UJOBHO 22

₂“UZimu angasizwa mumuntu na?

Nohlakaniphileko angaba lisizo kuye na?

₃OSabekako ujatjuliswa kulunga kwakho na?

Uzuzani ngobumsulwa beendlela zakho?

₄Kungebanga lokuzithoba kwakho kobana uZimu akusole,

abe akuse ebandla na?

₅Ukukhohlakala kwakho kukhulu!

Izono zakho azinasiphetho,

₆ngombana ufune isibambiso kubafowenu,

ngokuncani abakubamba khona.

Bewubahlubulisa izambatho.

₇Azange ubaphe amanzi abadiniweko,

watima abalambileko ukudla.

₈Kodwana onamandla bewumnikela inarha,

iye, omthandako bekahlala kiyo.

₉Wajikisa abahlolokazi bamkhonoze

nabanganaboyise wabaqeda amandla.

₁₀Kungebangelo iinthiyo zikuzombelezile,

ivalo eliza ungakatjheji liyakubhudungela.

₁₁Kghani awuboni ubumnyama,

neenkhukhula zamanzi ezikugubuzesako na?

₁₂“UZimu akahlali ekuphakameni kwezulu na?

Qala iinkwekwezi ezisekabeni yomkayi:

Maye, ziphakeme kangangani!

₁₃Khonapho wena uthi, ‘UZimu wazini nje?

Angagweba asebumnyameni obunjalo na?

₁₄Amafu anzima tshu ayamsitha kobana angaboni

lokha nakhamba esibhakabhakeni.’

₁₅Uzakukhamba endleleni yekadeni,

eyakhanjwa ngabakhohlakeleko,

₁₆abadudulwa ngaphambi kwesikhathi,

iinsekelo zabo zakhukhulwa ziinkhukhula na?

₁₇Ngibo abathi kuZimu, ‘Hlukana nathi!’

Godu bathi, ‘Yini engenziwa ngoSabekako kithi na?’

₁₈Khisibe nguye oSabekako ozalise iinkumba zabo ngokuhle.

Kodwana amaqhinga weenkhohlakali akude noZimu!

₁₉Abalungileko bayakubona lokho bese bajabule,

abamsulwa babakokomeje

₂₀ngokuthi, ‘Iye, abajamelene nathi bayatjhabalaliswa,

nomlilo uqothule amasalelabo.’

₂₁“Nawubuyisana noZimu, uzakuba nokuthula;

ngaleyondlela ipumelelo izakuza kuwe.

₂₂Yamukela ifundiso ephuma emlonyenakhe,

ubeke amezwakhe ehliziywenakho.

₂₃Nawubuyela koSabekako, uzakuvuselelwa.

Tjhidisela ikohlakalo kude nomzakho.

₂₄Lahlela igade legolidakho ethulini,

igolide elicolisakeleko emadwaleni wemilanjana.

₂₅Nje-ke, oSabekako uzakuba ligade lakho legolide,

godu abe yisilivakho ephazimako.

₂₆Khona-ke uzakuthaba kuye,

uphakamisele ubuso bakho kuZimu.

₂₇Nawumncengako, uzakuzwa,

yeke uzakghona ukuphetha iinthembiso zakho.

₂₈Okuquntileko kuzakwenzeka,

neendlela zakho zizakukhanya,

₂₉ngombana wehlisa amehlo aziphakamisako,

kodwana usindisa amehlo azithobileko.

₃₀Ngomsulwa kwaphela amtjhaphululako,

iye, usindiswa kuhlanzeka kwezandla zakhe.”