JOSHUA 20

₁Morena a bolela le Joshua a re: ₂Botša Baisiraele o re: Fa ga geno beang metse ya go tšhabela, yeo ke le boditšego tša yona ka Moshe. ₃Gore, ge motho a bolaile motho a sa dira ka boomo le ka maano, a tšhabele gona. E be setšhabelo sa lena ge le tšhaba molefeletšamadi. ₄E a tšhabelago motseng o mobjalo a eme mojako wa kgoro, a bege taba ya gagwe go bagolo ba motse woo, ba tle ba mo amogele gagabo, ba mo nee sebaka a dule le bona. ₅Molefeletšamadi ge a ka mo šala morago, ba se ke ba mo gafela mmolai eo, ka gobane o bolaile wa gabo a sa tsebe, a sa ka a mo hloya. ₆Motho eo a dule motseng woo go fihla ge a tlo bewa pele ga phuthego a sekišwa, a dule go fihla ge moperisita e mogolo wa mehla eo a hwile; e be mo mmolai eo a boelago gae ngwakong wa gagwe, motseng wola a tšhabilego go wona.

₇Ba kgetha motse wa Kedese wa nageng ya Galilea wa dithabeng tša Nafutali, le motse wa Sekeme wa dithabeng tša Efuraimi, le motse wa Kiryathe-Araba e lego wa Heburone wa dithabeng tša Juda. ₈Mošola wa Jorodane ka thoko ya bohlabela bja Jeriko ba ntšha motse wa Betsera wa kua lešokeng molaleng wa ba ga Rubeni, le motse wa Ramothe wa nageng ya Gileada ya ba ga Gada, le motse wa Golani wa nageng ya Basani ya ba gaManase. ₉Ke yona metse ye e beetšwego Baisiraele ka moka le ba ba kago diilela go bona, gore e a kago bolaya motho a sa dira ka boomo, a se ke a bolawa ke molefeletšamadi, a sešo a ema pele ga phuthego.