VHUṰALI 6

₁Zwino inwi mahosi,

ipfani ni ṱalukanye;

inwi vhavhusi vha mashango a kule-kule,

gudani!

₂Thetshelesani inwi vhavhusi vha magogo,

inwi vhane na ṱongisa mavhuthu

e na a luvhisa!

₃Muṋe washu o ni ṋea vhuhosi,

Waṱaḓuluṱaḓulu o ni fha maanḓa.

Ene muṋe u ḓo sengulusa mishumo yaṋu,

a sedzulusa mihumbulo yaṋu!

₄Ni vhalanda vha muvhuso wawe;

arali ni sa vhusi zwavhuḓi,

kana na pfuka mulayo inwi vhaṋe,

kana na si tevhedze zwine Mudzimu a funa,

₅u ḓo ni wela kathihi fhedzi

a tshi ofhisa.

Vhahulwane vha haṱulwa

vha sa khathutshelwi.

₆Hafhu vha nyadzeaho vha lilelwa

vha khathutshelwa,

hone vha maanḓa vha ḓo tambudzwa nga maanḓa.

₇Muṋe wa vhoṱhe ha teledzi muthu,

ha ofhi vhuhulwane;

Hufha Ene muṋe o vhumba vhahulwane na vhaṱuku,

vhoṱhe u vha londola u fana.

₈Hone vha maanḓa

vho lindelwa nga tsengo i vhavhaho.

₉Zwino inwi mahosi,

maipfi anga aya ndo a livhisa kha inwi

uri ni gude vhuṱali ni si khakhe.

₁₀Vhane vha vhulunga ndayo khethwa vha dzi hulisa vhe vhakhethwa,

vha tshi haṱulwa vha ḓo pfi vhakhethwa;

vhe vha laiwa ngadzo

vha ḓo lamulelwa ngadzo.

₁₁Zwino takalelani maipfi anga,

a thetsheleseni nga mbilu yoṱhe,

a ḓo ni laya.

₁₂Vhuṱali vhu a penya, a vhu haluluwi,

vhane vha vhu funa a vha kundwi u vhu vhona,

vhane vha vhu ṱoḓa a vha kundwi u vhu wana.

₁₃Vhane vha vhu tama

vhu ḓiḓivhadza khavho vha sa athu ṱoḓa.

₁₄Ane a fhinduwa a yo vhu ṱoḓa ha nga dinwi nga tshithu,

u ḓo vhu wana

hó dzula henefho khoroni yawe.

₁₅U vhu elekanya

ndi yone ṱhalukanyo yo khunyelelaho,

ane a dzedza o vhu lindela

u ḓo mbo ḓi vhu vhona a si tsha ḽa mbilu,

₁₆ngauri vhu tendeleka vhu tshi ṱoḓa vho vhu fanelaho,

vhu swika khavho nga vhulenda hune vha kanda,

ha vha ṋea na tshine vha nga humbula vha sa athu na u humbela.

₁₇Mathomo a vhuṱali

ndi lutamo vhukuma lwa u funa u laiwa,

u swela mbilu u laiwa

ndi u funa vhuṱali,

₁₈u funa vhuṱali

ndi u vhulunga milayo yaho,

a tevhedzaho milayo yaho

ha tsha fa a sina,

₁₉u sa fa

zwi ri sendedza tsini na Mudzimu.

₂₀Zwenezwo u tama vhuṱali zwi isa muthu vhuhosini.

₂₁Zwino arali inwi mahosi na takadzwa

nga khuluṋoni na luḓo lwa vhuhosi,

hulisani vhuṱali,

ndi hone ni tshi ḓo vhusa u ya ho ya.

₂₂Zwino ndi ḓo ni vhudza zwine vhuṱali ha vha zwone

na uri ho vha hone hani.

A thi nga ni dzumbeli zwo dzumbamaho,

ndi ḓo vhu ṱoṱoredza

u bva henengei he ha simuwa hone,

nda anea zwine ra ḓivha ngaho

nda zwi vhea khagala

ndi sa pambuwi kha ngoho.

₂₃A thi pfani na vivho, ḽi a ondisa,

a ḽi konani na vhuṱali.

₂₄Shango ḽi nga tshidzwa arali ho andesa vhaṱali,

khosi ya ṱhalukanyo i dzikisa vhathu vhayo.

₂₅Zwino laiwani nga maipfi anga,

ndi hone ni tshi ḓo vhuelwa.