Mohlanka wa Morena o tlo fodiša setšhaba
1Bonang mohlanka wa ka yo ke mo thekgago, yo ke mo hlaotšego, mme pelo ya ka ya mo thabela. Ke beile moya wa ka mo go yena, mme o tlo iša toko go bantle. 2Ga a na lešata, ga a hlaboše lentšu la kwala mekgotheng. 3Lehlaka le le tenegilego a ka se ke a le thokgela ruri; mme lebonenyana le kunyelelago a ka se le timele ruri; mme o tlo tšweletša moahlolelo wa therešo. 4A ka se ke a lapa, a ka se fele maatla, a be a hlome moahlolelo lefaseng, le dihlakehlake di tlo hlologelwa molao wa gagwe. 5Sele lentšu le le boletšwego ke yena Morena, Mohlolalegodimo a le anega, a ala lefase le dimela mo go lona, mme batho ba ba sepelago mo go lona a ba nea mohemo, a ba nea moya. 6O re: Nna Morena ke go bileditše toko; ke swara seatla sa gago. Ke go lota gore ke go dire wa kgwerano ya setšhaba le seetša sa bantle, 7Gore o budulle mahlo a difofu, o lokole ba ba tlemilwego; ba ba dutšego leswiswing o ba ntšhe kgolegong. 8Ke nna Morena, ke lona ina la ka; borena bja ka nka se ke ka bo fa yo mongwe; le go retwa ga ka nka se go neele medimo ya diswantšho. 9Sedi ditaba tša kgale di tšweletše; bjale ke le botša tše mpsha, gore ke le botše tšona di sešo tša tšwelela. 10Hlabelang Morena sefela se sefsa, sereto sa gagwe se kwale se etšwa megomong ya lefase, lena baselawatle le tšohle tše di lego mo go lona, le dihlakehlake le ba ba agilego gona. 11Le lešoka le goloke le metse ye e lego mo go lona, metsana e dutšego Bakedara. Le ba ba agilego dikgageng ba hlaboše mantšu ba le kua godimo ga dithaba. 12A ba hlabe theto tša Morena, ba kwatše sefela sa gagwe dihlakehlakeng. 13Morena o tšwa bjalo ka mogale, o galefile boka mohlabani; o goa a hlaba mokgoši; o gahlana le manaba e le yo bogale.
14E šetše e le kgale ke ikhomoletše ke itše “tuu”, ke kgotlelela bjalo ka mmelegi. Bjale gona ke a bopa, ke a gatakanya. 15Ke galoša thaba le meboto, ke omeletša bjang, noka ke e dira naga, matsha ke a a gopiša. 16Ba difofu ke ba sepediša tsela ye ba bego ba sa e tsebe, ke ba hlahla gona moo. Leswiswi ke le dira seetša pele ga bona; mo go befilego ke a lekellanya. Ke tšona tše ke di dirago; mme nka se di tlogele. 17Ba ba tlogo goma ba lewa ke dihlong ke ba ba botilego diswantšho, ba ba rago dibopiwa ba re: Le medimo ya rena!
18Hee lena difoa, kwang! Lena difofu, gadiang le bone! 19Sefofu ke mang ge e se mohlanka wa ka? Sefofu ke mang e a etšago motseta wa ka yo ke mo romilego? Sefofu ke mang a etša yena mmotegi, a ba sefofu bjalo ka mohlanka wa Morena? 20O bone dilo tše ntši, wa se di hlokomele; le ge o thibolotše tsebe ga wa ka wa kwa selo. 21Morena o rata go godiša thuto, le go e tšhepiša ka baka la toko ya gagwe. 22Le ge setšhaba se thopilwe se hlakotšwe, ba tantšwe mereong ka moka, ba sobetše kgolegong ba tlemilwe, go se monamoledi ge ba thopša, go se e a rego: Ba gomiše! 23Ke mang mo go lena a kwago dilo tše, a hlokomela mme a tseba tše di tlago? 24Ke mang a gafetšego Jakobo diatleng tša bahlakodi, a gafela Isiraele atleng tša ba ba thopago? A ga se yena Morena yo re mo rumotšego, yo ba gannego go swara ka tsela ya gagwe, le go kwa melao yagwe? 25A ba a ba galefela ka mathata a ntwa, a ba tšhuma thoko tšohle; fela, ba se lemoge; le ge ba fišitšwe, ba se di tšee taba.
