1 UJWANISI 4

₁Bathandekako ningakholwa yoke imimoya, kodwana hlolisisani nakube ivela kuZimu ngombana banengi abaphorofidi bamanga abaphumele ephasini. ₂UMoya kaZimu nizamazi ngalokhu: Woke ummoya ovumako bona uJesu Krestu uzile ngejamo lenyama uvela kuZimu. ₃Woke ummoya ongamvumi uJesu awuveli kuZimu. Lowo mumoya waloyo ophika uKrestu enezwa ngawo bona uyeza, njenganje selakhona ephasinapha.

₄Bantwana ningebakaZimu begodu nibahlulile ngombana loyo ongakini mkhulu kunaloyo osephasineli. ₅Bona bangebephaseli; yeke lokho abakukhulumako kungekwephasi. ₆Thina singebakaZimu, loyo owazi uZimu uyasilalela; loyo ongasuye wakaZimu akasilaleli. Ngalokhu sazi ummoya weqiniso nommoya wamanga.

₇Bathandekako, asithandaneni ngombana ithando livela kuZimu. Onethando ubelethwe nguZimu begodu uyamazi uZimu. ₈Loyo onganathando akamazi uZimu ngombana uZimu ulithando. ₉Ithando lakaZimu labonakaliswa phakathi kwethu ngokuthumela iNdodanakhe eyodwa tere ephasinapha ukuze siphile ngayo. ₁₀Ithando ngilokhu: Akusingithi esamthandako uZimu, kodwana nguye owasithandako bewasithumela neNdodanakhe bona ibe mhlabelo oyihlawulo yezono zethu.

₁₁Bathandekako, njengombana uZimu wasithanda kangaka, ngokunjalo nathi sifanele sithandane. ₁₂Akakho noyedwa owakhe wabona uZimu, kodwana nasithandanako uZimu uhlala kithi nethando lakhe liphelele kithi.

₁₃Ngalokho siyazi bona sihlala kuye naye uhlala kithi ngombana usinikele kwakaMoya wakhe. ₁₄Sibonile begodu siyafakaza bona uYise wathumela iNdodanakhe bona ibe Msindisi wephasi. ₁₅Loyo ovumako bona uJesu uyiNdodana kaZimu, uZimu uphila kuye naye uphila kuZimu. ₁₆Nje-ke siyalazi besiyalikholwa ithando uZimu analo kithi.

Iye, uZimu ulithando, loyo ophila ethandweni uphila kuZimu noZimu uphila kuye. ₁₇Ngendlela leyo ithando liphelelisiwe kithi ukuze sibe nesibindi ngelanga lokugwetjwa ngombana njengombana anjalo yena, sinjalo nathi ephasinapha. ₁₈Akukho ukwesaba ethandweni. Kodwana ithando elipheleleko liqotha ukwesaba ngombana ukwesaba kunesibetho, nje-ke owesabako akakapheleli ethandweni.

₁₉Thina siyathanda ngombana yena wasithanda qangi. ₂₀Loyo othi: “Ngiyamthanda uZimu,” kodwana khisibe uzonde umzalwana wakhe, umleyimala ngombana loyo ozonda umzalwana wakhe ambonako angekhe athanda uZimu angazange akhe ambone. ₂₁Umyalo asinikele wona ngilo: Loyo othanda uZimu kufanele athande nomzalwana wakhe.