1 UJWANISI 3

₁Qalani bona lingangani ithando uBaba asiphe lona kobana sibizwe bona sibantwana bakaZimu; iye, singibo! Ngikho lokhu iphasi lingasazi ngombana azange limazi yena. ₂Bathandekako, kwanjesi sibantwana bakaZimu, nokho akukakhanyi kuhle esizakuba ngikho. Kodwana esikwaziko ngilokhu: lokha nakabonakaliswako sizakufana naye ngombana sizombona njengombana anjalo. ₃Ngiloyo naloyo onethemba leli kuye uyazihlambulula njengombana yena ahlambulukile.

₄Loyo owenza isono weqa umthetho ngombana isono sikukweqa umthetho. ₅Niyazi bona wabonakaliswa kobana azokuhlangula izono begodu kuye akukho sono. ₆Loyo ohlala kuye akoni; yeke owonako akakamboni begodu akamazi.

₇Bantwana, ningalahlekiswa mumuntu. Loyo owenza okulungileko ulungile njengombana naye alungile. ₈Loyo owenza isono ngewakaSathana ngombana uSathana uyona kusukela ekuthomeni. Isizathu sokobana iNdodana kaZimu ibonakaliswe kugiriza imisebenzi kaSathana.

₉Loyo obelethwe nguZimu akoni ngombana imbewu kaZimu ihlala kuye, akasakghoni ukona ngombana ubelethwe nguZimu. ₁₀Ngalokho abantwana bakaZimu nebakaSathana babonakala ngalokhu: Loyo ongenzi okulungileko naloyo ongathandi umzalwana akasuye umntwana kaZimu.

₁₁Lo, myalo enawuzwa kusukela ekuthomeni wokobana kufuze sithandane. ₁₂Singafani noKayini ogade angewakaSathana ngokubulala umfowabo. Enjephana wambulalelani na? Kungombana izenzo zakhe bezizimbi kodwana zomfowabo zilungile.

₁₃Ningarareki bazalwana lokha ilizwe nalinizondako. ₁₄Siyazi bona sesiphumile ekufeni singene ekuphileni ngombana sithanda abazalwana. Loyo onganathando usahlezi ekufeni. ₁₅Nanyana ngubani ozonda umzalwana wakhe, umbulali; niyazi bona akunambulali onokuphila okungapheliko. ₁₆Ithando silazi ngokuthi yena wadela ukuphila kwakhe ngebanga lethu. Nje-ke nathi kufanele sidele ukuphila kwethu ngebanga labanye. ₁₇Alo, ithando lakaZimu lingahlala njani emuntwini othi anomnotho wephaseli, abone umzalwana wakhe aswela kodwana angabi nesisa kuye na? ₁₈Bantwana, asingabi nethando ngamezwi namkha ngekulumo kodwana ngeqiniso nangezenzo. ₁₉Ngalokho sizakwazi bona singebeqiniso begodu iinhliziyo zethu sizazithulisa phambi kwakhe ₂₀lokha nazisilahlako ngombana uZimu mkhulu kuneenhliziyo zethu begodu wazi koke. ₂₁Bathandekako, nakube iinhliziyo zethu azisilahli, sinesibindi phambi kwakaZimu, ₂₂samukeliswa koke esikubawa kuye ngombana silonda imiyalwakhe besenze lokho okumthokozisako. ₂₃Nje-ke naku umyalo: Kufuze sikholwe ebizweni leNdodanakhe uJesu Krestu begodu sithandane njengombana asiyala. ₂₄Labo abalonda imiyalwakhe bahlala kuye naye uhlala kibo. Ngalokho siyazi bona uhlala kithi ngoMoya asiphe yena.