Tsioni
1Thobithi a ṅwala thabelo iyi ya dakalo a ri,
“Nga hu rendwe Mudzimu a tshilaho lini na lini;
muvhuso wawe a u gumi!
2Ndi Ene ane a ri rwa,
ndi Ene ane a ri pfela vhuṱungu.
U tsisela muthu fhasi-fhasi dindini,
a dovha a mu bvisa ndozwoni.
A hu na ane a nga ponyoka tshanḓa tshawe.
3Mu rendeni inwi Vhaisraele,
vhannḓa vha tshi zwi vhona;
naho a ni balanganya vhukati havho,
4na henefho o ḓi ni sumbedza vhuhulwane hawe.
Mu huliseni phanḓa ha vhoṱhe vha tshilaho,
ndi Ene Muṋe washu na Mudzimu washu,
Khotsi ashu, Mudzimu wa lini na lini.
5Naho o ni rwela vhuvhi haṋu,
u ḓo dovha a ni pfela vhuṱungu noṱhe.
U ḓo ni kuvhanganya kha dzitshakha
hoṱhe he na balanganyelwa hone.
6Arali ni tshi vhuelela khae
nga mbilu yoṱhe na muya woṱhe,
a vhona ni si na vhufhura,
ndi hone na Ene a tshi ḓo vhuelela kha inwi,
a si tsha ni dzumbela tshifhaṱuwo tshawe.
Zwino humbulani zwe a ni tonda,
ni mu livhuhe ni tou ṱavha mukosi.
Rendani Muṋe washu a sa khakhi,
ni hulise Khosi ya lini na lini.
Nṋe ndi mu renda shangoni he nda thubelwa hone,
nda sumbedza lushakha lwo tshinyaho maanḓa awe na vhugala hawe.
Inwi vhatshinyi vhuyani!
Ni songo mu hoya:
khamusi a nga ni itela vhuthu,
a ni khathutshela.
7A vha nṋe ndi hulisa Mudzimu wanga,
mbilu yanga i pembelela Khosi ya ḽiṱaḓulu.
8Ndimi dzoṱhe nga dzi bule vhuhulwane hawe,
vha mu rende Jerusalema.
9Iwe Jerusalema muḓi mukhethwa,
o u rwa nga nnzwa
a tshi u rwela mishumo yau,
hone u ḓo dovha a khathutshela
vhana vha vhathu vha si na muhoyo.
10Rendani Muṋe washu nga he zwa mu fanela,
rendani Khosi ya lini na lini,
uri thembele yawe i fhaṱwe Jerusalema ni pembele.
Mathubwa oṱhe u ḓo a fhumudza
a vha vhuedzedza kha iwe Jerusalema,
vho ṱungufhalaho a vha ṋea dakalo kha iwe,
zwi tshi ya nga mirafho na mirafho.
11Ḽifhasi ḽoṱhe nga he ḽa guma
ḽi ḓo penyelwa nga tshedza,
tshakha nnzhi dzi ḓo ḓa ha iwe dzi tshi bva kule,
na vhathu vha ḽifhasi ḽoṱhe nga he ḽa kanda,
nga u funa u dzula tsini na dzina ḽikhethwa
ḽa Mudzimu Muṋe washu,
vha ḓa vhó hwala thwala dza Khosi ya ḽiṱaḓulu.
Murafho muṅwe na muṅwe
u ḓo pembela ngomu hau,
dzina ḽau iwe Munangiwa
ḽi ḓo ḓi pfala lini na lini.
12Vhane vha u ḽela vhuhali vha ḓo teketelwa,
ho teketelwa vhane vha u lozwa
vha wisa mitsheṱo yau,
vha thutha thawara dzau,
vha fhisa nnḓu dzau nga mulilo!
Hone mashudu lini na lini vhoṱhe vhane vha u vusa.
13Ndi hone u tshi ḓo pembelela vhana vha vhavhuya,
vha ḓo khunyelela kha iwe,
vha renda Muṋe washu wa lini na lini.
14Mashudu vhane vha u funa,
mashudu vha no pembela zwi tshi u nakela.
Mashudu vhoṱhe vhane vha ḓo u lilela,
vha tshi vhona ṱhamu yau i vhavhaho!
Hu si kale vha ḓo pembela-vho na iwe,
musi vha tshi vhona mashudu au a misi i ḓaho.
15Muya wanga u renda Muṋe washu,
Ene Khosi khulwane;
16Jerusalema u ḓo dovha wa vuswa
thembele yawe ya si tsha thuthwa lini na lini.
Ndi mashudu mangafhani
arali ha sala shaka ḽanga ḽithihi zwaḽo,
a sala a vhona vhugala hau,
a renda Khosi ya ḽiṱaḓulu!
Khoro dza Jerusalema dzi ḓo fhaṱwa
nga matombo a safire na a muroxwe,
mitsheṱo yau yoṱhe ya fhaṱwa
nga matombo a mutengo muhulu.
Thawara dza Jerusalema dzi ḓo fhaṱwa nga musuku,
vhuimavhahali ha fhaṱwa nga musuku u songo vangwaho.
17Mikotoni ya Jerusalema
vhathu vha ḓo kanda ho vhumbelelwaho nga nungu na matombo a Ofiri.
18Khoro dza Jerusalema dzi ḓo bvuma nga nyimbo dza dakalo,
nnḓu dzawo dzoṱhe dza ṱavha mukosi dza ri,
‘Haleluya!
Nga hu rendwe Mudzimu wa Israele!
Nga a rendwe zwi tshi ya nga mirafho na mirafho!’
Ngomu hau vha ḓo renda dzina ḽawe ḽikhethwa
lini na lini.”
