VHUṰALI 8

₁Vhukuma vhuṱali vhu vhusa

u bva vhusendekamisi u swika vhusendekamisi,

ha langa zwoṱhe vhu tshi zwi fhaṱa.

₂Vhuṱali ndo vhu funa nda vhu ṱoḓa u bva hanani hanga;

ndo vhofha uri ndi ḓo vhu dzhia ha vha muselwa wanga

nge nda funa lunako lwaho.

₃Vhu inga vhuḓivhalea haho

nga u kovhekana vhutshilo na Mudzimu,

ngauri Muṋe wa zwoṱhe o ḓi vhu funa tsha kale na kale.

₄Vhukuma Mudzimu o vhu dzumbululela nḓivho yawe yo dzumbamaho,

ndi hone vhu no nanga zwine a ḓo ita.

₅Vhukuma arali lupfumo

tshi tshone tshililelwa vhutshiloni,

tsho pfumaho u fhira vhuṱali ndi tshini?

Hufha mishumo yaho i tshi vhonala thungo dzoṱhe.

₆Nahone

arali hu tshi shuma ṱhalukanyo,

mutumbuli wa zwisikwa fhano shangoni ndi nnyi arali vhu si hone?

₇Arali muthu a tshi funa vhuvhuya

mitshelo ya mishumo yaho ndi vhuvhuya.

Hufha vhu hone vhu no funza vhathu u ḓilanga na vhusedzi,

na zwi re zwone

na u vha na tshivhindi;

a hu na na tshithihi vhutshiloni

tshi no farisa muthu u fhira izwo.

₈Arali muthu e na dzangalelo ḽa u ḓivha zwinzhi

ndi hone vhu ḓivhaho zwithu zwa kale,

ndi hone vhu ḓivhadzaho zwi kha ḓi ḓaho,

ndi hone vhu ṱalukanyaho maambele na phindulo dza dzithai;

vhu dzula vhu tshi ḓivha zwiga na zwimangadzo;

zwifhinga na miṅwaha

zwi putululela hone vhuṱali.

₉Zwino nda elekanya u dzhia vhuṱali uri vhu dzule na nṋe,

ndi tshi ḓivha uri vhu ḓo vha mueletshedzi wanga musi zwoṱhe zwi tshi naka,

na u vha mufhumudzi wanga musi ndi tshi ḽa mbilu kana ndo ṱungufhala.

₁₀Ndi ḓo huliswa nga magogo a vhathu zwi tshi itelwa hone,

nda huliswa nga vhahulwane

nangwe ndi tshee nga hanga.

₁₁Ndi ḓo pfi muhaṱuli makone,

vhavhusi vha tshi mmbona vha kanuka.

₁₂Vha ḓo nndindela musi ndo fhumula,

vha thetshelesa musi ndi tshi amba;

naho nda amba nda fhedza tshifhinga vha ḓo fara milomo.

₁₃Vhuṱali vhu ḓo ita uri ndi si fe,

vhane vha ḓo ntevhela vha ḓo nkhumbula lini na lini.

₁₄Ndi ḓo vhusa magogo a vhathu, tshakha dza nnduvha,

₁₅vhavhusi vha vhuhali

vha tshi pfa nga nṋe vha ḓo ofha;

ndi ḓo itela vhathu vhuthu,

nndwani nda vha na vhuhali.

₁₆Ndí pfamoni yanga ndi ḓo awela tsini naho,

ndi tshi konana naho a thi nga dinalei,

ndi tshi dzula naho a thi nga ṱungufhali,

ḽi ḓo tou vha dakalo na bembelo.

₁₇Musi ndo no elekanya zwithu izwi mbiluni yanga,

ndó no vhona uri muthu a vha shaka ḽa vhuṱali ha tsha fa,

₁₈a vha khonani yaho u takala tshoṱhe,

mishumo ya zwanḓa zwaho i na lupfumo lu sa fheli,

wa ḓowelana naho u vha na ṱhalukanyo,

wa amba naho u ḓo vha na bvumo

ndó no vhona izwo

nda tendeleka ndi tshi vhu ṱoḓa.

₁₉Ndo vha ndi ṅwana o dzulaho o takala;

Mudzimu o vha o nṋea muya muvhuya

₂₀kana nge nda vha muvhuya,

nda wana muvhili u songo kumalaho.

₂₁Huno nga u vhona

uri ndi nga si wane vhuṱali

arali ndi songo vhu ṋewa nga Mudzimu,

zwine na zwenezwo zwa vha tsumbo ya ṱhalukanyo ya u ḓivha uri

tshifhiwa itsho tsha vhuṱali tshi bva kha nnyi –

nga u ḓivha zwenezwo nda ya ha Muṋe washu nda mu humbela,

nda amba nga mbilu yanga yoṱhe nda ri: