UJONA 3

₁Ilizwi lakaSomnini lafika kuJona kwesibili lathi:

₂“Khuphuka uye edorobheni elikhulu iNiniva ufese ubakhalime ngamezwi engikuthume wona.”

₃UJona wakhuphuka waya eNiniva njengokutjho kwelizwi lakaSomnini. INiniva begade kulidorobho elikhulu kwamambala, bekuthatha amalanga amathathu ukulizombeleza. ₄UJona kwamthatha ikhambo lelanga ukuqangula ngaphakathi kwedorobho. Wabika wathi: “Kusele amatjhumi amane wamalanga bonyana iNiniva irhayilwe.”

₅Amadoda weNiniva akholwa kuZimu. Abeka ilanga lokuzila ukudla kusukela komkhulu kuya komncani, embatha iinzilo. ₆Ikosi yeNiniva yathi ingezwa iindabezi, yasikima esihlalweni sayo, yahlubula iingubo zayo zobukhosi, yazibhibha ngomgodla yahlala phasi ebhudwini. ₇Yakhupha umbiko eNiniva yathi: “Umyalo ovela ekosini neenduneni zayo uthi: Kungabi nomuntu ogomako noselako, ifuyo ekulu nencani nayo ingadliswa begodu ingasezwa amanzi. ₈Abantu bazibhibhe ngemigodla kanye nefuywabo. Ababize uZimu ngamandla. Omunye nomunye atjhiye iindlela zakhe zobukhohlakali nenturhu esezandleni zakhe. Ngombana ngubani owaziko, ₉mhlamunye uZimu angazisola ebukhalini bakhe asirhawukele ukuze singabhubhi.”

₁₀UZimu wabona izenzo zabo, nangendlela baphenduke ngayo ebukhohlakalini babo, wabarhawukela azange asababhubhisa njengombana agade atjhwile.