JESAYA 32

₁Tsebang! Go tlo bewa kgoši ya go buša ka go loka, ya bakgoma ba moahlolelo wo o lokilego. ₂E tlo ba monna mokaseemaphefong, maobopuleng, nokanalesehleng, moriti wa lentswelegolo nageng ya lenyora. ₃Mahlo a ba bonago a ka se ke a širwa; ditsebe tša ba kwago di tlo thaetša, ₄dipelo tša makoko di tlo lemoga se e lego tsebo, mme maleme a bakgamakgami a tlo akgofa a bolela di kwegago. ₅Wa lešilo ba ka se hlwe ba mo re ke senatla, wa bomenetša ba ka se hlwe ba mo re ke yo tsoro. ₆Gobane lešilo le bolela tša bošilo; pelo ya lona e tšweletša bošaedi le dire bolotšana; Morena le mmolela le timetše; e a lapilego le mo kuna dijo; e a lapilego le mo kuna sa go nwa. ₇Wa bomenetša ke wa marumo a mabe; o loga maano a mabe a go tlema babotlana a bolela maaka, le ge mmotlana a na le therešo. ₈Motho wa makgonthe, yena o rera makgonthe, o ema ka tša makgonthe.

₉Lena basadi, badulabaitebetše, tsogang! Lena basetsana ba le iketlilego, thaetšang se ke se bolelago. ₁₀Ge go fetile ngwaga le matšatši, ke mo lena ba go iketla le tlogo thothomela, morara ge o kgobišitšwe, go se sa tla seenywa sa go fulwa. ₁₁Tšhogang, lena badulaleitebetše! Roromelang, lena le iketlilego. Apolang aparo tše le hloboleng, mme le tšware mankgeretla. ₁₂Itshetleng dihuba! Llelang mašemo a kganyogegago le merara ye e emulego. ₁₃Le llele le mašemo a setšhaba sa ka a a tlogo mela meetlwa le ditshehlo, le nywako yohle ya mathabo, le motse wa mahowa. ₁₄Gobane nywako ya mošate e tlo šala e le lešope, mahowa a motse a fela; motse wa sebo le wa merako e metelele e tlo ba magaga a ka mehla, bokhuto bja pokolo ya lešoka, le phulo ya mehlape.

₁₅Ra tlo ba ra tšhelwa moya wa magodimong, lešoka la fetoga tšhemo ya dihlare, mme tšhemo ya dihlare ya tlo sengwa sekgwa. ₁₆Ke mo lešokeng go tlogo aga mokgwa wa molao, mme tšhemo ya dihlare ya tlo ba magae a toko. ₁₇Modiro wa toko e tlo ba kagišo; mme toko e tlo tliša go iketla le go holofela ka go sa felego. ₁₈Setšhaba sa ka se tlo dula magaeng a molao, nywakong e botegago, madulong a go iketla. ₁₉Fela, sefako se sa tlo rothotha sethokgwa, motse wo o sa tlo kokobetšwa fasefase. ₂₀Ba lehlogonolo ke bolena le lemago gohle dinokeng, la lesa pholo le pokolo di fula di ikgapa.