UJONA 4

₁UJona samsilinga khulu isenzwesi bewabibhelana. ₂Wathandaza uSomnini wathi: “Maye Somnini, akhange ngisole ngisesesenarheni yekhethu na? Kungebangeli-ke mina fengathoma ngokubalekela eTharatjhitjhi. Ngazile bona unguZimu onomusa nesirhawu, ubuthaka ekusilingekeni. Ukwethembeka kwakho kukhulu. UnguZimu oriyadako ukurhayila. ₃Nje-ke Kosami, dumbana uthathe ipilwami; kungcono ngife kunobana ngiphile.”

₄Kodwana uSomnini wamphendula wathi: “Unelungelo lokubibhelana na?”

₅UJona waphuma ngedorobheni wayokuhlala ngepumalanga yalo, wazenzela umthunzi ngamatjhwaba lapho. Wahlala lapho wakha umkhanyo afuna ukubona bonyana kuzokwenzakalani ngedorobheli. ₆USomnini uZimu waveza umrarela; bewakhula wanaba wenzela uJona umthunzi ukuze asithe ihlokwakhe. UJona wawuthabela khulu umrarela lowo.

₇Kodwana kwathi ngomuso ngesamarimarima uSomnini waveza ipehli yadla umrarela lowo bewatjhwaba. ₈Kwathi nakuphuma ilanga uZimu waletha ummoya otjhisako ovela ngepumalanga, ilanga lanemba uJona ehloko bewatsirimizeka. Wakhanukela ukufa wathi: “Kungcono ngife kunobana ngiphile.”

₉Kodwana uZimu wathi kuJona: “Unelungelo lokubibhelana ngebanga lomrarela lo na?”

UJona wathi: “Iye, nginelungelo lokubibhelana kangangoba kuthi angife.”

₁₀USomnini wathi kuye: “Wena utshwenyeke ngomrarela lo; nanyana ungazange uwujulukele. Umile ngobusuku bunye begodu watjhabalala ngobusuku bunye. ₁₁Alo-ke mina bengingakameli bonyana ngitshwenyekele iNiniva idorobho elikhulu kangaka elinabantu abangaphezu kweenkulungwana ezilikhulu namatjhumi amabili abangazi bonyana emuva kukuphi naphambili kukuphi, nefuyo enengi kangaka na?”