JOBO 36

₁Elihu a boela a ntshetsa ditaba pele, a re: ₂Ako mpehele pelo hanyenyane, ke tle ke o lemose, hobane ke sa na le seo nka buellang Modimo ka sona. ₃Ke tla lata tsebo ya ka hole, ke tle ke bontshe ho loka ha Mmopi wa ka. ₄Hobane ruri dipolelo tsa ka e ke ke ya eba tsa leshano: pela hao ho eme ya phethehileng tsebong.

₅Bona, Modimo o matla, empa ha o nyedise motho; o moholo ka matla a kutlwisiso ya wona. ₆Ha o boloke bophelo ba molotsana; o ahlolela ba tujwang. ₇Ha o furalle ba lokileng, empa o ba bea le marena teroneng; o ba dudisa teng kamehla, hore ba phahamiswe. ₈Empa ha ba holehilwe ka mahlaahlela, ba tlamilwe ka dikgole tsa hlokofatso, ₉ke moo Modimo o ratang ho ba senolela diketso tsa bona le ditlolo tsa boikgohomoso ba bona; ₁₀ke moo o thibollang ditsebe tsa bona hore di mamele tayo, mme o ba laelang ho tela bobe. ₁₁Ha ba ka utlwa, mme ba o dumela, ba tla qetella bophelo ba bona lehlohonolong, le dilemo tsa bona thabong; ₁₂empa ha ba sa utlwe, ba tla hlajwa ke lerumo, ba timele ke ho hloka kutlwisiso. ₁₃Ba pelo tse ikakasang ba ipokellela bohale; ha ba rapele ha Modimo o ba tlama. ₁₄Ba shwa ba sa le batjha; bophelo ba bona bo tshwana le ba dihlola. ₁₅Empa o lokolla ba hloriswang matswalong a bona, o ba eletsa ka mahlomola.

₁₆O tla o lokolla jwalo dinaleng tsa matshwenyeho, ho o bea sebakeng, moo o ke keng wa patiswa; dijo tse hlabosang di tla bewa tafoleng ya hao. ₁₇Empa ha o ka tlala kgopolo ya molotsana, kotlo e tla latelana le kahlolo. ₁₈Empa bohale ba hao bo se ke ba o isa nyefolong, mme boholo ba tefo eo o ka e ntshang bo se ke ba o kgelosa. ₁₉Leruo la hao na le ka o ntsha tsietsing na, leha e le matla wohle ao o ka etsang ka wona na? ₂₀O se ke wa lakatsa bosiu bo tlang ho tlosa batho ditulong tsa bona. ₂₁O itise, o se ke wa sekamela bobeng, hobane etlaba o bo rata ho fetisa mahlomola.

₂₂Bona, Modimo o phahamile ka matla a wona; na moruti o teng ya kang wona? ₂₃Ke mang ya ka o rutang tsela ya wona? ₂₄Ke mang ya ka reng ho wona: O etsa hampe? O se ke wa lebala ho hodisa mesebetsi ya wona e roriswang ke batho ka dithoko. ₂₅E bohuwa ke batho kaofela, ba e tadimela hole! ₂₆Bona, Modimo o moholo, re ke ke ra o tsebisisa, bokae ba dilemo tsa wona bo ke ke ba fumanwa. ₂₇O hula marothodi a metsi, mohodi oo o o bopang ka wona o hlotlha dipula ₂₈tse tshelwang ke maru, o di nesetsa hodima batho ka medupe. ₂₉Ke mang ya utlwisisang ho otlana ha maru, le modumo oo tente ya wona e dumang ka wona? ₃₀Bona kamoo o hasang lesedi kateng pela wona, kamoo o ikwahelang ka botebo ba lewatle kateng. ₃₁Ke tseo o otlang batho ka tsona; ke tseo o hlahisang nala ka tsona. ₃₂O nkile letolo matsohong a wona, o le laela ho otla bakgopo. ₃₃Modumo wa wona o a o utlwahatsa, esita le diphoofolo di a o utlwa, ha o atamela.