Bophelo bjo bofsa bo tlago ka Moya wa Modimo. Lefela la medimo. Bogolo bja kgaugelo ya Modimo
1Bjalo wena Jakobo, mohlanka wa ka kwaa! Le wena Isiraeli ke go hlaotšego. 2Go bolela Morena Mmopi wa gago e a go dirilego mme wa belegwa, yena a go thušitšego, o re: Se boife, Jakobo, mohlanka wa ka, moratwa wa ka yo ke mo hlaotšego. 3Gobane naga ye e nyorilwego ke e tšhela meetse, mo go omilego ke iša dinokana. Peu ya gago ke tlo e tšhela moya wa ka; mahlogeding a gago ke tlo iša tšhegofatšo ya ka. 4Ba tlo hloga ba le gare ga mabjang, boka megokare dinokeng tša meetse. 5Yono o tlo re: Nna ke wa Morena! Yola o tlo ithea leina ka la Jakobo. E mongwe o tlo ngwala ka seatla sagwe a re: Ke wa Morena, a itheta ka la Isiraele. 6Morena Kgoši ya Isiraele, Monamoledi wagwe, Morena wa mašaba, o re: Ke nna wa mathomo, ke nna wa mafelo; ga go Modimo ge e se nna. 7Mokanna ke mang? A a bolele, a re botše, a re hlalošetše tša mola ke hloma setšhaba, ya ba sa neng le neng; a ba botšwe tše di tlago le tše di tlogo direga. 8Se tšhogeng! Se boifeng! A ga se kgale ke le tsebišitše ka le botša ka re: Hlatse tša ka ke bolena! Afa go ka ba le Modimo ge e se nna? Ga go le lengwe lentswe; nna ga ke le tsebe.
9Babetli ba diswantšho ka moka ga bona ke lefela; le matsaka a bona ga a hole selo; le dihlatse tša bona ga di bone selo, ga di tsebe selo; di tlo lewa ke dihlong ka baka leo. 10Modimo, ke mang a kago mmopa? Motho o dira seswantšho se sa holego selo. 11Ruri ba go dirišana dilo tšeo ba tlo lewa ke dihlong; le babetli ba go phala ba bangwe, ge ba ka kgobokana ka moka ga bona, ba tlo ema ba gakanegile ba lewa ke dihlong.
12Morudi o rula selepe, o dira ka magala, o natla ka noto; o se dira ka seatla sagwe se maatla. Ge tlala e mo swara maatla a a fela; ge a sa nwe meetse, o a lapa.
13Mmetli o ela kwata ka lenti, a swaya ka kwadi, a betla ka petlwana a lekanya, a dira motho a swantšha monna, ya ba wa go dula ka ntlong. 14O ithemela kwata ya morokwana, o tšea ya mogobogobo, le ge e le morula, o itlhaolela hlare sa sethokgwa; a ka ba le more wa gagwe wo a o šemilego a nošetša. 15Gomme motho o di dira tša go ora, a hlaola tša sebešo a apea bušwa, e nngwe kwata ya tšona a dira modimo ka yona, a lotšha seswantšho se a se dirilego, a se khunamela. 16Seripa sa yona o se beša mollo, seripa se sengwe e ba sa go beša nama, a ja a hora; se sengwe gape o ora a re: Agaa, ke ikomošitše, ke kwele borutho. 17Kota yela ye e šaletšego a dira modimo ka yona, yona o a e lotšha a e khunamela, a e kgopela a re: Ntlhakodiše, gobane o modimo wa ka!
18Ga ba ne mogopolo; ga ba lemoge selo; ba foufetše mahlo, ga ba bone; ba reteletše dipelo wa go se eletšege. 19Ga ba eleletše, ga go tsebo le temogo ya go kgona go re: Seripa ke se fišitše ka apea bušwa ka magala, ka beša dinama ka ona ka ja; nka tšea bjang seripa se se šaletšego ka se dira seila, ka khunamela kwata ya sehlare?
20Moselatshweding ke moiphorapelo motimedi, ga a iphološe; o šitwa le go re: A ga ka gomarela maaka?
21Hee Jakobo! Hee Isiraele! Se lebale ge o le mohlanka wa ka; ke go bopetše go ntlhankela. Wena Isiraele, nka se go lebale. 22Dikarogo tša gago ke di široša boka leru; dibe tša gago ke di fediša wa meuwane. Boela go nna, gobane ke go lopolotše. 23Hee lena magodimo, hlalalang! Morena o dirile! Hee lena madiba a lefase, gobelang! Hee lena dithaba, hlagišang mekgolokwane le na le masodi a lena le dihlare tšohle tše di lego mo go lena; gobane Morena o lopolotše ba Jakobo, o ithetišitše ka tše a di dirilego Isiraele. 24Morena Molopolodi wago, e a go bopilego wa belegwa, o re: Ke nna Morena Modiralegohle, Mmapalerata ke nna ke nnoši, Moalamafase ke nna ke nnoši. 25Ke nna ke nyatšišago malea a mekome, ke šilofatša ba didupe, ke šiteletša ba bohlale, tsebo ya bona ya ba bošilo. 26Ke nna ke emelago taba ya mohlanka wa ka, ke tšweletša tše batseta ba ka ba di boletšego; ke nna ke bolelago le Jerusalema ke re: Dulwa ke batho! Le metse ya Juda ka re: Agiwang! Ka tsoša marope a yona. 27Ke nna ke bolelago le bodiba ka re: Ka pšheša dinoka tša gago. 28Ke nna ke rago Korese ka re ke modiši wa ka e a tlogo phetha tšohle di nkgahlago ka go bolela le Jerusalema a re: Agiwa! Le Ntlokgethwa a re: Theiwa!
