese. ₄Davida a hapa banna ba Hadade-Esere ba lipere ba sekete le makholo a supileng, le ba litaaso ba likete tse mashome a mabeli. Lipere tsohle tse hulang likariki tsa ntoa a li khaola mesifa, a siea feela tse lekaneng ho hula likariki tsa ntoa tse lekholo.

₅Ha Baarame ba Damaseka ba e-ea ho ea thusetsa Hadade-Esere, khosi ea Soba, Davida a bolaea banna ba Baarame ba likete tse mashome a mabeli. ₆Davida a hloma liahelo tsa mabōtho naheng ea Baarame e Damaseka, 'me Baarame ea e-ba bahlanka ba Davida ba mo thèllang. Morena a thusa Davida hohle moo a neng a futuhela teng.

₇Davida a nka lithèbè tsa bahlabani ba Hadade-Esere tse neng li entsoe ka khauta, a li isa Jerusalema. ₈Metseng ea Beta le Berotai, eo e neng e le ea Hadade-Esere, khosi Davida a nka lethose le lengata.

₉Ha Toi, khosi ea Hamate, a utloa hore khosi Davida o hlōtse lebōtho lohle la Hadade-Esere, ₁₀a rōmela mora oa hae Jorame ho Davida, ho ea mo lumelisa le ho mo lebohela ha a loantšitse Hadade-Esere, 'me a mo hlōtse, hobane Hadade-Esere o ne a ile a loantša Toi hangata. Jorame a isetsa Davida lintho tse entsoeng ka silefera, le ka khauta, le ka lethose.

₁₁Le tsona khosi Davida a li khethela Morena, hammoho le silefera le khauta eo a e hapileng ho lichaba tsohle tseo a ileng a li hlōla, ₁₂e leng Baarame, le Bamoabe, le Baamone, le Bafilesita, le Baamaleke, le khapo eo a e nkileng ho Hadade-Esere, mora oa Rehobe, khosi ea Soba.

₁₃Lebitso la Davida la tuma haholo hoba a hlōle Baarame ka Khohlong ea Letsoai, moo a ileng a bolaea banna ba likete tse leshome le metso e robeli.

₁₄A hloma liahelo tsa mabōtho naheng eohle ea Edomo, 'me baahi bohle ba Edomo ea e-ba bahlanka ba hae. Morena a thusa Davida hohle moo a eang teng.

₁₅Davida a busa naha eohle ea Iseraele, a ahlōlela sechaba sohle sa hae ka toka le ka 'nete. ₁₆Joabe, mora oa Seruea, ea e-ba molaoli oa mabōtho; Jehoshafate, mora oa Ahilōde, eena ea e-ba mongoli oa liketsahalo. ₁₇Sadoke, mora oa Ahitube, le Ahimeleke, mora oa Abiatare, bona ea e-ba baprista; Serahiea eena ea e-ba mongoli oa puso. ₁₈Benaea, mora oa Jehoeada, o ne a laola Bakerete le Bapelete; bara ba Davida bona e le batlatsi.