JAKOBO 3

₁Bana bešo, go se ke gwa ata ba ba ratago go ba baruti; Le tsebe gobane ke bona ba ba tlogo sekišwa go fetiša ba bangwe. ₂Re ba go foša gantši ka moka ga rena. Ge go ka ba le e a sa fošego ka leleme, yena eo ke monna yo bolo ka tlalo, e a kgonago go buša mmele wa gagwe ka moka ka mogala. ₃Ge dipitsi re di lokela megala maganong, re direla gore di kwe, re di buše mebele ka moka. ₄Bonang maselawatle, le ge e le a magolo, gomme ge a išwa ke diphefo tše maatla, a bušwa ke lematsana le lenyenyane a išwa mo go ratago mosepediši wa ona. ₅Le leleme ke sethwana se senyenyane, mme le itheta ka tše kgolo.

Bonang mollo o monyenyane o ka tšhuma lesodi le lekaakang? ₆Leleme le lona ke mollo; ke legohle la bokgopo. Leleme mo gare ga ditho tša rena e ba lona le le tšhilafatšago mmele ka moka; le tšhuma mollo tseleng ya bophelo bja rena le tšere mollo wa lona helleng. ₇Ge e le diphoofolo, le dinonyana, le digagabi, le tša lewatleng, ka mo di bopilwego ka gona di a thapišwa, di bile di thapišitšwe ke setho se motho a bopilwego a ne le sona. ₈Leleme lona, mo go batho ga go e a kago kgona go le thapiša; lešaedi leo le padile, le tletše bohlwele bjo bo bolayago. ₉Ka lona re reta Modimo Tata wešo, ka lona re roga batho ba ba bopilwego ya ba seswantšho sa Modimo. ₁₀Molomong o tee go tšwa tšhegofatšo le lehlapa. Bana bešo! Ga go a swanela ge go le bjalo. ₁₁Afa sediba se ka seloga meetse a bose le meetse a babago ka mothopo o tee? ₁₂Bana bešo! A mogo o ka enywa tlhware? A morara o ka enywa mago? Le sediba sa meetse a letswai ga se tšwe meetse a bose.

₁₃Yo bohlale wa tlhaologanyo ke mang mo gare ga lena? O tla bonagala ka mekgwa e botse, le ka mediro ya gagwe, ka bokwala bja mohlale. ₁₄Fela, ge le galakelwa ke mona, le le ba dipelo tša mereba, le se ke la aketša la kgantšha therešo. ₁₅Bohlale bja mohuta woo ga bo tšwe godimo; ke bja lefase ke bja nama, ke bja moyamobe. ₁₆Gobane mo go nago le kgalefo le mereba, ke mo go nago le pherekano le mediro e mebe ka moka. ₁₇Ge e le bohlale bjo bo tšwago godimo, sa pele mo go bjona ke go ila tšhila, sa bobedi ke kgoši le bonolo; bo na le go kwa, bo humile kgaugelo le dikenyo tše botse; ga bo bebe motho, ga bo na bomenetša. ₁₈Peu ya go enywa toko e bjalwa ke badirakhutšo mo go lego khutšo.