JOSHUA 22

₁Ya ba gona Joshua a biditšego Barubeni le Bagada le seripa sela sa Bamanase, ₂A ba rera a re: Le phethile tšohle tše Moshe mohlanka wa Morena a le laetšego tšona, gomme le dirile tšohle ka mo nna ke bego ke le laela ka gona. ₃Ga la ka la ba la tlogela babolena mehleng e mentši ye go fihla lehono. Le hlokometše ditaelo tša Morena Modimo wa lena. ₄Bjale, ka gobane Morena Modimo wa lena o khutšišitše bana ba bolena ka mo a ba boditšego ka gona, lena bjale boelang magaeng a lena kua nageng ya gabolena ye Moshe mohlanka wa Morena a le neilego yona kua mošola wa Jorodane. ₅Fela, le tiiše go hlokomela gore le dire ka melao ye Moshe mohlanka wa Morena a le leatšego yona, le rate Morena Modimo wa lena, le sware ka ditsela tša gagwe, le mo gomarele, le mo hlankele ka pelo ka moka le ka moya ka moka. ₆Joshua a ba šegofatša, a ba lesa ba boela magaeng a bona. ₇Ba seripa sa leloko la Bamanase Moshe o be a ba agišitše kua nageng ya Basani; ba bangwe Joshua a ba agiša le magagabo ka mošono wa Jorodane thoko ya bodikela. Bjale Joshua a laelana le bona ge ba boela magaeng, a ba šegofatša, ₈mme a ba rera a re: Le boela magaeng a lena le na le mahumo a mantšintši, le disilifera, le digauta, le mefiri, le tshipi, le diaparo tše ntšintši; bjale hlallelang bana ba bolena dithebola tša manaba a lena.

₉Barubeni le Bagada le seripa sa Bamanase ba tlogelana le Baisiraele gona moo Silo nageng ya Kanana, ba ya kua nageng ya Gileada magaeng a bona a ba a filwego ke Moshe ka taelo ya Morena.

₁₀Ya re ge ba fihla mo dirotheng tša nokeng ya Jorodane, tše di lego mo nageng ya Kanana, gona moo Barubeni, le Bagada, le seripa sa Bamanase ba aga aletare mo nokeng ya Jorodane, aletare e kgolo kgakala. ₁₁Bjale Baisiraele ge ba ekwa gore Barubeni le Bagada le seripa sa Bamanase ba agile aletare e lebanego le naga ya Kanana mo dirotheng tša kua nokeng ya Jorodane, aletare ye e okametšego Baisiraele. ₁₂Baisiraele ba re go di kwa, phuthego ka moka ya bokana Silo, gore ba ba tšwele dira.

₁₃Baisiraele ba roma Pinease morwa wa Eleasara moperisita, a ya go Barubeni le go Bagada le go seripa sa Bamanase kua nageng ya Gileada, ₁₄a ya a na le bagolo ba lesome, go ya ka palo ya meloko ka moka ya Isiraele, leloko la ntšha o tee o tee yo e lego e mogolo mo molokong wa gabo le go madira a Isiraele. ₁₅Ba fihla go Barubeni le go Bagada le go ba seripa sa Bamanase kua nageng ya Gileada, ba bolela le bona ba re: ₁₆Phuthego ya Morena ka moka e re: Le reng le hlala Modimo wa Isiraele ka mokgwa wo? A le lahla Morena lehono ka go ikagela aletare? A le hlanogela Morena lehono? ₁₇A le re bokgopo bja Peoro e be e le molato o monyenyane, bjo le lehono re sešogo ra bo hlatswiwa, bjo bo kilego bja hlolela phuthego kotlo ya Morena? ₁₈Gomme lena le lahla Morena lehono. Gomme lehono ge le hlanogela Morena, o tlo tloga a galefela phuthego ka moka ya Isiraele. ₁₉Ge e ka ba le re naga yeno ya geno e tšhilafetše, gona selelang nageng e lego yona ya Morena, mo go lego Ntlo ya Morena, gore le rena le se re hlanogele ka go ikagela aletare e šele, mola aletare ya Morena Modimo wa rena e le ntshe. ₂₀Naa mohla wola Akane a utswa segafiwa, kgalefo ga ya ka ya wela phuthego ka moka ya Isiraele ka yena monna o tee? Naa ga a senyegela bokgopong bja gagwe?

₂₁Ke mo Barubeni le Bagada le ba seripa sa Bamanase ba fetotšego, ba laodišetša bagolo ba madira a Isiraele, ba re: ₂₂Morena ke yena Modimodimo. Morena yena Modimodimo o a tseba, gomme le Isiraele a a tsebe: Ge e ka ba go hlanoga go hlala Morena, gona lehono o se ke wa re phediša. ₂₃Ge e ka ba re ikagetše aletare gore re hlale Morena, gore e be ya go bea dihlabelo le dibego le ya didimo tša dileboga, gona yena Morena a a late molato woo wa rena. ₂₄Aowa hle! Modiro woo re o dirišitšwe ke pelaelo ya go re: Ka moso bana ba lena ba ka rera bana ba rena ba re: Le ne taba mang le Morena Modimo wa Isiraele? ₂₅Ba ka re: Morena o beile noka ya Jorodane ya ba mollwane wa go re aroganya le lena Barubeni le lena Bagada. Fa go Morena ga go se e lego sa lena. -- Mme ra re: Bana ba lena ba ka thibela bana ba rena go boifa Morena. ₂₆Ra re se re swanetšego go se dira ke go ikagela aletare, e se ya dihlabelo le ya didimo; ₂₇E be hlatse mo gare ga rena le lena, mo gare ga ditlogolo tša rena tša mehleng e tlago, hlatse ya go re eletša gore re direle Morena ka go tla pele ga gagwe ka dihlabelo tša rena le ka dibego tša rena; e se re ka moso bana ba lena ba rera bana ba rena ba re: Fa go Morena ga go se e lego sa lena. ₂₈Mme ra re: Ge ka moso ba ka rera rena le ge e le ditlogolo tša rena ba realo, gona re tlo re: Lebelelang moago wa aletare yeo ya Morena ye e dirilwego ke botatawešo, e sego ya go bea dihlabelo le didimo, e le ya go ba hlatse mo gare ga rena le lena. ₂₉Go hlanogela Morena le ge e le go hlala Morena di kgole le rena. Re ka aga bjang aletare ya dihlabelo le ya dibego le ya didimo, mola aletare ya Morena Modimo wa rena e le gona pele ga Ntlo ya gagwe!

₃₀Ya re ge Pinease moperisita, le bagolo ba phuthego, le balaodi ba madira ba Isiraele ba ba bego ba na nae, ge ba ekwa mantšu a boletšwego ke Barubeni le Bagada le Bamanase, ba kgahlwa ke ona. ₃₁Pinease morwa wa Eleasara moperisita a rera Barubeni le Bagada le Bamanase a re: Lehono re lemoga gore Morena o mo go rena; ka gobane tše le di dirilego e be e se go hlala Morena. Bjale le namoletše Isiraele seatleng sa Morena.

₃₂Gomme Pinease morwa wa Eleasara moperisita le ba bagolo ba tloga mo go Barubeni le Bagada nageng ya Gileada, ba boela nageng ya Kanana go Baisiraele, ba ba tlela le phetolo yeo. ₃₃Taba yeo ya kgahla Baisiraele, mme ba reta Modimo, ba se ke ba hlwa ba bolela tša go ba tšwela dira le go šwalalanya naga yela ye e dutšwego ke Barubeni le Bagada.

₃₄Barubeni le Bagada ba rea aletare yeo leina, ba re ke “Hlatse” mo go rena ya go re Morena ke yena Modimo.