Moya wa bophelo, wa bjana, wa thapelo, wa kholofelo e fenyago
1Bjale gomme ga go sa na go lahlwa go ba e lego ba Jesu Kriste, ba ba lahlilego tsela ya nama, ba upša ba ya ka ya Moya. 2Gobane molao wa Moya wa go phela ka Kriste Jesu o nkhunolotše molaong wa sebe le wa lehu. 3Gobane se se šitilego Molao ka ge o fokodišwa ke nama. Modimo o se phethile ka go roma Morwa wa gagwe ka sebopego sa nama ya sebe, gore sebe sa nameng se ahlolelwe go lahlwa; 4Gore re phethegelwe ke tshwanelo, ge re lahla tsela ya nama, ra upša ra ya ka ya Moya. 5Gobane ba nama ba nyaka tša nama; ba moya ba nyaka tša Moya. 6Gobane nama e inyakela lehu; Moya o inyakela bophelo le khutšo. 7Nama ge e nyaka tša yona e lwa le Modimo, ka gobane ga e rate go bušwa ke Molao wa Modimo, etse go sa kgonege. 8Ba e lego baganama ga ba kgone go kgahla Modimo.
9Ge e le lena ga le baganama, le bagaMoya, ge Moya wa Modimo o agile le lena. Fela, motho e a se nago Moya wa Kriste, ga se motho wa Kriste. 10Ge Kriste a le mo go lena, gona sa mmele ke go hwa ka baka la sebe; sa moya ke go phela ka tokafalo. 11Gomme ge mo go lena go agile Moya wa yoo a tsošitšego Jesu bahung, gona le mebele ya lena ya go hwa e tlo phedišwa ke yenayo a tsošitšego Kriste Jesu bahung ka wona Moya woo wa gagwe o agilego mo go lena.
12Ke gona, bana bešo, ga re batlengwa ba nama ba go thwe re phele ka mophelelo wa yona. 13Gobane ge le ya ka wona mophelelo wa nama, sa lena e tlo ba go hwa; gomme ge maitirelo a nama le a bolaya ka Moya, gona le tlo phela. 14Gobane bana ba Modimo ke bao bohle ba ba išwago ke Moya wa Modimo. 15Gobane ga La ka la fiwa moya wa bohlanka wa gore le boele le boife; Le filwe moya wa go ba bana, woo, ge re na le wona, ra hlaboša mantšu ra re: Baba! Tata! 16Moyamokgethwa yena mong ke hlatse ya go kwana le moya wa rena, hlatse ya go re re bana ba Modimo. 17Bjale, ge re le bana, gona re baji ba bohwa, baji ba bohwa ba Modimo, ba go ja bohwa le Kriste; gobane re tlo ba re tlo kgona go fiwa letago le yena.
18Nna ge ke eleletša ke re: ditlaišego tša mehla yeno ga di a swanela le go ka bapetšwa le letago le le tlogo utollwa le le mo go rena. 19Le yona tlhologelo ya dibopša ke go letela kutollo yeo ya bana ba Modimo. 20Gobane dibopša di imelwa ke lona lefela di sa le rate: di na le e a di rwešitšego; 21e le gore go be le kholofelo ya gore le tšona dibopša di tlo hunollwa bohlankeng bja tshenyego, di be le tokologo ya ge bana ba Modimo ba eya letagong. 22Hleng re tseba gore dibopša ka moka le tšona di sa fegelwa, le tšona di sa šokwa. 23Gomme ga se tšona fela; le rena beng ba go ba le dithakangwaga tša Moya, re sa letetše bokgomana, tokollo ya mebele ya rena. 24Re baphološwa ka kholofelo. Seholofelwa ge se bonagetše, gona ga go sa le yona kholofelo; gobane se motho a se hweditšego ga a sa re ke se letetše. 25Ge seholofelwa sa rena re sešo ra se hwetša, gona re se letela re sa fele pelo.
26Ge go le bjalo, le wona Moya o re hlatlola phokolo; gobane rena ga re tsebe se re kago se kgopela; le mokgwa wa go kgopela ga re o tsebe. Ke wona Moya o re rapedišago ka diphegelo tše di šitago molomo. 27Mme yena Mofetlekapelo o tseba kelelo tša moya, a kgono emela bakgethwa ka mokgwa o kgahlago Modimo.
28Re tseba gore mo go ba ba ratago Modimo dilo tšohle di diriša go ba iša go tše botse, ba e lego babidiwa ka morero. 29Gobane ba a bego a ba tseba o ba hlaotše gore ba tle ba swane le lebopo la Morwa wa gagwe, gore yena Morwamogolo e be wa go tlo hlatlangwa ke bana babo ba bantši. 30Ba a bego a ba hlaotše, ke bona a ba biditšego. Ba a ba biditšego, o ba lokafaditše. Ba a ba lokafaditšego, o ba file letago.
31Bjale ditaba tše re tlo di reng? Modimo ge a na le rena re sa tlo siteletšwa ke mang? 32Yena, e a sa kago a tsebafa Morwa wa gagwe wa ruri, a mo gafa ka baka la rena ka moka, a ka lesa bjang go re nea tšohle ka yena! 33Bakgethwa ba Modimo ba sa tlo bewa molato ke mang? Modimo o ba dirile ba ba lokilego. 34Ke mang a kago ba lahla? Jesu Kriste šo, e a hwilego; gomme se se fetago seo ke ge a tsogile bahung, ke ge a le ka letsogong le letona la Modimo mme a re rapelela. 35Ke mang a kago re aroganya le lerato la Kriste? A e ka ba tlaišo, goba tlalelo, goba go hlomarwa, goba tlhobolo, goba kotsi, goba lerumo? 36Bjale ka ge go ngwadilwe gwa thwe: Ge re bolawa, ge re sengwa dinku tša go hlabja, re bolaelwa wena mehla yohle. 37Fela, ge re le mo go tšeo tšohle, re šetše re fentše moka ka eo a re ratilego. 38Nna ke kgodilwe ruri: Ga go se se kgonago go re aroganya le lerato la Modimo, e ka ba lehu goba bophelo, e ka ba barongwa goba magoši, le ge e ka ba tša mehleng ya bjale, goba tše di sa tlo go tla, le ge e le maatla mang. 39Le ge e ka ba tša kua godimong, goba tša kwa tlase, le sebopšamang, ga go se se kgonago go re aroganya le lerato la Modimo le lego mo go Jesu Kriste Mong a rena.
