Bible Reading Plan – Day 139

₁Veine ke moikakasi,

jwala bo baka lerata,

ya kgeloswang ke tsona

o hloka bohlale.

₂Kgalefo ya kgosi

e jwaloka tau ha e puruma,

ya halefisang kgosi o ipea tsietsing.

₃Ke tlotla ho kgaohana le diqabang,

sethoto sona ke maratahelele!

₄Sekgoba ha se ke se lema

ka nako ya teng,

ha ho kotulwa se a kopa,

ha se fumane letho.

₅Pelong ya motho

merero e ka metsi a bodiba,

ya nang le kutlwisiso

yena o a e fihlela.

₆Motho ka mong

o ithorisa ka molemo wa hae,

ya tshepahalang

yena a ka fumanwa ke mang?

₇Metsamao ya ya lokileng

ha e na kodi,

bana ba hae ba tla hlohonolofala.

₈Kgosi ha e dutse

tulong sa yona sa kahlolo,

ka mahlo a yona

e tsheka bobe bohle.

₉Ke mang ya ka reng:

“Ke hlwekisitse pelo ya ka,

nna ke hlwekile ha ke na sebe?”

₁₀Tekanyo tse pedi tse sa lekaneng,

esita le boima bo sa lekaneng,

bobedi ke manyala,

ke manyala mahlong a Morena.

₁₁Ngwana o tsejwa ka ketso tsa hae,

e ka ba tse ntle, e ka ba tse lokileng.

₁₂Tsebe e mamelang

le leihlo le bonang,

bobedi ba tsona

di entswe ke Morena.

₁₃Se rate boroko, esere wa futsaneha;

se robale, o tlo atelwe ke tjhai.

₁₄“Ha e a loka! Ha e a loka!”

ho rialo moreki.

Ha a furalla a tsamaye a ithorisa.

₁₅Kgauta e teng

le mabenyane a bohlokwa a teng,

empa molomo o bolelang tsebo

ke lehakwe la bohlokwa.

₁₆Ya itlamang ka molato wa e mong,

o mo nkele kobo ya hae,

o e bee paneng ha a itlamme

ka molato wa motho eo.

₁₇Dijo tse fumanweng ka bolotsana

di monate ho motho,

empa hamorao molomo wa hae

o tlala lehlohlojane.

₁₈Rala merero ya hao

ka ho batla keletso,

ntwa o e lwane

o se o fumane keletso.

₁₉Ya ratang ditshebo

o hlahatsa makunutu,

motho wa lehehle

eka kgona o mo kwekwetle.

₂₀Haeba motho

a rohaka ntatae kapa mmae,

bone la hae le tla tingwa

hoja ho le lefifi.

₂₁Leruo le bokellwang

ka potlako sethathong,

qetellong le ke ke

la hlohonolofatswa.

₂₂Se ke wa re:

“Bobe ke tla bo phetetsa ka bobe!”

Lebella Morena, o tla o namolela.

₂₃Tekanyo tse pedi tse sa lekaneng

ke manyala mahlong a Morena;

dikala tsa bolotsana

le tsona ha di mo thabise.

₂₄Mehato ya motho

e laolwa ke Morena,

ebe jwale motho

tsela a ka e tseba jwang?

₂₅Ho abela Morena mpho ka potlako

ke leraba ho motho,

ebe hamorao o ipelaetsa

ka boitlamo ba hae.

₂₆Kgosi e bohlale e hlokola ba kgopo,

e ba ahlole e se na kutlwelobohloko.

₂₇Bone la Morena

ke wona moya wa motho,

le bonesa bokahare

ba pelo ya motho.

₂₈Kgosi e sireletswa

ke lerato le botshepehi

terone ya yona e tsitsiswa ke lerato.

₂₉Tlotla ya batjha ke matla a bona,

moriri o moputswa

ke bokgabane ba maqheku.

₃₀Mehwabadi

ke yona pheko ya bokgopo,

meupa e hlwekisa bokahare ba pelo.

₁Pelo ya kgosi

e ka atleng tsa Morena,

o e isa moo a ratang

sa metsi a molatswana.

₂Motho o bona tsela tsohle tsa hae,

o di bona di nepahetse,

empa Morena ke yena

ya lekolang pelo.

₃Ho etsa ho lokileng

le ho phetha toka

ho amoheleha ho Morena

ho feta sehlabelo.

₄Fahleho se hwapileng

le pelo e ikgohomosang,

e leng lebone la ba kgopo, ke sebe!

₅Merero ya ya mafolofolo

e mo tlisetsa nala,

lepotlapotla lona le ikisa bofumeng.

₆Tlotlo le fumanwang

ka ho bua leshano

ke mouwane o fetang

le leraba la lefu.

₇Dikgoka tsa ba kgopo

di tla ba timetsa,

hoba ba hana ho etsa ho lokileng.

₈Tsela ya ba molato

e matswedintsweke,

boitshwaro ba ba hlokang kodi

bo otlolohile.

₉Ho molemo

ho iphelela sekgutlwaneng,

kahodima marulelo a ntlo,

ho ena le ho phela

le mmadikomang,

ho phela le yena

ka tlung e le nngwe.

₁₀Motho ya kgopo o labalabela bobe,

ha a qenehele ya ahisaneng le yena.

₁₁Ha mosomi a otlwa,

ya se nang tsebo o a hlalefa;

ha ya bohlale a rutwa,

yena o fumana tsebo.

₁₂Modimo ya lokileng

o hlahloba lapa la ya kgopo,

o timetsa ya kgopo

ka baka la bokgopo ba hae.

₁₃Ya ithibang ditsebe

ha mofutsana a lla,

le yena o tla lla,

empa a ke ke a mamelwa.

₁₄Mpho ya lekunutu

e thethefatsa bohale,

tjotjo e kgwaetsweng ka kobong,

e kokobetsa kgalefo e tlokomang.

₁₅Ha ho sebetswa ka toka

ba lokileng ba a thaba,

athe ba kgopo

bona ba tlalwa ke tshabo.

₁₆Ya kgelohang tsela ya kutlwisiso

pheletso ya hae

ke ho phomola hara bafu.

₁₇Ya hlanyetsang menyaka

o tla fumaneha,

ya ratang veine le dimenyemenye

ha a ka ke a rua.

₁₈Ya kgopo o rekiswa

bakeng sa ya lokileng,

ya sa tshepahaleng

yena bakeng sa ya kgabane.

₁₉Ho molemo

ho iphelela hara lehwatata,

ho ena le ho phela

le nkwapo, mmadikomang.

₂₀Lapeng la ya bohlale

ho tletse menono, le maruo,

athe sethoto sona

se hafaka se sa qenehele.

₂₁Ya thahasellang ho loka le lerato

o tla fumana bophelo

le toka le tlotla.

₂₂Ya bohlale

o hlasela qhobosheane ya bahale,

a heletse marako ao ba a tshepileng.

₂₃Ya kwalang molomo,

a tshwara leme la hae,

o iphemisa

hore a se kene ditsietsing.

₂₄Moikgohomosi ya mabefi

o bitswa “mosomi”,

boikakaso ba hae ha bo na tekanyo.

₂₅Takatso ya sekgoba ke lefu ho sona,

se leqe ho sebetsa,

ho sebetsa ka matsoho a sona;

₂₆se qeta letsatsi se lakatsa,

se sa fumane,

empa ya lokileng

o fana a sa kganane.

₂₇Sehlabelo sa ya kgopo

se a nyonyeha,

haholo ha a se etsa

ka morero o mobe.

₂₈Paki ya leshano e tla timela,

polelo tsa ya qalang ka ho mamela

di a amoheleha.

₂₉Ya kgopo

o sosobanya sefahleho,

ya lokileng

o hlokomela metsamao ya hae.

₃₀Ha ho bohlale, kelello, kapa morero

o ka atlehang ha Morena a sa o rate.

₃₁Pere e kwetlisetswa tsatsi la ntwa,

empa tlholo yona ke ya Morena.

₁Bitso le letle le molemo

ho feta maruo a mangata,

ho hlompheha ho molemo

ho feta silefera kapa kgauta.

₂Morui le mofutsana

ba tshwana ka sena:

Bobedi ba bona

ba bopilwe ke Morena.

₃Motho ya sedi o bona kotsi,

a e balehe;

ya se nang tsebo o hahamalla pele,

a be a yo wela.

₄Boikokobetso le ho tshaba Morena

di tlisa leruo le tlotla le bophelo.

₅Meutlwa le maraba

di tseleng ya ya kgopo,

empa ya ipaballang

yena o tla di qoba.

₆Ruta ngwana tsela ya ho phela,

ha a hodile a ke ke be a fapoha.

₇Barui ba laola mafutsana;

moadimuwa o fetoha

kgoba la moadimi.

₈Ya jalang bokgopo o kotula ditsietsi,

kgalefo ya hae

e ke ke ya mo thusa ka letho.

₉Motho ya fanang a thabile

o tla hlohonolofatswa,

hobane yena o fepa mafutsana.

₁₀Leleka mosomi

mme qabang di tla fela,

diphapang le mahlapa

le tsona di kgaotse.

₁₁Ya ratang pelo e hlwekileng,

eo polelo tsa hae di tletseng mohau,

kgosi e tla ba motswalle wa hae.

₁₂Mahlo a Morena

a fadimehela tsebo,

empa o nyopisa polelo

tsa ya sa tshepahaleng.

₁₃Sekgoba se re: “Tau ke ena kantle!”

kapa se re:

“Ke tla bolaelwa diterateng!”

₁₄Molomo wa sehlola

ke lemena le tebileng;

ya halefetsweng ke Morena

o tla wela ka ho lona.

₁₅Bothoto bo tlameletswe

ka pelong ya ngwana,

empa thupa ya tayo

e tla bo falatsa ka ho yena.

₁₆Ya tlatlapang mofutsana

ho ikekeletsa leruo,

a bile a etsetsa barui dimpho,

o tla futsaneha.

₁₇Thea tsebe

o mamele polelo tsa ba bohlale,

o ele hloko

ho ithuta tseo ke di tsebang,

₁₈hobane ho monate

ha o di boloka ka pelong ya hao,

kaofela ha tsona

di dutse molomong wa hao.

₁₉Kajeno ke hlile ke ruta wena,

wena ka seqo,

e le hore o tlo tsebe

ho tshepa Morena.

₂₀Ke o ngoletse

polelo tse mashome a mararo,

tse nang le keletso le tsebo,

₂₁tse o rutang botshepehi

le ho bua nnete,

ya o rommeng o tlo mmolelle nnete.

₂₂O se tlatlape mofutsana

hobane e le mofutsana,

o se sotle bahloki ka kgotla,

₂₃hobane Morena

o tla emela nyewe ya bona;

ba ba jeleng

le bona Morena o tla ba fedisa.

₂₄O se ke wa etsa setswalle

le motho ya bohale,

o se tlwaelane le sefelapelwana,

₂₅esere wa ithuta mekgwa ya sona,

yaba le wena o a tshwaswa.

₂₆O se ke wa ikana

ka ho etsa tshepiso,

o se itlame

ho lefa melato ya ba bang.

₂₇Ha o hloka seo o lefang ka sona

ba tla o hlakola

esita le moalo wa hao.

₂₈O se ke wa tlosa

mekolokotwane ya kgale,

e hlonngweng

ke baholoholo ba hao.

₂₉Ha o bona motho

wa setsebi sa mesebetsi,

tseba eo o tla sebeletsa dikgosi,

ha a ka ke a sebeletsa bathwana.