JAKOBO 4

₁Dintwa le diphapang gare ga lena di tšwa kae? Mo di tšwago gona šefa: A ga se dikganyogong tša lena di lošanago mo dithong tša lena? ₂Le a duma, la napa la hloka; le a bolaya mme le a galefa, la šitwa go fihlela selo; Le a katana mme le a hlabana, mme le se tšee selo ka ge le sa rapele. ₃Le a rapela, mme ga le fiwe selo, ka ge le rapela ka mokgwa o mobe, le kgopela tše le ratago go di tšitlanya le eya le dikganyogo tša lena. ₄Lena diotswa tenang! A ga le tsebe gore lerato la lefase ke go direla Modimo bonaba? E a ratago go gwerana le lefase, o itira lenaba la Modimo. ₅A le re Mangwalo a bolela lefela? Moya wo o agilego mo go rena o hlologetšwe wa lehufa. ₆O re setša ka kgaugelo ye e fetišago, gobane go thwe: Modimo o lwa le baikgodiši; ba go ikokobetša o ba setša ka dikgaugelo.

₇Lobang ge le bušwe ke Modimo; Le lwe le diabolo, mme o tlo le tšhaba. ₈Batamelang Modimo, le yena a le batamele. Hlapang diatla, lena Badiradibe! Hlapišang dipelo, lena ba pelopedi. ₉Iponeng bobotlana, le hlokofale le lle. Ditšhego tša lena a di fetoge nyamo; thabo ya lena e fetoge tlhokofalo. ₁₀Ikokobetšeng pele ga Morena; ke mo a tlogo le godiša.

₁₁Le se ke la pharana, bana bešo! E a pharago ngwanabo, e a solago ngwanabo, o nyatša Molao, o sola Molao. Gomme ge o sola Molao, ga o modiri wa Molao, o mosodi wa wona. ₁₂Mmei wa Molao ke o tee; Mosodi ke yena. Ke yena a kgonago go phološa le go fediša. Mme o mang, wena o solago?

₁₃Eriyeng, lena ba le rego: Lehono, le ge e le ka moswana, re tlo ya motseng wa bokete, ra yo dula gona ra fetša ngwaga, ra šaba ra rua. ₁₄Le realo le sa tsebe tša ka moswana. Le gona bophelo bja lena ke eng? E fo ba kgodi ye e bonalago lebakanyana fela ya tloga e široga. ₁₅Go kaone ge le ka re: Ge Morena a rata ra phela, re tla dira tše le tšela. ₁₆Gomme bjale le kgantšha boikgogomošo. Boikgantšho bjoo ke bjo bobe ka moka ga bjona.

₁₇Bjale, motho e a tsebago botse bjo a kago bo dira, mme a se bo dire, o oba molato wa sebe.