Bible Reading Plan – Day 140

₁Ha o dula tafoleng,

o eja le mmusi,

hopola hantle

hore na o dutse le mang;

₂haeba o itseba o le monyollo,

ako itshware, o je jwaloka motho;

₃o se kgalle dimenyemenye tsa hae,

hoba hase dijo empa e le maraba.

₄O se ka itja matla hore o ithuise;

eba le bohlale ba ho itshwara.

₅Ha o re maruo hedi!

o tla bona a sa nyametse,

hobane a tla fela a mele mapheo,

a fofele hodimo sa ntsu,

sa ntsu e le sepakapakeng.

₆Se je dijo tsa ya lekgonatha,

o se ke wa kgalla

dimenyemenye tsa hae,

₇hobane kamehla

o nahana theko ya tsona.

O re ho wena: “Eja, o nwe,”

feela pelo ya hae yona ha e rialo.

₈O tla hlatsa le thathana

eo o e jeleng,

ebe mantswe a hao

a monate a teboho a senyehile.

₉O se ikgathatse ho bua le sethoto,

hoba se tla nyedisa

bohlale ba dipuo tsa hao.

₁₀O se ke wa tlosa

mokolokotwane wa kgale,

kapa wa hapa masimo a dikgutsana,

₁₁hoba Mosireletsi wa tsona o matla,

ke yena ya tla emela nyewe ya tsona.

₁₂Pelo ya hao

e thahaselle ho ithuta,

tsebe tsa hao

di mamele puo tse nang le tsebo.

₁₃Se hlokise ngwana wa hao kgalemo,

thupa ke mosesetso

e ke ke ya mmolaya.

₁₄Mo sasare ka leswai,

o tla mo phemisa lefu.

₁₅Mora ka, haeba o le bohlale,

le nna ke tla thaba;

₁₆pelo ya ka e tla nyakalla

ha o bua seo e leng nnete.

₁₇Pelo ya hao

e se kgahlwe ke baetsadibe,

empa kamehla

o tjhesehele ho tshaba Morena.

₁₈Ruri o sa na le seo

o se tshepileng kamoso,

mme tshepo ya hao

e ke ke ya ba ya fela.

₁₉Mamela, mora ka, o tlo hlalefe,

o tsamaye tseleng e nepahetseng.

₂₀Se tsamaye le ba itlopang veine,

kapa ba kgetshelakang dinama,

₂₁hoba matahwa le menyollo

e a futsaneha

ho tsherehana ho e apesa marantha.

₂₂Mamela ntatao ya o tswetseng,

O se nyedise mmao ha a tsofetse.

₂₃Reka nnete le bohlale

le tayo le kutlwisiso,

mme o se ke wa ba wa di rekisa.

₂₄Ntata ya lokileng

o nyakalla haholo;

ya nang le mora ya bohlale

o itumela ka yena.

₂₅Ntatao le mmao ba ke ba thabe,

mmao ya o tswetseng a ke a nyakalle!

₂₆Mora ka, ako nnee pelo ya hao,

mahlo a hao a kgahlwe,

a kgahlwe ke metsamao ya ka,

₂₇hobane seotswa

ke lemena le tebileng,

seraburabu sona

ke mokoti o patisaneng;

₂₈se lalla jwaloka senokwane,

se atisa dihlola hara banna.

₂₉Ya madimabe ke mang?

Ya hlomohileng ke mang?

Ya dikgang ke mang?

Ya tletlebang ke mang?

Ya meupa ya bosawana ke mang?

Ya mahlomafubedu ke mang?

₃₀Ke ba hlanyetsang veine,

ba yang ho latswa veine

e tswakilweng.

₃₁O se ke wa tadima veine

ha e le kgubedu,

ha e phophoma kahara mopotjwana,

ha e re lelele! hamonate mmetsong.

₃₂E qetella ka ho loma jwaloka noha,

mahloko a tjhatjhametse

jwaloka a marabe.

₃₃Mahlo a hao

a tla bona pono disele,

kelello ya hao

e nahane dintho tse ferekanyang.

₃₄O tla ba jwaloka ya robetseng

bodibeng ba lewatle,

ya paqameng

hodima mehala ya sekepe.

₃₅O tla re: “Ba nkotlile,

empa ha ke a utlwa bohloko!

Ba ntjhapile,

empa ha ke utlwe letho!

Ekaba ke tla tsoha neng,

ke tswe ke tshwara mohotswana,

ke o tshwara hape?”

₁O se ke wa kgahlwa,

wa kgahlwa ke ba kgopo,

o se lakatse

ho etsa setswalle le bona,

₂hobane ba inahanela

ho sebedisa dikgoka,

melomo ya bona e bua dimpe.

₃Bohlale ke bona bo hahang ntlo,

kutlwisiso yona e e tsitsise,

₄tsebo e tlatse dikamore

ka mekgabo ya matlotlo a bohlokwa,

matlotlo a kgahlehang.

₅Ya bohlale o matla ho feta senatla,

ya nang le tsebo o feta sekwankwetla.

₆O lwana ntwa

o itokiseditse yona hantle,

o e hlole

ka ho eletswa ke ba bangata.

₇Sethoto ha se utlwisise bohlale,

ka kgotla

se ke ke sa ahlamisa molomo.

₈Ya lohang mano a ho etsa bokgopo

batho ba mmitsa rabolotsana.

₉Merero ya bothoto ke sebe,

mosomi o nyonywa ke batho bohle.

₁₀Haeba o nyahama pelo

mohla ditsietsi,

o fela o fokollwa ke matla.

₁₁Lopolla ba iswang lefung,

o pholose ba iswang polaong.

₁₂Ha o ka re:

“Jo! re ne re sa tsebe!”

Na ya bonang dipelo

yena a ke ke a lemoha?

Ya baballang bophelo ba hao

yena o a tseba,

motho ka mong o tla mo putsa

ho ya ka mesebetsi ya hae.

₁₃Mora ka, eja mahe a dinotshi,

hobane a a latsweha,

o je kgekge ya dinotshi

hobane e a hlabosa.

₁₄Tseba hore bohlale bo jwalo

moyeng wa hao;

ha o ka bo fumana

o tla ba le katleho kamoso,

tshepo ya hao e ke ke ya fela.

₁₅Se lalle ntlo ya motho ya lokileng

jwalokaha senokwane se etsa;

lapa la hae o se ke wa le senyetsa,

₁₆hoba leha ya lokileng a ewa hasupa,

o ye a boele a tsohe,

athe ba kgopo koduwa e a ba timetsa.

₁₇O se ke wa thabela

ho wa ha sera sa hao,

pelo ya hao e se nyakalle

ha se kgothometseha;

₁₈esere Morena a bona,

mme a nyatsa,

a kgelosa kgalefo ya hae ho sona.

₁₉O se ke wa itshwenya

ka ba etsang bobe,

kapa wa kgahlwa

ke ba etsang bokgopo;

₂₀ya kgopo ha ho letho

leo a le tshepileng,

bone la bophelo ba hae

le tla tingwa.

₂₁Mora wa ka,

tshaba Morena le kgosi,

o se ke wa ikopanya

le mahlabaphiyo,

₂₂hobane hanghang

koduwa e tla a wela hodimo.

Ana ke mang ya ka tsebang

tshenyo eo ba tla e etsa?

Ho ahlola ka leeme ha ho a loka.

₂₄Ya reng ho ya kgopo:

“Ha o na molato,”

tjhaba di tla mo rohaka,

merabe e mo nyonye;

₂₅empa ba ahlolang ya molato

ba tla atleha,

mahlohonolo a ba atele.

₂₆Ya arabang ka bokgabane

o supa setswalle sa nnete.

₂₇Hlopha mosebetsi wa hao o kantle,

ebe o lema tshimo ya hao,

o nto haha ntlo ya hao.

₂₈O se be paki

e tswang mohaeno ntle ho lebaka,

polelo tse thetsang

di se tswe molomong wa hao.

₂₉O se ke wa re:

“Ke tla busetsa molamu sefateng,

kgalapa ke e buseletse ka kgalapa.”

₃₀Ke ile ka feta

pela tshimo ya sekgoba,

ka ba ka feta

rapeng sa morara sa ya sethoto,

₃₁ka bona di rarieletswe ke meutlwa,

bobatsi le bona bo entse mofero,

marako le wona a se a helehile.

₃₂Ka bona, ka ba ka imamela,

ka tadima, ka ithuta sena:

₃₃Ha o ka re shwa!

wa boela wa re shwa!

wa phuthaphutha matsoho,

wa iphomolela,

₃₄fuma ba hao bo tla o nanarela,

bo o nanarele jwaloka senokwane,

tlala e o wele hodimo

sa motho a nkile dihlomo.

₂Tlotla ho Morena

ke ho etsa ditaba sephiri,

athe tlotla ya dikgosi

ke ho phenyaphenya ditaba.

₃Jwalokaha mahodimo a phahame,

fatshe lona le le tlase,

menahano ya dikgosi

le yona e ke ke ya fihlelwa.

₄Hlwekisa silefera

ka ho e ntsha manya,

lelala le tle le tsebe

ho bopa nkgo ka yona.

₅Hleka ba kgopo kapele ho kgosi,

terone ya yona

e tle tsitsiswe ke ho loka.

₆Se ke wa ikakasa kapele ho kgosi,

kapa wa dula tulong tsa mahosana;

₇ho molemo ha kgosi e re ho wena:

“Nyolohela kwano!”

ho ena le ho tlontlollwa

mahlong a kgosana,

mahlong a kgosana eo o e bonang.

₈Se potlakele ho isa motho ka kgotla,

esere mohaeno a o tlontlolla,

wa qetella

o se na seo o ka se etsang.

₉Ha o tsekisana le mohaeno

buisana le yena,

feela taba tsa e mong

tsona e be pinyane,

₁₀esere ha a utlwa a o tlontlolla,

botumo bo bobe

bo se hlole bo o hlakoha.

₁₁Polelo e builweng ka nako ya yona

e ka apole tsa kgauta

ka sejaneng sa silefera.

₁₂Ho kgalengwa ke motho ya bohlale,

tsebeng e lethwethwe ke lesale,

ke mokgabo wa kgauta

e hlwekisitsweng.

₁₃Jwaloka lehlwa le phodisang

ka nako ya kotulo,

leqosa le tshepahalang

le jwalo ho ba-le-romi;

le kgatholla pelo ya monga lona.

₁₄Motho ya ithorisang

ka dimpho tsa molomo,

o jwaloka maru

le moya o se nang pula.

₁₅Ho ba le mamello

ho ka sokolla kgosi;

polelo e bonolo e fedisa manganga.

₁₆Ha o ntshetsa dinotshi

o di je ka tekanyo;

ha o ka itlopa tsona,

di tla o hlatsisa.

₁₇Ya ahisaneng le wena

o mo fapohele sewelo,

esere wa mo tena,

a qetella a o hloile.

₁₈Ya etseletsang mohahabo ka leshano

ke koto kapa sabole,

kapa motsu o ntjhotjho.

₁₉Ho tshepa molotsana

nakong ya ditsietsi

ho ka leino le bodileng,

kapa leoto le hlotsang.

₂₀Ho binela ya hlomohileng

pina tsa thabo,

ho ka ho hlobola kobo

mohla ho batang,

le ho tshela asene hodima leqeba.

₂₁Ha sera sa hao se lapile,

o ke o se fepe;

ha se nyorilwe, se fe metsi se nwe;

₂₂ka ho etsa jwalo

o se hlabisa dihlong,

mme wena Morena o tla o putsa.

₂₃Jwalokaha moya wa leboya

e le mmadipulana,

leme le sebang le tsosa kgalefo.

₂₄Ho molemo

ho iphelela sekgutlwaneng

kahodima marulelo a ntlo,

ho ena le ho phela

le mmadikomang.

₂₅Taba tse monate

tse tswang naheng e hole

di ka metsi a phodileng

mmetsong o nyorilweng.

₂₆Motho ya lokileng,

ya suthelang ya kgopo tsela,

ke diba se dukehileng

kapa mohlodi o silafetseng.

₂₇Hase hantle ho itlopa dinotshi;

ho ipatlela tlotla

le hona ha ho lokele.

₂₈Motho ya hlolwang

ho bipa kgalefo ya hae

o tshwana le motse

o marako a heleditsweng.