1 UJWANISI 5

₁Loyo naloyo okholwako bona uJesu unguKrestu, ubelethwe nguZimu; omunye nomunye othanda umbelethi, uthanda naloyo obelethwe nguye. ₂Ngalokho siyazi bona sithanda abantwana bakaZimu, lokha nasilonda imiyalwakhe. ₃Ukuthanda uZimu kukobana silonde imiyalwakhe, begodu imiyalwakhe ayisinzima ₄ngombana koke okubelethwe nguZimu kuyalihlula iphasi; lokhu kukuhlula okwehlule iphasi: ukukholwa kwethu. ₅Ngubani ongahlula iphasi nakungasi ngiloyo okholwa bona uJesu uyiNdodana kaZimu na?

₆Nguye loyo oweza ngamanzi nangeengazi, uJesu Krestu; ingasi ngamanzi kwaphela, kodwana weza ngamanzi nangeengazi. UMoya nguye ofakazako ngombana uMoya uliqiniso. ₇Bathathu abofakazi, ₈nguMoya, mamanzi neengazi begodu abathathwaba bayavumelana. ₉Nakube siyabamukela ubufakazi babantu, khona-ke ubufakazi bakaZimu bukhulu kunabo ngombana lobu bufakazi bakaZimu abunikeleko ngeNdodanakhe. ₁₀Okholwa eNdodaneni kaZimu unabo ubufakazi ngehliziywenakhe. Ongakholwa kuZimu, umenze umleyimanga ngokungakholwa ebufakazini uZimu abukhulumileko ngeNdodanakhe. ₁₁Ubufakazi ngilobu bokuthi uZimu usiphe ubuphilo obungapheliko; ubuphilobu buseNdodanenakhe. ₁₂Loyo oneNdodana kaZimu unokuphila; kodwana loyo onganaNdodana kaZimu akanakho ukuphila.

₁₃Nginitlolela lokhu nina enikholwa ebizweni leNdodana kaZimu ukuze nazi bona ninokuphila okungapheliko. ₁₄Nasi isibindi esinaso kuye: Lokha nasibawa nanyana yini ngokwentando yakhe, uyasizwa. ₁₅Nje-ke nakube siyazi bona uyasizwa nasibawa nanyana yini, khona-ke siyazi bona sesikufumene esimbawe khona.

₁₆Nangabe omunye ubona umzalwana wakhe enza isono esingadoseli ekufeni, akamthandazele; uZimu uzamupha ukuphila loyo ongenzi isono esidosela ekufeni. Sikhona isono esidosela ekufeni, angitjho bona kuthandazelwe leso. ₁₇Koke okungakalungi sisono kodwana kukhona isono esingadoseli ekufeni.

₁₈Siyazi bona loyo obelethwe nguZimu akathuweleli ngokona, iye ngombana obelethwe nguZimu uyazilonda nomumbi akamthinti.

₁₉Siyazi bona singebakaZimu nokobana iphasi loke lisemandleni womumbi.

₂₀Godu siyazi bona iNdodana kaZimu yeza yasipha ilemuko ukuze simazi oliqiniso begodu sikuye oliqiniso neNdodanakhe uJesu Krestu. Yena unguZimu mbala, ukuphila okungapheliko.

₂₁Bantwana, tjhidani kibosingazimu.