ISAMBULO 1

₁Isambulo sikaJesu Kristu amnika sona uNkulunkulu ukuba abonise izinceku zakhe izinto ezimelwe ukwenzeka masinyane, ethuma ngengelosi yakhe, esibonakalisa encekwini yakhe uJohane

₂owafakaza ngezwi likaNkulunkulu nangobufakazi bukaJesu Kristu, konke akubonayo.

₃Ubusisiwe ofundayo nabo abawezwayo amazwi alesisiprofetho, bagcine okulotshiweyo kuso, ngokuba isikhathi siseduze.

₄UJohane kuwo amabandla ayisikhombisa aseAsiya: Makube-kini umusa nokuthula okuvela kuye okhona nowayekhona nozayo, nakoMoya abayisikhombisa abaphambi kwesihlalo sakhe sobukhosi,

₅nakuJesu Kristu ufakazi othembekayo, izibulo labafileyo nombusi wamakhosi omhlaba. Kuye osithandayo nowasikhululayo ezonweni zethu ngegazi lakhe

₆nowasenza sibe-ngumbuso nabapristi kuNkulunkulu uYise, kuye makubeyinkazimulo namandla kuze kube-phakade naphakade. Amen.

₇Bhekani, uyeza namafu, namehlo onke ayakumbona, nabo abamgwazayo, nezizwe zonke zomhlaba ziyakulila ngaye. Yebo, Amen.

₈Mina nginguAlfa no-Omega, kusho iNkosi uNkulunkulu okhona nowayekhona nozayo, uMninimandla onke.

₉Mina-Johane, umfowenu nomhlanganyeli kanye nani ekuhluphekeni nasembusweni nasekubekezeleni kukaJesu, ngangisesiqhingini esithiwa iPhatmose ngenxa yezwi likaNkulunkulu nangenxa yobufakazi bukaJesu.

₁₀NgangikuMoya ngosuku lweNkosi, ngezwa emva kwami izwi elikhulu kungathi elecilongo,

₁₁lithi: Lokhu okubonayo kulobe encwadini, ukuthumele kuwo amabandla ayisikhombisa, e-Efesu, naseSmirna, nasePhergamu, naseThiyathira, naseSardesi, naseFiladelfiya, naseLawodikeya.

₁₂Ngaphenduka ukuba ngibone izwi ebelikhuluma nami; kuthé ngiphenduka, ngabona izinti zezibani eziyisikhombisa zegolide.

₁₃nofana nendodana yomuntu ephakathi kwezinti zezibani, embethe ingubo ekhawula ezinyaweni, ezibophé ngebhande* legolide ezibeleni;

₁₄futhi ikhanda lakhe nezinwele zakhe kumhlophe njengoboya bezimvu, njengeqhwa, namehlo akhe enjengamalangabi omlilo,

₁₅nezinyawo zakhe zifana nethusi elikhazimulayo sengathi zazishiswé esithandweni, nezwi lakhe linjengenhlokomo yamanzi amaningi;

₁₆futhi wayephethe izinkanyezi eziyisikhombisa esandleni sakhe sokunene, nasemlonyeni wakhe kwaphuma inkemba ebukhali esika-nhlangothi zombili, nobuso bakhe bunjengelanga likhanya ngamandla alo.

₁₇Ngathi ukumbona, ngawa ngasezinyaweni zakhe njengofileyo; wayesebeka isandla sakhe sokunene phezu kwami, ethi:

₁₈nophilayo; ngangifile, bheka, sengingophilayo kuze kube-phakade naphakade, futhi nginezihluthulelo zokufa nezeHayidese*.

₁₉Ngakho-ke loba okubonileyo, nokukhona, nokuzakwenzeka emva kwalokhu.

₂₀Imfihlakalo yezinkanyezi eziyisikhombisa ozibonileyo esandleni sami sokunene, nezinti zezibani eziyisikhombisa zegolide yilé: izinkanyezi eziyisikhombisa ziyizingelosi zamabandla ayisikhombisa, nezinti zezibani eziyisikhombisa zingamabandla ayisikhombisa.