VHUṰALI 7

₁Nṋe-vho ndi muthu a faho

u ḓi nga vhaṅwe;

ndi wa lutsinga lwa muthu wa u thoma

we a vhumbwa nga mavu.

Muvhili wanga wo vhumbiwa muvhilini wa mme anga,

₂nda vhumbana

nda vha muvhili na malofha nga miṅwedzi ya fumi,

zwi tshi bva kha mbeu ya munna na muḓifho wa mbingano.

₃Nṋe ndo ri u bebwa

nda fema-vho muya wonoyu une vhaṅwe vha fema,

nda wela kha ḽifhasi ḽine ḽa ri beba roṱhe;

ipfi ḽanga ḽo thoma u pfala nga u lila,

u ḓi nga nnyi na nnyi.

₄Ndo lelwa nga vhulondo

ndó putelwa nga masila.

₅A hu na khosi yo bebwaho

nga nḓila i sa fani na ya vhaṅwe;

₆nḓila ya u dzhena vhutshiloni ndi nthihi,

na ya u vhu sia ndi nthihi.

₇Zwenezwo nda rabela,

nda ṋewa ṱhalukanyo;

ndo luvhelela Mudzimu,

muya wa vhuṱali wa ḓa kha nṋe.

₈Ndo hulisa vhuṱali u fhira luḓo lwa vhuhosi na khuluṋoni,

nda vhona lupfumo lu si tshithu lu tshi vhambedzwa naho.

₉Ndo vhona hu si na nungu i no vhambedzwa naho,

hufha na musuku woṱhe u tshi tou vha thoro dzi si gathi

dza muṱavha ri tshi u vhambedza naho;

siliva i tshi vhambedzwa naho ndi matope fhedzi.

₁₀Ndo vhu funa u fhira mutakalo na lunako,

nda nanga u vha naho u fhira tshedza,

ngauri u penya haho hu dzula ho fhaṱuwa.

₁₁Zwivhuya zwoṱhe zwo ḓa kha nṋe zwi tshi fhelekedzwa ngaho,

ho nṋea lupfumo lu si na vhukono.

₁₂Nda zwi takalela zwoṱhe nge zwa ḓa na vhuṱali,

naho ndo vha ndi sa zwi ḓivhi

uri vhuṱali ndi hone mme azwo.

₁₃Zwe nda guda ndi tshi ḓidina

ndi ḓo funza vhaṅwe ndi si na vhutshivha;

a thi nga dzumbi uri vhuṱali ho pfuma hani.

₁₄Vhukuma kha vhathu ndi lupfumo lu sa fheli;

vhane vha vhu wana

vha vha khonani dza Mudzimu

vha pfi ndi vhone-vhone nga ndayo dze vha ṋewa nga hone vhuṱali.

₁₅Ngavhe Mudzimu a tshi mpha maipfi a u amba zwine Ene a funa,

ndi vhe na mihumbulo

yo fanelaho zwivhuya zwe nda zwi wana,

ngauri ndi Ene Tsumbanḓila ya u ya vhuṱalini,

a dovha a vha Ene Mulangi wa vhaṱali.

₁₆Vhukuma riṋe ri tshanḓani tshawe,

riṋe na mirero yashu,

khathihi na ṱhalukanyo yoṱhe

na nḓivho ya vhutsila.

₁₇Ndi Ene we a nṋea nḓivho ya ngoho ya zwi re hone,

uri ndi ḓivhe mavhumbelwe a tsiko

na kushumele kwa zwivhumbi,

₁₈ndi ḓivhe kuthomele kwa zwifhinga

na vhukati hazwo na hune zwa guma,

na u sielisana ha nḓila dza ḓuvha,

na tshanduko dza dzikhalaṅwaha,

₁₉na u dovholola ha miṅwaha, na vhuimo ha dziṋaledzi,

₂₀na tsiko ya dziphukha,

na kutshilele kwa zwivhanda,

na maanḓa a mimuya

na a mihumbulo ya vhathu,

na zwimela zwa tshakha-tshakha

na midzi ya miri i lafhaho.

₂₁Zwino ndi vho ṱalukanya zwoṱhe,

zwo dzumbamaho na zwi re khagala;

ndo funzwa nga vhuṱali,

hone muhumbuli wa zwithu zwoṱhe.

₂₂Kha vhuṱali hu na muya wa ṱhalukanyo,

mukhethwa, u sa fani na tshiṅwe,

wa mivhalavhala,

u no funza naho u sa phuletshedzi,

u sa dzuli wo fhumula,

u sa sii tshithu, wo kunaho,

u sa khakhisi, u sa vhaisei,

wa vhuthu, wo ṱalifhaho,

₂₃u sa imedzanwi nawo,

wa u tonda vhathu na u vha takalela,

u sa dzinginyei, u fulufhedzeaho,

wo dzikaho, wa maanḓa oṱhe,

wa u vhona zwoṱhe,

une wa sedzulusa mimuya yoṱhe yo ṱalifhaho i si na tshika

i no funza i sa phuletshedzi.

₂₄Vhuṱali vhu tshimbilesa

u fhira zwoṱhe zwi tshimbilaho,

vhu a ṱharamuwa ha nwelela kha zwoṱhe nge ha vha ho kunaho.

₂₅Vhuṱali ndi mufemo wa maanḓa a Mudzimu,

ndi nzumbululo yo kunaho ya vhugala ha Ramaanḓaoṱhe;

a hu na na tsho kumalaho tshi dzhenaho khaho.

₂₆Vhuṱali vhu sumbedza tshedza tsha lini na lini;

ndi tshivhoni tshi si na dondo

tsha maanḓa a Mudzimu a shumaho;

ndi tshifanyiso tsha vhuthu hawe.

₂₇Naho vhu vhuthihi, vhu kona zwoṱhe;

zwithu zwoṱhe vhu zwi ita zwiswa

ngeno hone vhuṋe vhu sa shanduki;

vhu ḓi dzhena kha mimuya mikhethwa

zwi tshi ya nga mirafho na mirafho,

ha vha ita khonani dza Mudzimu na vhaporofita.

₂₈Mudzimu u funa vhenevho fhedzi

vha dzulaho na vhuṱali.

₂₉Vhuṱali vhu fhira ḓuvha nga lunako,

vhu penya u fhira mulalavhungu wa ṋaledzi.

Vhu tshi vhambedzwa na tshedza, hone vhu phanḓa,

ngauri tshedza tshi sendelela swiswi, hone vhuvhi a vhu kundi vhuṱali.