JAKOBO 5

₁Eriyeng, lena bahumi! Llang le golole ka baka la ditlhokofalo tše di tlogo le wela godimo. ₂Mahumo a lena a bodile. Dikobo tša lena di llwe ke tshwele. ₃Gauta ya lena le silifera ya lena di llwe ke makgalwa; gomme makgalwa a tšona a tlo le bega; a tlo tšhuma mebele ya lena bjalo ka mollo. Le kgobetše mahumo mehleng ya bofelo. ₄Tsebang gore moputso wo le o kunnego badiri ba go le bunela mašemo a lena o a goeletša; mme dillo tša babuni di fihlile ditsebeng tša Morena wa mašaba. ₅Le ipheletše lefaseng ka mabose le ka maipshino; le horišitše dipelo tša lena boka mohla go hlabilwe kgomo. ₆Moloki le mo tšwile la mmolaya, yena a sa lwe le lena.

₇Bana bešo! Le se feleng pelo Morena a be a fihle. Bonang molemi ge a letela dienywa tše di rategago tša lefase, ga a di felele pelo, tša ba tša fiwa pula ya tsheola le ya selemo. ₈Le lena se feleng pelo. Tiišang dipelo tša lena, gobane go tla ga Morena go kgauswi.

₉Le se ke la tsotana, gore le se tlo sekišwa; le tsebe gore Moahlodi o eme mojako. ₁₀Tšeang ka mohlala wa baporofeta ba ba boletšego ka Leina la Morena, mohlala wa go kgotlelela le wa go se fele pelo. ₁₁Hleng re re: Ba lehlogonolo ke bakgotleledi! Kgotlelelo ya Jobo le e kwele. Pheletšo ya Morena le e bone; gobane Morena ke wa dikgaugelo tše ntši, ke yo pelotlhomogi.

₁₂Se segolothata, lena bana bešo, le se ke la ena, le ge e le ka legodimo, le ge e le ka lefase, le ge e le ka keno ye nngwe. “E” ya lena a e be “E”; “aowa” ya lena a e be “aowa”, gore le se tlo sekišwa.

₁₃Ge e mongwe wa lena a le mahlokong, a rapele. Ge e mongwe a thabile, a opele difela. ₁₄Ge e mongwe wa lena a babja, a bitše bagolo ba phuthego, ba tle ba mo rapelele ba mo tlodiše makhura leineng la Morena. ₁₅Mme thapelo ya tumelo e tlo phološa molwetši. Morena o tlo mo tsoša; ge a dirile dibe o tlo lebalelwa. ₁₆Ipoleleng sebe seng sa lena; le rapelelane gore le fodišwe. Thapelo e maatla ya moloki e kgona go dira tše kgolo. ₁₇Eliya e be e le motho e a fokolago boka rena; gomme o kile a rapela a re pula a e se ke ya na; mme gwa feta nywaga e meraro le dikgwedi tše di seletšego go sa ne pula lefaseng. ₁₈A boela a rapela, mme legodimo la neša pula, lefase la mediša dienywa tša lona.

₁₉Bana bešo! Ge e mongwe wa lena a ka timela a arogana le therešo, e mongwe a a mmušetše go yona, ₂₀a tsebe gore e a gomišago modiradibe tseleng ye a timetšego ka yona, o phološa moya wa motho eo lehung, mme o apeša bontši bja dibe.