BAROMA 10

₁Bana bešo! Se pelo ya ka e se llelago, se ke ba kgopelelago sona go Modimo, ke gore bona Baisiraele ba phološwe. ₂Gobane nna nka ba hlatsela ka re ba fišegetšwe Modimo; fela, ba hloka temogo. ₃Ba ganne go bušwa ke toko ya Modimo, ka ge toko yeo ya Modimo ba sa e tsebe, ka go rata go ipeela toko ya bona ka noši. ₄Gobane Kriste ke yena phetšo ya Molao, gore toko e be ya bohle ba ba dumelago.

₅Moshe yena o ngwadile tša toko e tlago ka Molao, ye e rego: ge motho a dira ka mo o bolelago, a phela ka wona. ₆Ge e le toko e tlago ka tumelo e re: Se bolele pelong ya gago wa re: Legodimong go tlo rotogela mang, e ka ba go re: a yo fološa Kriste; ₇se bolele wa re: Moleteng go tlo fologela mang, e ka ba go re: a yo rotoša Kriste bahung. ₈Toko e tlo reng? E tlo re: Lentšu le le fa kgauswi le wena, le fa molomong wa gago, le mo pelong ya gago. Ke lona lentšu la tumelo, le rena re le kwatšago. ₉Gobane ge o ipolela ka molomo wa re: Jesu ke yena Morena, wa realo o dumela ka pelo gore Modimo o mo tsošitše bahung, gona o tlo phološwa. ₁₀Gobane motho o dumela ka pelo a tsebo lokafala; o ipolela ka molomo a tsebo phološwa. ₁₁Hleng lengwalo le re: E a dumelago a ka se lešwe dihlong. ₁₂Ga go hlaolwe Mojuda goba Mogerika. Morena wa bohle ke o tee, e a humilego wa go kgona go nea bohle ba ba mmitšago. ₁₃Gobane go thwe: Ba go tlo phološwa ke ba ba bitšago ina la Morena.

₁₄Gomme bjale ba tlo bitša bjang ge ba sešo ba mo dumela? Ba tlo dumela bjang ge ba sešo ba mo kwa? Ba tlo kwa bjang, ge go se segoeledi? ₁₅Gomme ba ka goelela bjang ge ba sa rongwe? Ke tšona tše di ngwadilwego gwa thwe: A ratega bjang maoto a motseta wa ditaba tše botse! ₁₆Fela, ba go kwa ditaba tše botse e be e se bohle. Le Jesaya o re: Ke mang a dumetšego taba tše re di begago? ₁₇Etse tumelo e tšwa go kweng; mme go kwa go tla ka lentšu la Modimo.

₁₈Bjale ke re: A ga ba ešo ba le kwa? Ba le kwele. Kgowane ya tšona e tšwetše lefase ka moka, le kua mafelelong a lona go kwala polelo ya tšona. ₁₉Gomme ke re: A Baisiraele ga ba di tsebe? Moshe o thomile go di bolela a re: A nke le nna ke ba rumole ka se e sego setšhaba, ke ba hlohle ka setšhaba sa bošilo. ₂₀Jesaya a tla a beta pelo a re: Ba ba bego ba sa nnyake, ke re a ba nkhwetše; setšhaba se se bego se sa rapele ina la ka, ke bolela naso ke re; Ke nna e! ₂₁A tla a bolela Isiraele a re: Ke hlwile ke emiša atla tša ka ka baka la setšhaba sa dinganga sa go ya ka maithatelo.