Bible Reading Plan – Day 142

₁Motho ya nnileng a kgalengwa

empa a satalatsa molala,

hanghang o tla welwa ke kotsi,

pheko e be siyo.

₂Ha ba lokileng ba ngatafala,

tjhaba se a nyakalla,

empa ha ba kgopo ba busa

tjhaba se a lla,

₃Ya ratang bohlale o thabisa ntatae,

ya mathang le diotswa

o hafaka leruo la hae.

₄Ha kgosi e thahasella toka,

puso e a tsitsa,

kgosi e kgethisang setjhaba haboima

e futsanehisa naha.

₅Motho ya phoqang mohahabo

o itjhehela leraba ka boyena.

₆Sebe sa ya kgopo

ke lemena ho yena,

empa ya lokileng

o bina a nyakaletse.

₇Ya lokileng

o hlokomela tokelo tsa bafumanehi,

empa ya kgopo

yena ha a di natse ka letho.

₈Basomi ba fehla moferefere,

ba o fehla kahara motse,

empa ba bohlale

ba kokobetsa kgalefo.

₉Ha motho ya bohlale

a qosana le ya sethoto,

leha ya sethoto a ka halefa,

kapa a tsheha,

kgotso e ke ke ya eba teng.

₁₀Ba nyoretsweng madi

ba hloile ba lokileng,

empa ba lokileng

ba boulela bophelo ba hae.

₁₁Sethoto se hlatsa kgalefo ya sona,

empa ya bohlale yena o a e bipa.

₁₂Ha mmusi a mamela mashano,

bahlanka ba hae bohle

ba tla ba kgopo.

₁₃Mofumanehi le mohatelli

ba tshwana ka sena:

Morena o tutubolla mahlo,

mahlo a bona bobedi.

₁₄Kgosi e ahlolelang bafumanehi,

e ba ahlolelang ka toka,

terone ya yona

e tla tsitsa kamehla yohle.

₁₅Thupa le kgalemo di tlisa bohlale,

empa ngwana ya tlohetsweng feela,

o hlabisa mmae dihlong.

₁₆Ha ba kgopo ba anafala,

bokgopo bo a eketseha;

empa ba lokileng

ba tla bona ha ba timela.

₁₇Kgalema mora wa hao,

o tla fumana phomolo,

le moya wa hao o nyakalle.

₁₈Tjhaba se sa senolelwang ditaba,

se iketsetsa borata,

empa ho lehlohonolo

ya bolokang molao.

₁₉Lekgoba le ke ke la kgalengwa

ka ho buiswa feela,

le hoja le utlwisisa,

le ke ke la phetha taelo.

₂₀Motho eo ereng ha a bua

a phasolohe,

o ka tshepa sethoto

ho ena le yena.

₂₁Ya bokotsang kgoba la hae

ha a le hodisa,

le tla qetella le mo hlokela teboho.

₂₂Motho ya bohale o baka diqabang,

ya hlonameng

yena o tletse bokgopo.

₂₃Boikakaso ba motho bo a mo diha,

empa boikokobetso

bo mo tlisetsa hlompho.

₂₄Motswalle wa leshodu o itlhoile,

o utlwa thohako, empa ha a e natse,

₂₅Ho tshaba batho

ke ho itjhehela leraba,

empa ya tshepang Morena

o tla bolokeha.

₂₆Ba bangata

ba batla ho ratwa ke mmusi,

empa motho

o fumana toka ho Morena feela.

₂₇Ba lokileng ba nyonya ba sa lokang,

ba sa lokang ba nyonya ba lokileng.

Monna eo a bua, a re:

“Oho, Modimo ke kgathetse!

Oho, Modimo ke kgathetse!

Ke feletswe ke matla!

₂Nna ke sethoto

ho feta mang kapa mang;

ha ke na le kutlwisiso ya botho.

₃Ha ke a ka ka ithuta bohlale,

ebile ha ke tsebe Ya Halalelang.

₄Ya nyolohetseng lehodimong

a ba a theoha ke mang?

Ya fupereng moya

ka diatla tsa hae ke mang?

Ya bokeletseng metsi

ka aparong sa hae ke mang?

Ya sehileng meedi

ya dipheletso tsa lefatse ke mang?

Lebitso la hae ke mang?

La mora wa hae lona ke mang?

Haeba o a tseba, bolela!

₅“Polelo tsohle tsa Modimo

ke tsa nnete.

Ke thebe ho bohle ba mo tshepang.

₆Se eketse letho polelong tsa hae,

esere a o kgalema,

wa fumanwa o le leshano.”

₇“Ke kopile ntho di le pedi ho wena,

o se nkganele ka tsona

pele ke eshwa:

₈Suthisetsa bolotsana le mashano

hole le nna,

o se ke wa nthuisa

kapa wa mphutsanehisa,

o mphepe ka dijo tse ntekaneng;

₉esere ha ke kgotshe

yaba ke a o latola,

ke re: ‘Morena ke mang?’

Kapa ka futsaneha,

yaba ke a utswa,

mme ka tlaela

ka lebitso la Modimo wa ka.

₁₀“O se ke wa nyedisa mohlanka

ho monga hae,

esere a o rohaka,

wa fumanwa o le molato.

₁₁“Moloko o teng

o rohakang bo-ntata wona,

o sa hlompheng le bo-mma wona.

₁₂Moloko o teng

o ithetsang ka ho re o hlwekile,

empa o sa hlwekiswa

ditshila tsa wona.

₁₃Moloko o teng o ikgohomosang,

o shebang batho ka ho ba nyedisa.

₁₄Moloko o teng

o meno a kang disabole,

oo a mohlaare a kang dithipa,

ho harola bafumanehi lefatsheng,

le bahloki ba phelang hara setjhaba.

₁₅“Koidi e na le madinyane

a le mabedi,

a kopang a re: ‘Re fepe! Re fepe!’

“Ntho di tharo tse sa kgotsofaleng,

e, di nne tse sa ke be di re:

‘Ho lekane!’

₁₆Ke lebitla le mosadi wa nyopa,

le mobu o omeletseng,

le mollo o sa ke be o re:

‘Ho lekane!’

₁₇“Leihlo le tshehang ntata lona,

le nyedisang taelo ya mma lona,

makgwaba a dikgohlo a tla le honya,

mme madinyane a ntsu a le je.

₁₈“Ntho di tharo

tse mmakatsang haholo,

e, di nne tseo ke sa di tsebeng:

₁₉Mohlala wa ntsu sepakapakeng,

mohlala wa noha hodima lefika,

mohlala wa sekepe hara lewatle,

mohlala wa monna ho morwetsana.

₂₀“Mokgwa wa mosadi wa sefebe,

ke mokgwa o tjena:

O a ja, ebe o a itlhakola, o re:

‘Nna ha ke a etsa letho le kgopo.’

₂₁“Ntho di tharo

tse reketlisang lefatshe,

di nne

tseo le ke keng la di mamella:

₂₂Ke lekgoba leo ebang kgosi,

le sethoto se nyonyobetseng,

₂₃le moshejwahang ha a nyalwa,

le lekgabunyane

le jang lefa la monga lona.

₂₄“Ntho di nne

tse nyenyane lefatsheng,

empa tse bohlale bo makatsang:

₂₅Bohlwa ke tjhaba se hlokang matla,

empa bo bokella

dijo tsa bona hlabula.

₂₆Dipela ke tjhaba se fokolang,

empa di etsa

qhobo tsa tsona mafikeng.

₂₇Ditsie tsona ha di na kgosi,

empa ha di falla

di fofa ka mekgahlelo.

₂₈Mokgodutswane

o ka o tshwara ka letsoho,

empa o fumanwa

ka matlung a dikgosi.

₂₉“Ntho di tharo

tse bohehang ha di tsamaya,

e, di nne tse natlailang:

₃₀Ke tau,

batana se matla ho feta tsohle,

eo ho seng letho

leo e ka le balehang;

₃₁ke mokoko o qholoshang

hara dithole,

hape ke phooko,

ke kgosi

e futuhang ka mabotho a yona.

₃₂“Haeba o bile sethoto,

wa ikgantsha,

kapa wa nahana merero e mebe,

bea letsoho molomong o kgutse,

₃₃hoba lebese ha le fehlwa

le etsa sereledi,

le nko ha e otlwa e tswa mokola,

kahoo kgalefo e fehla meferefere.”

₂“Oho, ngwanaka!

Oho, ngwana popelo ya ka!

Wena eo ke mo filweng

ho arabela thapelo tsa ka,

₃se qete matla

a bonna ba hao ka basadi,

se tjhediete

le basadi ba timeditseng dikgosi.

₄“Ha ho lokele dikgosi, Lemuele,

ho nwa veine ha ho di lokele,

ho tjhatjhehela jwala

ha ho lokele mahosana,

₅esere ha di nwele,

molao tsa o lebala,

bafumanehi ba ahlolelwa ka leeme.

₆Ba kgatheng la ho shwa

ba nweseng jwala,

ba sithabetseng dipelo

le ba nwese veine.

₇Ba tloheleng ba nwe,

ba lebale bofuma ba bona,

mahlomola a bona

ba se hlole ba a hopola.

₈“Eba molomo

wa ba sa tsebeng ho ipuella,

o tseke tokelo

tsa bohle ba saretsweng.

₉Ba buelle,

o ba ahlolele ka toka,

o emele nyewe tsa bafumanehi

le wona mafutsana.”

₁₀Mosadi ya kgabane

a ka fumanwa ke mang?

Bohlokwa ba hae

bo feta le mabenyane a bohlokwa!

₁₁Monna hae

o mo tshepa a sa kganane,

mme bofutsana

a ke ke be a bo tseba.

₁₂Ke matsatsi wohle

a ho phela ha hae,

o etsetsa monna

tse molemo e seng tse mpe.

₁₃O batla boya, a batle motsitla,

a sebetse ka matsoho a hae

ka mafolofolo.

₁₄O tshwana le dikepe

tsa bo-rakgwebo,

dijo tsa hae o di tlisa di etswa hole.

₁₅O tsoha bosiu e sa le ka matjeke,

a fepe bohle ba lelapa la hae,

makgabunyane a hae

a a abele mosebetsi.

₁₆Ha a kgahlwa ke tshimo

eba o a e reka,

a e leme morara

ka tse sebeditsweng

ke matsoho a hae.

₁₇Theka la hae o le tlama hathata,

a matlafatse le matsoho a hae.

₁₈O lemoha hore kgwebo ya hae

e a mo atla,

bosiu bo sa

bone la hae le sa tingwe.

₁₉Toloki o e tshwara

ka letsoho la hae,

tshwele a e tshware

ka monwana ha a e ohla.

₂₀Bafumanehi o ba fepa a sa kganane,

bahloki le bona a ba atswe

ka tsoho le batsi.

₂₁Ha lehlwa le kgetheha

letswalo ha a na lona,

bohle ba lapa la hae

ba apesitswe tse mofuthu;

₂₂kallane tsa moalo o itohela tsona,

aparo tsa hae

ke tsa lene e ntle, e perese.

₂₃Monna hae

o hlompheha le kgorong tsa motse,

ha a dutse teng le baholo ba naha.

₂₄O roka diaparo tsa lene e ntle

a di rekise,

le wona maqhama

bahwebi ba a reka ho yena.

₂₅Matla le seriti

ke tsona aparo tsa hae,

taba tsa kamoso tsona o a di teola!

₂₆Ha a etswa molomo

o bua ka kelello,

thuto tsa mosa

di tswe lemeng la hae.

₂₇O sedi tabeng tsa lelapa la hae,

hase mokotla o mahlo,

mohlohlwa-o-rapame.

₂₈Bana ba hae

ba ema ba re o hlohonolo,

le monna hae a rialo,

a ba a mmabatse, a re:

₂₉“Basadi ba bangata

ke basadi ba kgabane,

empa wena kaofela o a ba feta!”

₃₀Leredi ke thetsane,

botle ke lefeelafeelane;

mosadi ya tshabang Modimo

ke yena ya tla roriswa.

₃₁Mo nee moputso wa matsoho a hae,

mosebetsi wa hae

o mo rorise kgorong tsa motse.