Mohlanka wa Morena o tlo agiša setšhaba
1Lena dihlakehlake, homolang fa pele ga ka! Ditšhaba a di fiwe maatla a mafsa, di batamele di bolele, re sekišane re le mmogo. 2Ke mang a tsošitšego motšwabohlabela, yo lenao le amanago le go loka? Ke mang e a mo gafetšego ditšhaba le dikgoši a di fenya, tša etša lerole ka rumo la gagwe, tša ba moko ka bora bja gagwe? 3O di raka mme a fete a iketla, ga a gate tsela ya mohlala agwe. 4Ke mang a tšweletšago tšeo a di dira? Ke Mmitšamelokoyabotho tlhagong; ke nna Morena Thakamathomo, le Phethamafelo e sa tlo ba nna. 5Dihlakehlake di di bone tša boifa; magomo a lefase a tlo šišinyega; mme ba tlo batamela ba tla kgauswi. 6Ba thušana seng sa bona, ba botšana ba re: Kgotlelela! 7Mmetli o thuša morudi, mokgatli o thuša mmatodi, ba bolela se ba se rutšego ba re: Ke se botse! Ba se kokotela ka dimapo gore se se ke sa kgwehla. 8Ge e le wena Isiraeli, Jakobo, o mohlanka wa ka yo ke mo hlaotšego, peu ya Aborahama, yo ke mo ratilego. 9Ke wena yo ke go tšerego, o le kua pheletsong ya lefase, o le dikhutlong tša lona, ka re: O mohlanka wa ka; ke hlaola wena, ga ke go lahle. 10O se boife gobane ke na le wena. O se ke wa tšhoga, gobane Modimo wa gago ke nna. Ke a go tiiša; ke a go thuša; ke go hleka ka letsogo la ka le letona leyakatoko. 11Ruri, bohle ba ba go bekago, ke tlo ba leša hlong, ba nyatšega ya ba ba lefela; ba ba lwago nago ba tlo loba. 12O tla re o ba nyaka, wa se sa ba bona; ba ba go lakanago e tlo ba ba lefela; ba ba go tšwelago dira ba tlo fela ba se hlwe ba eba gona. 13Gobane nna Morena ke Modimo wago; ke go swere ka seatla sa ka sa le letona, mme ke bolela nago ke re: Se boife, ke nna ke go phološago!
14Se boife, Jakobo, mokasebokwana, lena bathwana ba Isiraele! Ke nna ke le phološago! O realo Morena, Molopolodi wago, Mokgethwa wa Isiraele. 15O tsebe, ke go dira sefolo se bogale se sefsa, sa sehlare se se tiilego; o tlo fola dithaba, wa buduša meboto boka moko. 16O tlo di fefera, phefo ya di tšea, dimo la di phepheula. Ge e le wene o tlo hlalala ka Morena, o tlo fadiša Mokgethwa wa Isiraele. 17Bahlaki le bahloki ba nyakago meetse ba a hloka, mme maleme a bona a gagalala ka lenyora, nna Morena ke tlo ba kwa, nna Modimo wa Isiraele nka se ba tlogele. 18Ke tlo thula dinoka dirwaolong le methopo meeding. Lešoka ke tlo le dira letsha, naga ye e omilego ya ba ya metšwedi ya meetse. 19Sokeng ke tlo mediša merokwana, meduhlare le mehlware; megobogobo ka e šema mo lehanateng, le meumo, le mehlakolane. 20Go tlo ba bjalo gore ba bone, ba tsebe, ba lemoge, ba hlaloganye bohle gore ke seatla sa Modimo se se dirilego tšeo; di hlodilwe ke yena Mokgethwa wa Isiraele.
21Tlišang dikgang tša lena! O realo Morena. Le bitše dihlatse tša lena! O realo yena Kgoši ya Isiraele. 22A ba re botšeng ba re hlalosetše tše di tlogo direga, ba re hlathollele le modiregelo wa tša kgale, re di hlaloganye mo di feletšego, goba re kwe tše di tlogo tla. 23Re botšeng matlakamoso, re tsebe ge le le medimo; dirang se botse, goba le dire se sebe, re di bone bohle re tlabege. 24Ka kgonthe, ga le selo, le mediro ya lena e fo ba lefela; le ratwa ke dilalogi. 25Ke tsošitše motšwaleboa; o tlo tla a etšwa bohlabatšatši; o rapela ina la ka. Babuši o tlo ba gataka bjalo ka leraga, boka mmopi ge a kgabaganya letsopa. 26Ke mang e a di kwaditšego mathomong, ra di tseba di setla? Ra tlo re o rerešitše? Fela, go be go se segoeledi, go se motlišafoko; le a kwelego le bolela ga a gona. 27Ke nna ke thomilego go bolela fa Tsione ka re: Bonang, šedio! Motse wa Jerusalema ka o nea segoeledi sa tše botse. 28Ke be ke lebeletše, gwa se be le motho; mo go bona gwa se be le moeletši yo nkago mmotšiša mme a mpotša taba. 29Ka kgonthe, ka moka ga bona ke mafela, le mediro ya bona ga se ya selo, le diswantšho tša bona ke moya fela, ga se selo.
