Modimo o hlakodiša setšhaba sa gagwe ka kgaugelo
1Bjale yena Mmopi wa gago, wena Jakobo, e a go dirilego, wena Isiraele, o bolela o re: Se boife, gobane ke go lopolotše; ke go biditše ka leina la gago, o wa ka. 2Ge o tsena gara meetse, ke tlo ba le wena; ge o sela dinoka, di ka se ke tša go tšea; ge o phatša mello, o ka se ke wa fsa, o ka se tlabolwe ke kgabo. 3Gobane nna Morena ke Modimo wa gago, nna Mokgethwa wa Isiraele, ke Mophološi wa gago. Ke ntšha naga ya Egipita le ya Kuše le ya Seba, ge ke rekolola wene. 4Ke hwetša o ratega, o le wa thekokgolo. Mme nna ke a go rata, ka ntšha batho le ditšhaba tša go rekolla bophelo bja gago. 5Se boife, nna ke na nago; ba geno ke tlo ba tliša ba etšwa bohlabela; ke tlo ba kgobela ba etšwa bodikela. 6Ke tlo re leboa ke re: Ba ntšhe! Ka ra borwa ke re: Se ba thibele! Tliša barwa ba ka ba tšwe moo kgole, le barwedi ba ka ba tšwe moo magomong a lefase, 7Bohle ba bitšwago ka leina la ka, ba ke ba hlodilego ka ithetiša ka bona, ba ke ba bopilego ka ba dira.
8Tlišang setšhaba se foufetšego, mola mahlo a le gona; go tle ba difoa, hleng ditsebe ba sa na natšo. 9Bantle bohle a ba kgobokane, go bothwe ba merafo. Ke mang wa bona a kgonago go bolela taba ye? A re botše tša bogologolo; ba ntšhe dihlatse tša bona, ba rereše re ba kwe; ba kgone go thwe ba boletše tabataba. 10Morena yena o re: Lena le dihlatse tša ka, le bahlanka ba ka ba ke ba hlaotšego gore le ntsebe, le lemoge gore ke nna, yo go sego modimo yo mongwe pele ga ka, yo go sa tlogo ba le e mongwe morago ga ka. 11Morena ke nna ke nnoši; ga go Mophološi ge e se nna. 12Ke nna ke boletšego tšeo, gomme ka phološa; ka bolela, go se modimo o šele go lena; mme lena le dihlatse tša ka, tša ge ke le Modimo. O realo Morena. 13Le neng le neng ke nna yena e; ka swara, ga go monamoledi; ka dira, go ka nthibela mang?
14Morena Molopolodi wa lena, Mokgethwa wa Isiraele, o re: Ke ka baka la bolena ge ke roma gwa iwa Babele, ge bafaladi ba Kaladea ke ba theošetša go maselawatle, a ba bego ba fadiša ona. 15Ke nna Morena Mokgethwa wa lena, Mohlola Isiraele; ke nna Kgoši ya lena. 16O realo Morena mothulatsela mawatleng mmulammila mo meetsengmagolo. 17Montšhamadira ka mokoloi le dipitsi le makoko a bagale. Ba tekotšwe bohle, ba ka se hlwe ba tsoga, ba kunyelela boka rumola se se timago.
18Lebalang tša kgale; le se šetše tše di fetilego. 19Ke nna e! Ke dira tše mpsha, di šetše di tšwelela; a ga le di bone? Ruri, ke tlo thula tsela lešokeng le dinoka mo nageng e tshehla. 20Diphoofolo tša lešoka di tlo ntheta, le phukubje le mpšhe, gobane ke tšweletša meetse lešokeng, le dinoka mo nageng e tshehla, gore go nošwe setšhaba sa ka, bahlaolwa ba ka. 21Sona setšhaba se, se ke ipopetšego sona, se tlo mpolela ka direto.
22Ge e le wena Jakobo, ga se wena o mpiditšego, ga wa ka wa itapiša ka nna, wena Isiraele. 23Dikwanyana tša didimo tšago, ga wa ka wa di tlišetša nna. Ga wa ka wa godiša nna ka dihlabelo tša gago; ga nka ka go rwadiša diloba, ga nka ka go lapiša ka ditlolo. 24Ga wa ka wa nthekela diorelo ka tshipi e tshehla; ga wa ka wa nkhoriša ka makhura a didimo tšago. Ruri o ntlholetše modiro ka dibe tša gago, o ntapišitše ka makgopo a gago. 25Ke nna ke phomolago bokgelogi bja gago ke dira ka baka la ka, mme ke se hlwe ke gopola dibe tša gago. 26Nkeletše ge, re sekišane; go bolele wena go bonale ge o se molato. 27Tatago wa mathomo o dirile dibe, mme baetapele bago ba be ba ntlhanogela. 28Nna ka nyatšiša bagolo ba Ntlokgethwa, Jakobo ka mo dira segafiwamoka, Isiraeli a ba segoboga.
