BAROMA 9

₁Ke bolela therešo ka Kriste, ga ke bolele maaka; le letswalo la ka le ntlhatsela ka Moyamokgethwa, ₂ge ke re: Mo pelong ya ka ke na le bohloko bjo bogolo le nyamo ye e sa okobalego. ₃Ke re: Ge nka be ke kgona go phološa ba gešo, ba e lego metswalo ya gešo ka nama, ka kgona go ba phološa, nna ka no lahlwamoka ke se hlwe ke eba wa Kriste, nka be ke re: A nke ke lahlwe, go phologe bona. ₄Bona e lego Baisiraele, bona beng ba bokgomana le ba go retwa, beng ba dikgwerano, ba go fiwa Molao le morapelelo le dikholofedišo. ₅Ba ba nago le botatabo, go bao ka la nama go tšwilego yena Kriste, yena Modimo wa godimo ga tšohle, Moretwa wa mehleng le mehla. Amen.

₆Ge ke realo, ga se gore lentšu la Modimo le padile. Ke go re ba ba tšwago go Isiraele ga se Baisiraele ka moka ga bona. ₇Le gona ga se bana ba Aborahama ka moka ga bona; ga se peu ya gagwe bohle. Hleng go kile gwa thwe: Peu ya gago e tlo bitšwa ka Isaka. ₈Ke ra bao e lego bana ba gagwe ka nama, ga se bona bana ba Modimo; ba ba thwego Peu, ba bana ke kholofedišo. ₉Lentšu la kholofedišo ke lela la go re: Išago pakeno ke tlo boa; me Sara mosadi wa gago o tlo ba a na le ngwana wa lesogana.

₁₀Gomme ga se fao fela, le ka Rebeka di bile bjalo a le moima ka yena Isaka tata wešo. ₁₁Bana mola ba sešo ba belegwa, ba sešo ba dira botse le bobe, go bile bjalo, gore morero wa Modimo wa go itlhaolela o tie, e se be go ya ka mediro ya motho, e be se se tšwago pelong ya yena Mmitši. ₁₂Rebeka a botšwa gore: Mogolwane o tlo hlankela monnagwe. ₁₃Bjalo ka ge go ngwadilwe gwa thwe: Nna ke rata Jakobo; ge e le Esau ke mo tšwile.

₁₄Bjale re tlo reng? A ke go re mo go Modimo go na le go se loke? -- Ga go byalo. ₁₅Gobane o boletše le Moshe a re: Botho ke bo direla yo ke ratago go mo dira ka botho; mme ke gaugela yo ke mo gaugelago. ₁₆Ke gona, ga di diatleng tša motho e a rego: ke a rata, goba: ke a kitimela; di diatleng tša Modimo ge a gaugela motho. ₁₇Gobane lengwalo ge le ra Farao le re: Ke go beile gore ke bontšhe maatla a ka ka wena; gore leina la ka le bolelwe lefaseng ka moka. ₁₈Šedioge, o gaugela yo a ratago go mo gaugela; o retetša yo a ratago go mo retetša.

₁₉Bjale o tlo fetola wa re: Motho a sa beelwang molato? Gobane se Modimo a se ratago se ka šiteletšwa ke mang? ₂₀Aowii! O mang, wena motho, ge o re o ka sekiša Modimo? A sebopša se ka botšiša mmopi wa sona sa re: O be o reng ge o ntira selo se se bjalo? ₂₁A ga se mmopi e a laolago letsopa, sebja se se tumišwago le se se nyatšegago a di bopa ka letsopa le tee?

₂₂Bjale, ge Modimo a ratile go bonagatša bogale bja gagwe le go tsebatša maatla a gagwe, ke gore dibja tšeo tša go bonagatša bogale ka tšona, tše di diretšwego go senyega, o di neneketša ka pelotelelele. ₂₃A ga se gore a bonagatše lehumo la letago la gagwe ka dibja tšeo tša go bonagatša kgaugelo, tše a di lokišeditšego go tlo išwa letagong? ₂₄Ke borena bao, ba re biditšwego ke yena; a se bitše Bajuda fela, a bitša le bantle. ₂₅Ke tšona tše a di bolelago ka Hosea a re: Setšhaba sa Gasebaka ke tlo re: O setšhaba sa ka; Moseratwe ka re ke Moratwa. ₂₆Mo go bego go thwe, ga se setšhaba sa ka, ba tlo thwe: Ke bana ba Modimo a phelago. ₂₇Gomme Jesaya a hlaboša lentšu a era Baisiraele a re: Le ge setšhaba sago, wena Isiraele, se atile walešabašaba la lewatle, ba ba tlogo boa ke tšhalela fela. ₂₈Gobane Morena, tše a di boletšego, o tlo di dira a di phetha a di hlatlamanya ka toko mo lefaseng. ₂₉Jesaya o di boletše di sešo tša ba gona, a re: Go Morena wa mašaba a ka be a se re šiele mašalela a sego nene, re ka be re etša Sodomo, re ka be re dirilwe tša Gomora.

₃₀Re tlo reng bjalo? Re tlo re: Bantle ba ba bego ba sa phegelele toko; ba hweditše toko ka tumelo. ₃₁Ge e le Baisiraele, bona ba bego ba phegelela Molao wa toko, ga ba ka ba o fihlela, Molao woo. ₃₂Ba šitišitšwe ke eng? Ke ka gobane ba sa ka ba o phegelela ka tumelo; ba lekile ka mediro ya Molao, ba tla ba kgopša ke lebje la sekgopi. ₃₃Bjalo ka ge go ngwadilwe gwa thwe: Ke nna ke beago lebje la sekgopi, lewa la go ba wela. Fela, e a mo dumelago a ka se lewe ke dihlong.