JOBO 38

₁Yaba Jehova o fetola Jobo a le sefefong, a re: ₂Ya fifatsang morero wa ka ka dipolelo tse se nang kelello ke mang? ₃Jwale, o itlame letheka jwaloka monna, ke tle ke o botse, mme o nthute.

₄O ne o le kae, mohla ke theang lefatshe? Bolela, ha o ena le tsebo. ₅Ke mang ya beileng tekanyo ya lona, ha o tseba, kapa ke mang ya le lekantseng ka thapo? ₆Metheo ya ditshiya tsa lona e tjhekilwe ho eng? Kapa ke mang ya beileng lejwe la ntlha ya lona, ₇mohla dinaledi tsa meso di ntshang mehoo ya thabo, le bara bohle ba Modimo ba binang ka nyakallo? ₈Ke mang ya kwaletseng lewatle ka menyako, mohla le kgaolang dithapo tsa lona jwaloka ngwana ya tswang popelong, ₉ha ke tla le fa maru ho ipopa ka wona, le mehodi e metenya ho iphutela ka yona; ₁₀ka ba ka le beela meedi ya lona, ka tiisa mekwallo le menyako ya lona, ₁₁mme ka re: O tla fihla ho tlisa mona, ha o na ho fetela pele; boikgohomoso ba maqhubu a hao bo tla fella mona?

₁₂Haesale o phela, na o se o kile wa laela meso ho hlaha, kapa o laetse mafube moo a tlang ho hlaha teng, ₁₃hore a tshware dipheletso tsa lefatshe, a tle a qhalanye ba bolotsana pela wona na? ₁₄Ke hona moo lefatshe le fetohang sebopebo, jwaloka letsopa ha le bopjwa, mme dintho kaofela di hlahang ho le apesa. ₁₅Teng, lesedi la ba bolotsana le tloswa ho bona, mme letsoho le otlolohileng le a robeha.

₁₆Na o finyeletse mehloding ya lewatle? Na o ile wa fihla bofellong ba sekoti sa bodiba na? ₁₇Na o buletswe menyako ya lefu na? Na o bone menyako ya moriti wa lefu na? ₁₈Na o utlwisisa bophara ba lefatshe na? Haeba o tseba dintho tseo kaofela, o bolele!

₁₉E kae tsela e isang tlung ya lesedi? Haele lefifi, na bodulo ba lona ke kae na? ₂₀Na o tla di lata tse pedi hore o tsebe moo di fellang teng, o tsebe le tsela e isang tlung ya tsona na? ₂₁Ha ke re o a di tseba, hobane o ne o se o hlahile, mme palo ya matsatsi a hao e kgolo haholo!

₂₂Na o finyeletse tlung ya polokelo ya lehlwa? Na o bone ntlo ya polokelo ya sefako, ₂₃seo ke se boloketseng letsatsi la tshenyo, le letsatsi la ho futuha le la ntwa na? ₂₄Tsela ke efe e isang moo lesedi le arohanang teng, moo sefefo se tswang ho tla fokela lefatsheng? ₂₅Ke mang ya entseng masobana a hasang dipula, le tsela ya lehadima le dumang; ₂₆ho nesa pula nahathothe, le naheng e tshehla, moo ho sa aheng motho teng; ₂₇ho nosetsa dinaha tsa mafeella, tse omileng, ho medisa jwang bo botala?

₂₈Na pula e na le ntata yona na? Kapa marothodi a diphoka a tswetswe ke mang na? ₂₉Leqhwa le tswa maleng a mang? Serame se lalang fatshe se hlahisitswe ke mang? ₃₀Ke ka mokgwa o jwang ha metsi a hwama, a eba thata jwaloka lejwe, mme bohodimo ba bodiba bo tiya hammoho? ₃₁Na ke wena ya lohileng thapo e tlamileng Selemela, kapa o na le matla a ho lokolla senyepa sa Makolobe na? ₃₂Na o ka hlahisa dinaledi tsa lehodimo mehleng ya tsona, kapa ke wena ya tsamaisang Koloi le dinaletsana tsa yona? ₃₃Na o tseba melao ya mahodimo le tshebetso ya yona lefatsheng na? ₃₄Na o ka howeletsa ho maru ka lentswe la hao, hore a be a phakise a o apese ka pula e kgolo na? ₃₅Na o ka roma mahadima, a ke a hadime? Na a tla re ho wena: Ke rona bana? ₃₆Ke mang ya neileng pelo ya motho bohlale, ke mang ya neileng moya wa hae kutlwisiso? ₃₇Ke mang ya fihletseng palo ya maru ka bohlale ba hae, mme ke mang ya ka tshelang makuka a mahodimo, ₃₈ha lerole le phalla jwaloka tshepe e qhibilihisitsweng, mme makote a teana?

₃₉Na o ka bolaela tau phoofolo, le ho kgorisa ho lapa ha ditawana, ₄₀ha di bothile matsabeng a tsona, leha di laletse hara dihlahla? ₄₁Ke mang ya baballang lekgwaba ka dijo tsa lona, ha madinyane a lona a hoeletsa ho Modimo, mme a kekella mane le mane ke ho lapa?