JESAYA 29

₁Kotsi e tlo wela wene SebešosaModimo, wene SebešosaModimo, wene motse wo Dafida a tlilego a dula go wona. Hlatlamanyang mengwaga, menyanya a e latelane. ₂Ke tlo ba ka pitlaganya SebešosaModimo, gwa tlo ba le dillo le diphegelo, ya tlo ba sebešo sa nna Modimo. ₃Ke tlo go tiela gare ka dira, ka go dikologa ka lengope le ka merako. ₄O tlo kokobetšwa wa bobola o le fase, mme lentšu la gago la sesefa le etšwa leroleng, la etša la seriti le etšwa mobung, wa tlo bolela o hwile lentšu mo leroleng.

₅Manaba a gago madira a ona a tlo ata bjalo ka lerole le le sesane; mašaba a ba sehlogo a tlo ata boka moko ge o fefolwa ke phefo. Ke tše di tlogo tla ka bjakobjako. ₆Morena wa mašaba o tlo go sekiša ka medumo le ka tšhišinyego, ka mokgoši o mogolo le ka sesesedi le ditimo, le ka kgabo ya mollo o tšhumago. ₇Madira a ditšhaba tšohle a tlo etša pono ya bošego ya diloro, le bohle ba go tla go hula. Sebešo sa Modimo le dibo tša sona ba se dikile. ₈Go tlo etša mola wa tlala a lora dijo, a re go phafoga a dumala; le mola e a nyorilwego a lora meetse, a re go phafoga a hwetša a sa lapile, a sa kgalegile. Go tlo ba bjalo ka madira a ditšhaba tšohle a go tlo hula thaba ya Tsione.

₉Lealetšang le tlabege! Tadietšang le bone! Ba builwe, e sego ka sebela; ba a phokaela, e sego ka bjalwa. ₁₀Ke ka gobane Morena a le tšhetše moya wa boroko bjo bogolo; o le pipa mahlo, lena baporofeta; o le pipeditše hlogo, lena baboni. ₁₁Bjale dipono ka moka tša lena, di kaka mafoko a lengwalo le le phuthilwego mme la tlemelelwa ka mahuto; la re go le nea motho a tsebago puku la re: O ko e bale! Yena a re: Ga ke kgone; hleng e tlemeletšwe ka mahuto! ₁₂Ngwalo leo ge le ka le nea mosetsebepuku, la re: O ko le bale! O tla fo re: Ga ke tsebe puku.

₁₃Mong a bohle o itše: Molato ke ge setšhaba se se mpatamela ka legano, se ntheta ka melomo; mola dipelo tša bona di le kgole le nna; gomme ge ba mpoifa, e fo ba malayabatho a go ithuta. ₁₄Bjale nna setšhaba se -- ke tlo buša ke se dira ka mokgwa o tlogo tlaba, o tlogo tlaba ruri; bohlale bja bahlale ba bona bo tlo senyega, tlhaloganyo ya bahlaloganyi e se utologe.

₁₅Kotsi e tlo wela ba ba utamago ba re: Re utela Morena morero wa rena. Ba re mediro ya bona e dule e le leswiswing; ba re: Re bonwa ke mang? Re tsebja ke mang? ₁₆Mašilo tenang! A letsopa le ka sengwa mmopi? A modiro o ka ra modiri wa re: Ga wa ntira? A sebopša se ra mmopi sa re: Ga o tsebe selo?

₁₇Ka kgonthe, go šetše go se go kae, ke mo Libanoni a tlogo fetoga tšhemo ya dihlare, mme tšhemo ya dihlare ya tlo ba lesodi.

₁₈Mehleng yeo mantšu a puku a tlo kwewa ke difoa; mahlo a difofu a tlo tlogwa ke boso le leswiswi, mme a tlo bona. ₁₉Babotlana ba tlo buša ba thabela Morena, mme batho ba badiidi ba tlo hlalalela Mokgethwa wa Isiraele. ₂₀Ba bašoro ba tlo ba ba fedile, le ba lonya ba tlo hlokwa, go tlo ba go fedišitšwe ba go loga maano a mabe. ₂₁Ke bao ba polelo ya go phara batho, ba go dula ba theile ba ba ahlolago mo kgorong, ba go phereketša yo bolo ka tša lefela.

₂₂Bjale Morena, Monamolela Aborahama o bolela le moloko wa Jakobo o re: Jakobo bjale a ka se lewe ke dihlong, a ka se hlwe a nyama. ₂₃Gobane o tlo bona bana bagwe, le mediro ya diatla tša ka gare ga bona, a kgetha ina la ka. Ba tlo kgetha Mokgethwa wa Jakobo; ba tlo boifa Modimo wa Isiraele. ₂₄Ba dipelo tše di timetšego ba tlo hlalefa, mme bangongoregi ba ka se hlwe ba gana thuto.