JOBO 37

₁Pelo ya ka e tshohile ke hona, e sisimoloha tulong tsa yona! ₂Utlwang! utlwang ho duma ha lentswe la wona, le modumo o tswang molomong wa wona! ₃O le utlwahatsa hohle sebakeng sa lehodimo, o betsa mahadima a wona ho isa pheletsong tsa lefatshe. ₄Mme hanghang, lentswe la wona le a duma, o duma ka lentswe la boholo ba wona; ha o ke o thiba mahadima, ha lentswe la wona le utlwahala. ₅Modimo o duma ka lentswe le tshabehang, o etsa dintho tse kgolo tseo re sitwang ho di utlwisisa. ₆O re ho lehlwa: Kgethehela lefatsheng! O rialo le ho pula le ho dikgohola tse kgolo. ₇Eba moo o kokobanyang matsoho a batho bohle, hore batho kaofela, bao o ba bopileng, ba tle ba o tsebe. ₈Dibatana le tsona di hahabela matsabeng a tsona, di botha mesimeng ya tsona. ₉Sefefo se tswa borwa, mme moya o tswang leboya o tlisa serame. ₁₀Ka pudulo ya Modimo, ho hlaha leqhwa, metsi a matsha a hwama. ₁₁Hape, o belesa maru ka metsi, o mathisa maru a tletseng letolo; ₁₂mme wona a iphetolele kahohle kamoo o a laelang kateng, a tle a sebetse hohle hoo o ho laetseng lebaleng la lefatshe; ₁₃e ka thupa e otlang lefatshe ha le ena le molato, mohlomong o a tsamaise ho hlohonolofatsa ka wona.

₁₄Oho Jobo, sekehela taba tseo ditsebe tsa hao; ema, o nahane mehlolo ya Modimo. ₁₅Na o tseba kamoo Modimo o di hlahisang kateng; kamoo o rerang lesedi la maru a wona kateng hore le hadime na? ₁₆Na o utlwisisa ho ebesela ha maru? Na o utlwisisa bohlale ba wona bo phethehileng? ₁₇Na o utlwisisa kamoo diaparo tsa hao di nkang mofuthumela kateng, ha o etsa lefatshe lebatama ka moya wa borwa na? ₁₈Na o ka tseba ho ala sebaka sa lehodimo hammoho le wona, wa se fa bothata ba seipone sa tshepe e tsholotsweng na? ₁₉O re rute seo re ka se buang ho wona; hobane re sitwa ho bua ka baka la ho se tsebe ha rona! ₂₀Na o tla bolellwa hore ke rata ho o buisa? Na ke mang ya ka lakatsang ho timetswa? ₂₁Efela motho o sitwa ho tadima letsatsi, ha le kganya sebakeng sa lehodimo, ha moya o se o fetile, mme o se o fietse; ₂₂leboya le a le kgantsha jwaloka kgauta. Modimo o okametse tsohle jwalo ka kganya e tshabehang! ₂₃Re ke ke ra finyella ho Ya matla wohle; o phahamile ka matla le ka toka, le ka ho loka ho sa kgelosweng. ₂₄Ka baka leo, batho ba tshwanetse ho hlonepha Modimo; haele wona, ha o tadime le a mong ho ba bohlale.