UJOBHO 21

₂“Lalelisisani amezwami,

kube yinduduzo evela kini.

₃Ngibekezelelani khengikhulume,

kuthi nangiqedako, nihlekise ngami-ke.

₄Isinghonghoyilo sami asikaqaliswa ebantwini.

Alo-ke, kubayini kumele ngibekezele?

₅Nange ningalalela engikutjhoko, nizakumangala,

nje-ke nizakuthula nithi du.

₆Nangicabanga ngalokhu, ngehlelwa kukwesaba,

umzimbami uyathuthumela.

₇“Kubayini iinkhohlakali ziphila isikhathi eside,

ziluphale godu zidlondlobale zibe namandla?

₈Abantwabazo baphumelela phambi kwazo,

iye, imindeni neenzukulwana zikanye nazo.

₉Amakhayazo aphephile, akunavalo kiwo,

iswazi lakaZimu alikho phezu kwazo.

₁₀Iinkunzi zazo azibhalelwa kumithisa,

iinkomo zazo ziyabamba, aziphunzi.

₁₁Iinkhohlakali zikhupha abantwabazo njengemihlambi,

iye, baphuma, bajekezele ngaphandle.

₁₂Zibhina ngokulilisa abosotjherere namaharibha,

zithabele itjhada lamanghwani.

₁₃Zizwa kuhle ipilwazo yoke,

ziziyele kabafileko ngokuthula.

₁₄Zithi kuZimu: ‘Hlukana nathi!

Asikhanuki ukwazi iindlela zakho.

₁₅Bekayini oSabekako loyo bonyana singabeze simlotjhe?

Sizakubuyelwa yini nasimthandazako?’

₁₆“Nakube umnono weenkhohlakali awusisezandleni zazo,

amaqhingazo akude noZimu,

₁₇kukangaki isibani sazo sicinywa na?

Kukangaki zehlelwa yihlekelele ezifaneleko?

Ingabe uZimu uyazabela ukubhujiswa etukuthelwenakhe na?

₁₈Kukangaki zifana neenhlanga eziphetjhulwa mumoya,

njengamawunguwungu akhukhulwa siwuruwuru na?

₁₉Namkha uZimu wehlisela isibetho sesikhohlakali emadodanenaso?

Awa, uZimu akabethe isikhohlakaleso ukuze sazi nakusasa!

₂₀Amehlwaso akabone ukubhujiswa kwaso,

sisele itukuthelo yoSabekako,

₂₁ngombana asinandaba nomndenaso esiwutjhiyako

lokha nakufika ukuphela kwamalangaso!

₂₂“Ngubani ongafundisa uZimu ilwazi,

onguye ogweba iindalwa zezulu na?

₂₃Omunye umuntu ufa asaqinile,

aphephile begodu azigedlile,

₂₄iinqwebu zakhe zihlala zigcwele

namathambakhe anommongo.

₂₅Omunye umuntu ufa alisizi

angazange akhe abone ubuhle.

₂₆Bobabili balala ngokufanako ethulini,

iimpethu zibembese.

₂₇“Ngiyakwazi enikucabangako

namazungu eningona ngawo

₂₈ngombana nithi, ‘Iphi-ke gadesi ikumba yomuntu omkhulu?

Liphi ikhaya leenkhohlakali?’

₂₉Kubayini ningabuzi abantu bemilandelande?

Angeze naphikisana nobufakazi ababulethako,

₃₀okutjho ngomhla wehlekelele iinkhohlakali ziyasinda,

ngelanga letukuthelo ziphunyurha zingakalimali.

₃₁Ngubani ongasola uZimu tjhatjhalazi ngalokhu na?

Ngubani ongamhlawulisa ngalokho akwenzileko?

₃₂“Isikhohlakali sisiwa emathuneni wekhabo,

sigadwe liqubi lequlwani.

₃₃Iye, amagade emlonyeni werholo asisithe kuhle;

boke abantu bekhabo bazasilandela,

begodu sizakuba kanye nabanengi abakhamba phambi kwaso.

₃₄Alo-ke nakunjalo, ningangiduduza njani ngenyakanyakenu leyo?

Aninazo iimpendulo ngaphandle kwekohliso kwaphela.”