Davida o tšoenyeha ka baka la areka
1Ha khosi e se e lutse, e tsitsitse tlung ea eona, Morena a se a e phomolitse kahohle ho lira tsa eona, 2ea re ho moporofeta Nathane: “Ak'u bone, 'na ke lula tlung e hahiloeng ka lithupa tsa likedare, empa areka ea Morena eona e lula kahar'a masira.”
3Nathane a re ho khosi: “Tsamaea u e'o etsa tsohle tseo u li hopotseng, hobane Morena o na le uena.”
4Hona bosiung boo lentsoe la Morena la fihla ho Nathane, la re:
5“Tsamaea u e'o bolella mohlanka oa ka Davida, u re: ‘Morena o bua tjena: Na ke uena ea tla nkhahela ntlo eo ke tla lula ho eona? 6Ho tloha mohla ke nyollang bana ba Iseraele Egepeta, ho fihlela kajeno, ha ke e-s'o ka ke lula ka tlung; ke tsamaile ke le ka tenteng, le ka leahong. 7Libakeng tsohle tseo ke tsamaileng ho tsona le bana ba Iseraele, na nkile ka botsa e mong oa baahlōli ba Iseraele, bao ke neng ke ba laele ho lisa sechaba sa ka sa Baiseraele, ka re: Ke hobane'ng ha u sa nkhahela ntlo ea lithupa tsa likedare?’ ”
Litšepiso tsa Morena
8“Ka baka lena, u tle u bolelle mohlanka oa ka Davida, u re Morena oa mabōtho o bua tjena: ‘Ke ne ke u late motebong, moo u neng u lisa linku teng, hore u tl'o ba 'musi oa sechaba sa ka sa Baiseraele. 9Ke bile le uena hohle moo u 'nileng ua ea teng, 'me ke timelitse lira tsa hao tsohle. Ke tla tumisa lebitso la hao joaloka mabitso a ba tumileng ba teng lefatšeng mona. 10Ke tla khethela sechaba sa ka sa Baiseraele sebaka, ke se bee ho sona, e le hore se tle se phele sebakeng seo e leng sa sona, se se ke sa hlola se tšoenyeha. Batho ba khopo ba ke ke ba hlola ba se tšoenya joaloka pele, 11ha ke tla be ke khethele sechaba seo sa ka sa Baiseraele baahlōli. Ke tla u phomotsa ho lira tsa hao tsohle. Morena o u boleletse hore o tla hōlisa lelapa la hao. 12Ha u se u shoele, 'me u se u ithobaletse ho bo-ntat'ao, ke tla u hlahisetsa mora ea tla tsoa lethekeng la hao, 'me ke tiise 'muso oa hae. 13O tla nkhahela ntlo, 'me ke tla tiisa terone ea 'muso oa hae kamehla eohle. 14Ke tla ba ntat'ae, 'me eena e be mora oa ka, empa haeba a ka etsa bokhopo, ke tla mo otla ka thupa e khalemelang bana, le ka meupa eo batho ba e shapang bana ba bona. 15Feela nke ke ka khaotsa ho mo hauhela, joalokaha ke ile ka khaotsa ho hauhela Saule, eo ke ileng ka mo hleka tseleng ea hao. 16Ntlo ea hao, le 'muso oa hao, ke tla li tiisa kamehla eohle. Terone ea hao e tla tsitsa kamehla eohle.’ ”
17Nathane a phetela Davida litaba tsena tsohle ho ea kamoo a li senoletsoeng kateng.
Thapelo ea Davida
18Joale khosi Davida a kena ka tenteng, a lula kapele ho Morena, 'me a re:
“Oho, Morena Molimo, ekaba 'na ke mang? Ekaba lelapa la ka ke eng, hoo u mphihlisitseng hōle hakaale? 19Oho, Morena, hoa bonahala hore ho uena tsena e ne e sa le linyane, hobane u boetse u buile ka seo u se reretseng lelapa la mohlanka oa hao nako e sa le hōle. Oho, Morena Molimo, le tsena u li tsebisitse mothoana ea kang 'na!
20“Ekaba Davida a ka hlola a sa re'ng ho uena? Ke uena ea tsebang mohlanka oa hao, oho, Morena Molimo! 21Ka baka la tšepiso ea hao, le ka baka la ho rata ha hao, u entse tsena tse kholo, hore mohlanka oa hao a li tsebe.
22“Ka baka lena, u moholo, uena Morena Molimo, hobane ha ho ea kang uena; ebile hape ha ho Molimo e mong ntle ho uena, ho ea ka tsohle tseo re li utloileng ka litsebe tsa rōna. 23Ke sechaba sefe se kang sechaba sa hao sa Baiseraele, e leng sona feela moo lefatšeng, seo Molimo a kileng a ea se lopolla hore e be sechaba sa hae, 'me se tumise lebitso la hae? Ke sefe sechaba seo uena u kileng ua se etsetsa tse kholo, tse tšabehang naheng ea hao, ka ho hleka machaba le melimo ea 'ona tseleng ea sechaba sa hao, seo u se lopolotseng Egepeta? 24Sechaba sa Iseraele u se entse sechaba sa hao sa kamehla eohle, 'me uena Morena, u Molimo oa sona.
25“Joale he, uena Morena Molimo, tšepiso eo u e etselitseng mohlanka oa hao, le lelapa la hae, u ke u e phethahatse kamehla eohle, 'me u etse kamoo u buileng kateng. 26Lebitso la hao le ke le tumisoe kamehla eohle, batho ba re: ‘Morena oa mabōtho ke Molimo oa Iseraele!’ Ntlo ea Davida, mohlanka oa hao, e tla tiea kamehla eohle.
27“Uena, Morena oa mabōtho, Molimo oa Iseraele, u senoletse mohlanka oa hao, ua re: ‘Ke tla u hahela ntlo’; ka baka lena ke bile sebete ho u rapela ka thapelo ena. 28Uena Morena Molimo, ke uena feela u leng Molimo, 'me lipolelo tsa hao ke tsa 'nete. U tšepisitse mohlanka oa hao taba ena ee molemo. 29Ka baka lena ak'u hlohonolofatse lelapa la mohlanka oa hao, hore le 'ne le be tlhokomelong ea hao kamehla eohle, hobane uena Morena Molimo, u tšepisitse joalo. U ke u hlohonolofatse lelapa la mohlanka oa hao ka tlhohonolofatso ea hao kamehla eohle.”
