Bible Reading Plan – Day 141

₁Jwaloka lehlwa

le kgethehang hlabula,

kapa pula e nang

ka nako ya ha ho kotulwa,

hlompho le yona

ha e tshwanele sethoto.

₂Jwaloka serobele se phuphuselang,

kapa lefokotsane le okaokelang,

motho ha a silafatswe

ke thohako ya lefeela.

₃Phafa e shapa pere,

tonki e hulwa ka tomo,

thoto sona se phekolwa ka thupa.

₄Se arabe sethoto

ho ya ka bothoto ba sona,

esere le wena wa tshwana le sona.

₅Araba sethoto

ho ya ka bothoto ba sona,

esere sa ipona se le bohlale.

₆Ya romeletsang ditaba ka sethoto,

o ikgaola maoto,

o ipiletsa ditlokotsi.

₇Maoto a sehlotsa a a fokola,

maele a tswang

molomong wa sethoto a jwalo.

₈Ho isa tlotla ho sethoto,

ho tshwana le ho tlamella lejwe,

ho le tlamella letjeketjaneng.

₉Maele a tswang molomong,

molomong wa sethoto,

a ka moutlwa

o hlabang letsoho la letahwa.

₁₀Jwaloka rametsu

ya fulang a sa shebe,

ya hirang sethoto

kapa mofeta-ka-tsela, o jwalo.

₁₁Sethoto se kgutlelang

bothotong ba sona

se tshwana le ntja e kgutlelang

mahlatseng a yona.

₁₂Motho ya ithetsang

ka ho re o bohlale,

o ka tshepa sethoto

ho ena le yena.

₁₃Sekgoba se re:

“Tau ke ena ka tseleng!

Tau ke ena diterateng!”

₁₄Jwalokaha lemati

le kwaleha le buleha,

sekgoba le sona

se meneka jwalo moalong wa sona.

₁₅Sekgoba se kenya letsoho

ka sejaneng,

empa se botswa ho le isa hanong.

₁₆Sekgoba se ithetsa

ka ho re se bohlale,

ho feta banna ba supileng

ba nang le kelello.

₁₇Mofeta-ka-tsela

ya kenang qabang tsa batho

o ka motho ya sothang

tsebe tsa ntja ya lelahleha.

₁₈Lehlanya le betsakang ditsenene,

le metsu e bolayang,

₁₉le tshwana le motho

ya thetsang mohahabo,

ebe o re:

“Ke ne ke itshwasetsa feela.”

₂₀Ha patsi e fedile, mollo o a tima,

ha ho se mosebi, qabang di a fela.

₂₁Mashala a tswala leupa,

patsi e hotetsa mollo,

motho wa dikgang

yena o fehla diqabang.

₂₂Taba tsa bofuufu

di monate haholo,

di ka dijo

tse theohelang hamonate maleng.

₂₃Motho ya leme le monate

a le pelo e mpe,

o jwaloka pitsa ya letsopa

e homilweng ka manya a silefera.

₂₄Moikaketsi o ikgakanya

ka polelo tsa hae,

empa pelong ya hae o emere thetso.

₂₅Leha a ka bua hamonate

o se mo kgolwe,

hobane bobe

bo kgaphatseha pelong ya hae.

₂₆Leha lehloyo la hae

le ka ikgakanya ka thetso,

bokgopo ba hae

bo tla taloleha mahlong a bohle.

₂₇Ya tjhekang lemena

o tla wela ho lona,

ya thetang lejwe

le tla mo wela hodimo.

₂₈Leleme le leshano

le hloile bao le ba buang hampe,

molomo wa leseaqheme

wona o a timetsa.

₁O se ke wa ithorisa

ka la hosasane,

hobane ha o tsebe

hore le ka o tlela ka dife.

₂Motho ha a ithorise

o roriswa ke ba bang,

a ka roriswa ke basele,

e seng yena a ithorise.

₃Lejwe le boima,

le lona lehlabathe,

ho halefiswa ke sethoto

ho boima ho di feta.

₄Kgalefo e sehloho,

bohale bo a tlokoma,

empa mona

o ka engwa ke mang kapele?

₅Ho kgalema motho sefahlamahlo

ho molemo

ho feta rato la lekunutu.

₆Ho batwa ke motswalle

ho na le molemo,

empa ho akwa ke sera ke thetso.

₇Ya nyonyobetseng

o hlaba kgora ka sefeamaeba,

athe ho ya lapileng

le ho babang ho a latsweha.

₈Monna ya furallang lapa la hae,

o tshwana le nonyana

e furallang sehlaha sa yona.

₉Ditlolo le menkwane

di thabisa pelo ya motho,

keletso e ntle ya motswalle

le yona e thabisa jwalo.

₁₀Se furalle motswalle wa hao

kapa wa ntatao,

ha o le bothateng,

se itlwaetse ho ya ha ngwaneno;

motswalle ya haufi o na le thuso,

ho feta ngwaneno ya hole.

₁₁Mora ka, hlalefa,

o thabise pelo ya ka,

ke tle ke arabe motho ya nnyatsang.

₁₂Ya sedi o elellwa kotsi,

a batle setshabelo,

empa ya se nang tsebo

o tlatselaka feela,

a wele kotsing.

₁₃Nka seaparo sa ya itlammeng

ho lefa molato wa e mong;

mo ntshise tebeletso

bakeng sa mosadi wa sehlola.

₁₄Ya dumedisang mohahabo

ka ho mo tlatsetsa lerata,

a mo tlatsetsa lerata ka matjeke,

tlhohonolofatso ya hae

e tla fetoha thohako.

₁₅Metsi a rothang ho ya ho ile

ha pula e ena,

a tshwana hantle le mmadikomang.

₁₆Ho mo thodisa

ho tshwana le ho thiba moya,

kapa ho kgakeletsa ole ka seatla.

₁₇Tshepe e leotswa

ka tshepe e nngwe,

monna o tentshwa tshea

ke banna ba bang.

₁₈Ya hlokomelang fate sa feiye,

o tla ja tholwana tsa sona;

ya baballang monga hae hantle,

o tla tlotlwa ke yena.

₁₉Jwalokaha motho

a ipona sefahleho ka metsing,

pelo ya motho

le yona ke seipone sa hae.

₂₀Nqalo ya Bafu

le mohohlo wa timelo

ha di ke di tlala,

le wona mahlo a motho

ha a kgotsofale.

₂₁Silefera e hlwekiswa

ka ho qhibidiswa pitseng,

kgauta yona ka seboping sa yona,

le motho o ahlolwa

ka botumo ba hae.

₂₂Lehlanya o ka le tulella

ka lefudung,

wa le silella le mabele ka tshilo;

empa bohlanya

bo ke ke ba le tlohela.

₂₃Eba mafolofolo

ho lekola kgutshwane tsa hao,

o hlahlobe mehlape ya hao hantle;

₂₄hobane leruo

ha le hlole kamehla yohle,

le mofapahlooho wa kgosi

ha o fetele melokong yohle.

₂₅Ha jwang ba thoko bo fedile,

jwang bo botjha bo se bo hlahile,

mme jwang bo matswapong

bo bokeletswe,

₂₆o tla apara tsa boya ba dikonyana,

ka dipotsanyane o reke masimo.

₂₇Bese la dipodi le tla o lekana,

e be dijo tsa hao le tsa lapa la hao,

o fepe le makgabunyane a hao.

₁Ya kgopo o baleha

a sa phaladiswe ke motho,

ba lokileng

bona ba sebete jwaloka tau.

₂Tjhaba ha se le kgopo

se hlahlamanya babusi,

empa toka e hlaha

ka ya nang le bohlale le tsebo.

₃Mofumanehi

ya hatellang bafumanehi

o ka sekgohola se senyang dijalo.

₄Ba tlolang molao

ba thoholetsa ba kgopo,

empa ba o bolokang

ba hanyetsana le ba kgopo.

₅Batho ba kgopo

ha ba na kutlwisiso ya toka,

ba kgumamelang Morena

ba na le kutlwisiso ya tsohle.

₆Ho molemo ho ba mofutsana

ya phelang ka botshepehi,

ho ena le ho ba morui

ya phelang ka bolotsana.

₇Ya bolokang molao

ke mora ya bohlale,

ya tlwaetseng menyollo

o hlabisa ntatae dihlong.

₈Ya atisang ruo la hae

ka ho le tswadisa,

a le atise le ka ho hanyapetsa,

o le bokellela

ya tla hauhela mafutsana.

₉Ya ithibang ditsebe

hore a se utlwe molao,

thapelo tsa hae

le tsona ke manyala.

₁₀Ya kgelosang ba lokileng

hore ba ye tseleng tse kgopo,

o tla wela lemeneng

le tjhekilweng ke yena;

ba se nang molato

ba tla ja lefa la tse molemo.

₁₁Morui o ithetsa

ka ho re o bohlale,

mofutsana ya sedi

o lemoha boithetso boo ba hae.

₁₂Ha ba lokileng ba busa

tjhaba se a thoholetsa;

ha ba kgopo ba busa

tjhaba se a ipata.

₁₃Ya patang dibe tsa hae

a ke ke a ba le katleho;

ya ipolelang tsona, a di bakela,

o tla fumana mohau.

₁₄Ho lehlohonolo motho

ya tshabang Morena kamehla,

empa ya ithatafatsang pelo

o tla wela tsietsing.

₁₅Jwalokaha tau e puruma

le bere e kgobolaka,

mmusi ya kgopo o jwalo

ha a busa bafumanehi.

₁₆Mmusi ya sethoto

ke mmampodi ya sehloho;

ya hloileng maruo a bolotsana

o tla phela halelele.

₁₇Ya molato

wa ho tsholla madi a motho,

e tla ba mophaphathehi

ho isa lefung,

ho se be ya lekang ho mo thiba.

₁₈Ya phelang ka botshepehi

o tla fumana pholoho;

ya phelang ka bokgopo

yena hanghang o tla timela.

₁₉Ya lemang masimo a hae

o tla tjhaya haholo;

ya pheellang mafeela

o tla futsaneha haholo.

₂₀Motho ya tshepahalang

o tla hlohonolofala haholo,

athe ya potlakelang ho rua,

kotlo o tla e fumana.

₂₁Ho ahlola ka leeme

hase ntho e ntle,

empa motho a ka nna etsa sebe,

hore a fumane sengwathwana.

₂₂Ya mahlo a matsho

o potlakela leruo,

ha a nahane le hore bofuma

bo tla mo wela hodimo.

₂₃Ya kgalemang motho e mong,

o tla ratwa,

ho feta ya qekisang ka leleme la hae.

₂₄Ya utswetsang ntatae kapa mmae,

a ntsa ithetsa ka ho re:

“Hona hase sebe,”

ya jwalo yena

ke motswalle wa disenyi hantle.

₂₅Motho ya ikgohomosang

o fehla moferefere;

ya itshepelang Morena

o tla fumana katleho.

₂₆Motho ya sethoto

ke ya itshepang boyena,

ya sebetsang ka bohlale

o tla fumana pholoho.

₂₇Ya fanang ho mafutsana

ha ho seo a ka se hlokang;

ya sa a natseng ka letho

o tla rohakwa ke ba bangata.

₂₈Ha ba kgopo ba busa,

tjhaba se a ipata;

empa ha ba timela,

ba lokileng ba tla ngatafala.