Setšhaba se lese go bota mebušo e mengwe, se bote Morena
1Kotsi e tlo wela bana ba dinganga! O realo Morena. Ke ba go loga maano ba se ne nna; ba go lakana ba se ne moya wa ka, ba go hlatlamanya dibe. 2Ba fologela Egipita ba sa botšiše molomo wa ka, gore ba ithekge ka maatla a Farao, ba khute moriting wa Egipita. 3Fela, maatla a Farao a tlo le leša hlong, go khuta moriting wa Egipita go tlo le goboša. 4Le ge bakgoma ba bona ba ile Tsoane, mme batseta ba bona ba ile kua Henese, 5Bohle ba tlo šegamišwa ke setšhaba se se sa ba holego selo, se se sa thušego selo, sa lefela, se se tlogo ba tlišetša hlong le go nyatšega.
6Moeno moelakubu ya borwa. Kua nageng ya ditlalelo le ditlaišego, ga botautshadi le ga tautona, mo go nago le mekopa le dinoga tša go fofa, ke mo ba išago thoto ya bona e rwelwe ke makaba, le mahumo a bona a le dithoteng tša dikamela, ba a iša go setšhaba se se sa holego selo. 7Ka gobane go ka thušwa ke Egipita ga dio, ke baithetabadutše.
8Bjale yaa o di tloke letlapeng o na nabo, o di ngwale mo pukung, gore e be tša mehla e tlago le tša neng le neng. 9Ka gobane tšhaba se ke sa dinganga, ke bana ba maaka, ke bana ba go gana go kwa molao wa Morena. 10Ke ba ba bolelago le baboni ba re: Le se ke la bona pono! Ke ba ba bolelago le baporofeta ba re: Le se ke la re ruta metlae. 11Ba re: Lahlang tsela! Tšwang mmileng! Le re khutšiše tšeo tša Mokgethwa wa Isiraele!
12Bjale yena Mokgethwa wa Isiraele o re: Molato ke ge le hlanogetše foko la ka, le holofetše tša sehlogo le karogo; le ithekga ka tše bjalo. 13Molato woo o le okametše bjalo ka leboto le letelele le gona bjale. 14O tlo ba pšhatlaganya boka pitša ya letsopa, ge e pšhatlwa e sa šetšwe, gwa se šale lekopelo la go ka gokola mollo sebešong, le ge e le la go ga meetse sedibeng.
15Gobane Mong wa bohle, Morena Mokgethwa wa Isiraele, o itše: Le tlo phologa ge le ka boa, mme la iketla; maatla a lena ke go ikhomolela le go holofela. Fela, le ganne, 16La re: Aowa! Re tlo tšhaba ka dipitsi! Bjale le tlo tšhaba. La re: Re tlo namela tše lebelo! Bjale tše lebelo e tlo ba tša bao ba go le rakediša. 17Ba sekete ba tlo tšhaba mokgoši wa o tee; mokgoši wa ba bahlano o tlo le tšhabiša, la tlo šala bjalo ka serotha ntlheng ya thaba, bjale ka sefoka mo mmotong. 18Ke ka baka leo ge Morena a sa fele pelo, gore a be a le šetše; ke ka baka leo ge a ema, gore a le gaugele. Gobane Morena ke Modimo wa molao. Ba ba letetšego yena e tlo ba ba mahlatse bohle.
19Ka kgonthe, wena setšhaba sa Tsione of dutšego fa Jerusalema, o ka se hlwe o lla; o tlo go gaugela ruri; ge a kwa o mo llela, o tlo araba. 20Le ge Mong a bohle a le fa dijo tša mahlomola a le nosa meetse a mahloko, Molai wa lena a ka se hlwe a iphihla; mahlo alena a tlo mmona, Molai wa lena. 21Ditsebe tša lena di tlo kwa ka nthago ga lena ge go thwe: Tsela še! Tšeang ka yona! Le se fapogele ka go le letona le ge e le go la ntsogošo! 22Ke mo le tlogo lahla tshwantšho tša lena tša tshipitshehla le tša tshipi e khwibidu, la di lahla bjalo ka ditšhila la re: Tlogang! 23Mme yena o tlo le nea pula, ya na mašemong mo le bjetšego dibjalo tša lena; mme dijo di tšwago moo mašemong e tlo ba tše di hošago, e tlo ba makhura; mehleng yeo mehlape ya gago e tlo ba le phulo e ahlamilego. 24Pholo le pokolo tša go lema di tlo ja mabele a a nokilwego, a a loditšwego a feferwa ka leselo. 25Gomme mehleng ya polao e kgolo, ge go hutšwe dibo go tlo ba le dinokana di elago meetse dithabeng tše di telele le mo mebotong e megolo yohle. 26Mme seetša sa kgwedi se tlo swana le sa letšatši; seetša sa letšatši e tlo ba sa matšatši a šupago mehleng yeo, ge Morena a tlo fapa thobego ya setšhaba sagwe ge a tlo tlemelela dintho tša sona.
27Bonang, Morena yena mong wa ina, o tla kua kgole; bogale bjagwe bo a tuka, ke mokubego o mogolo; melomo ya gagwe e tletše kgalefo; leleme la gagwe ke mollo wo o tšhumago. 28Mohemo wa gagwe o etša mafula a noka a gomago ka mogolo. O lotša ditšhaba ka leselo la go šwalalanya; dilete o di swere ka mogala wo o timetšago. 29Mme lena le tlo ba ba go hlaba sefela se etšago sa bošego go binwa monyanya; go tlo ba le lethabo la dipelo le kakago la baletši ba dinaka ba eya thabeng ya Morena, lentsweng la Isiraele.
30Morena o tlo kwatša lentšu la borena bjagwe, a bonatša le go akalala ga seatla sagwe ka bogale bja sekgoro le ka kgabo e tšhumago, le ka mafula, le ka ditimo, le ka maswika a sefako. 31Gobane Asuri o tlo tšhoga lentšu la Morena, ge a mo itia ka molamo. 32Gomme mo go fela, mo go tlogo feta molamo woo wa tefetšo ye Morena a mo tlelago ka yona, go tlo lla moropa le diletšo, ge a hlabana nae a o akalatša. 33Gobane botšhumelo bo lokišitšwe kgale, bo beetšwe le yona kgoši; ke sekoti, se ahlame, ke moolo wa dikgong tše ntši, tše di tlogo gotetšwa ke mohemo wa Morena, ka mollo o elago wa tshebela.
