JOSHUA 21

₁Gwa batamela bagolo ba Balefi, ba tla go Eleasara moperisita le go Joshua morwa wa Nuni le go bagolo ba meloko ya Baisiraele. ₂Ba bolela le bona ba le Silo nageng ya Kanana ba re: Morena o laetše Moshe a re, rena re fiwe metse ya go dula, le mafulo a yona a diruiwa tša rena. ₃Gomme Baisiraele ba nea Balefi metse le mafulo a yona mo nageng tša bona, ba dira ka mo Morena a laetšego ka gona.

₄Tengwa la Bakahathe la tšwa le metse e lesome le metšo e meraro ya Balefi ba leloko la Arone mo nageng ya Juda le ya Benyamini. ₅Ba bangwe ba leloko la Kahathe ba newa metse e lesome ka tengwa mo nageng ya Baefuraimi le ya Badani le ya Bamanase.

₆Ba leloko la Gerisone ba newa metse e lesome le metšo e meraro mo nageng ya Baisashara le ya Baasere le ya Banafutali le ya Bamanase ba seripa sa kwa Basani.

₇Ba leloko la Merari ka dilete tša bona ba newa metse e lesome le metšo e mebedi mo nageng ya Barubeni le ya Bagada le ya Basebulone.

₈Metse yeo le mafulo a yona Baisiraele ba a neile Balefi ka go dira matengwa, ka mo Morena a bego a laetše Moshe.

₉Mo go leloko la Juda le la Simeone ba ntšhitše metse, ba e botša ka maina a yona, ₁₀Ya ba ya Baarone ba leloko la Kahathe ba Balefi, ka gobane tengwa la pele e be e le la bona. ₁₁Ba ba nea motse wa Araba tatago Enaki, e lego wa Heburone, dithabeng tša Juda le mafulo a a o dikologago. ₁₂Ga e le mašemo a motse woo le metsana ya gona e be e neilwe Kalebe morwa wa Jefune ya ba magae a gagwe.

₁₃Barwa ba Arone moperisita ba neilwe motse wa Heburone, ya ba wa setšhabelo sa babolai, le wa Libina le mafulo a wona, ₁₄le wa Jathiri le mafulo a wona, le wa Esithemoa le mafulo a wona, ₁₅le wa Holoni le mafulo a wona, le wa Debiri le mafulo a wona, ₁₆le wa Ajima le mafulo a wona, le wa Juta le mafulo a wona, le wa Bethe-Semese le mafulo a wona. Ke metse e senyane ya meloko e mebedi yeo. ₁₇Mo go ya leloko la Benyamini ba ntšha motse wa Gibeoni le mafulo a wona, le wa Geba le mafulo a wona, ₁₈le wa Anathothe le mafulo a wona, le wa Alamone le mafulo a wona. Ke metse e mene. ₁₉Metse ya ba leloko la Arone, baperisita, ya ba e lesome le metšo e meraro yeo, metse le mafulo a yona.

₂₀Ba meloko ya Bakahathe ba Balefi, e lego ya barwa ba bangwe ba Kahathe, bona ba newa ya bona ka tengwa mo go Baefuraimi. ₂₁Ba newa motse wa Sikeme, ya ba motse wa setšhabelo sa babolai, le mafulo a wona mo dithabeng tša Efuraimi, le wa Jasere le mafulo a wona, ₂₂le wa Kibitsaima le mafulo a wona, le wa Bethe-Horoni le mafulo a wona; ya ba metse e mene. ₂₃Mo go Badani ba newa wa Eletheke le mafulo a wona, le wa Gibethoni le mafulo a wona, ₂₄le wa Ajaloni le mafulo a wona, le wa Gathi-Rimoni le mafulo a wona; ya ba metse e mene. ₂₅Mo go seripa sa Bamanase ba newa wa Thaanake le mafulo a wona, le wa Gathi-Rimoni le mafulo a wona; ya ba metse e mebedi. ₂₆Metse ka moka ya ba bangwe bao ba moloko wa Kahathe ke e lesome le mafulo a yona.

₂₇Mo go seripa se sengwe sa Bamanase gwa newa Bagerisoni ba Balefi; ba newa motse wa Golane wa kua Basani, ya ba setšhabelo sa babolai, le mafulo a wona, le wa Besethera le mafulo a wona; ya ba metse e mebedi. ₂₈Mo go Baisashara ba newa wa Kisijoni le mafulo a wona, le wa Dabarathe le mafulo a wona, ₂₉le wa Jaramuthe le mafulo a wona, le wa Enganima le mafulo a wona; ya ba metse e mene. ₃₀Mo go Baasere ba newa wa Misaele le mafulo a wona, le wa Abadoni le mafulo a wona, ₃₁le wa Helekathe le mafulo a wona, le wa Rehobo le mafulo a wona; ya ba metse e mene. ₃₂Mo go Banafutali ba newa motse wa setšhabelo sa babolai, wa Kedese mo go la Galilea le mafulo a wona, le wa Hamothe-Doro le mafulo a wona, le wa Karethane le mafulo a wona; ya ba metse e meraro. ₃₃Metse ka moka ya Bagerisone ka dilete tša bona ya ba e lesome le metšo e meraro le mafulo a yona.

₃₄Ba bangwe ba leloko la Bamerari ba Balefi ba neilwe metse mo go leloko la Basebulone, wa Jokoneama le mafulo a wona, le wa. Karetha le mafulo a wona, ₃₅le wa Dimina le mafulo a wona, le wa Nahalale le mafulo a wona; ya ba metse e mene. ₃₆Mo go Barubeni ba newa wa Betsere le mafulo a wona, le wa Jatsa le mafulo a wona, ₃₇le wa Kedemothe le mafulo a wona, le wa Mefaathe le mafulo a wona; ya ba metse e mene. ₃₈Mo go Bagada ba newa wa Ramothe-Gileada, motse wa setšhabelo sa babolai, le mafulo a wona, le wa Mahanaima le mafulo a wona, ₃₉le wa Hesiboni le mafulo a wona, le wa Jaesere le mafulo a wona; ka moka ya ba metse e mene. ₄₀Metse ka moka ya Bamerari ka dilete tša bona, ya ba ba šetšego ba leloko la Lefi, ye ba e neilwego ka go direlwa matengwa, e be e le e lesome le metšo e mebedi.

₄₁Metse ka moka ya Balefi ya mo dinageng tša Baisiraele e be e le metse e masome a mane a metšo e seswai le mafulo a yona. ₄₂O mongwe le o mongwe wa metse yeo o na le mafulo a wona a o dikologago. Go metse yeo ka moka go be go le bjalo.

₄₃Morena o neile Baisiraele naga ka moka ye a kilego a ena a rera botatabo a re o tlo ba fa yona; ba e tšea ba dula mo go yona. ₄₄Morena a ba khutšiša ka thoko tše go fela, a dira tšohle tše a di enetšego botatabo. Ge ba fihla go be go sa eme le o tee wa manaba a bona. Manaba a bona ka moka Morena o a gafetše diatleng tša bona. ₄₅Ga go a hlaela le setee sa tše botse ka moka tše Morena a di boditšego ba setšhaba sa Isiraele; ka moka di be di tšweletše.