JESAYA 31

₁Kotsi e tlo tlela bao ba fologetšego Egipita ba yo nyaka thušo, ba holofetše dipitsi, ba botile makoloi go ata, le banamedi ka ge e le ba maatla a magolo, ba se lebelele Mokgethwa wa Isiraele, ba se nyake Morena. ₂Kganthe le yena o bohlale, o tliša dikotsi; mme mantšu a gagwe ga a a hlanoše. O tlo tsogela moloko wa babe, o tlo lwa le ba tlatšanago le badiri ba bokgopo. ₃Le Baegipita ke batho fela; ga se bona Modimo; dipitsi tša bona ke nama, ga se moya; Morena a akga letsogo la gagwe, monamoledi o a kgopša, le monamelelwa a wa, ba senyega mmogo.

₄Morena o mpoditše a re: Ke tlo etša tau le tawana, ge di rora di swere phoofolo, di sa šie bontši bja badiši ba ba rapilwego, le mekgoši ya bona, di sa re selo ka mašata a bona. Le Morena wa mašaba o tlo dira bjalo ge a fologela ntweng thabeng ya Tsione le mmotong wa gona. ₅Boka nonyana ge di phurolla diphego, Morena wa mašaba o tlo dira bjalo ge a šireletša motse wa Jerusalema; o tlo šireletša, o tlo namolela; o tlo ekelela; o tlo hlakodiša.

₆Hee, bana ba Isiraele! Boelang go eo le mo hladilego la ya kgole. ₇Gobane mehleng yeo bohle ba tlo hlaswa medimo ya bona ya tshipitshehla le ya tshipi e kwibidu, ye le itiretšego yona ka diatla, ya ba tšona dibe. ₈Ge e le Asuri, yena o tlo ušwa ke lerumo, e sego la motho; lerumo, e sego la motho, le tlo mo ja. Ge a tlo tšhaba lerumo, masogana a gagwe a tlo išwa sepalong. ₉Lentšwe la gagwe le tlo ologa ka tšhogo, mme matona a gagwe a tlo rakwa difokeng. O realo Morena, mong a mollo wa Tsione, mong a uba la Jerusalema.