THOBITHI 14

₁Tshirendo tsha Thobithi tshi fhela nga u ralo.

Thobithi o ṱuwa fhano shangoni e na miṅwaha ya ḓana na fumi na mivhili (112), a swiṱwa muḓini wa Ninive, vhathu vhoṱhe vha ḓa u mu hulisa. ₂Musi a tshi pofula o vha e na miṅwaha ya mahumi maṱanu na liṱhihi na mivhili (62), musi o no fhola a tshi vho vhona a tshila nga vhugala, a tshi ṋea vhashai zwifhiwa, a tshi ḓi renda Mudzimu a tshi khoḓa vhuhulwane hawe.

₃Musi o no kalaha, e tsini na u fa, a vhidza murwa wawe Thobiasi na vhana vha Thobiasi vhaṱanu na vhavhili, a mu laya a ri,

₄“Thobiasi ṅwananga, dzhia vhana vhau u shavhele Media, ngauri ndi tenda ipfi ḽa Mudzimu ḽo ambiwaho nga Nahumi ḽi tshi ri Ninive u ḓo fhalala. Zwoṱhe zwi ḓo itea. Zwoṱhe zwe vhaḓinḓa vha Mudzimu vhaporofita vha Israele vha amba zwi ḓo kumba Ashuru na Ninive, a hu na na tshithihi tsha zwo ambiwaho tshine tsha sa ḓo khunyelela, tshiṅwe na tshiṅwe tshi ḓo itea nga tshifhinga tshatsho tsho vhewaho. Media ḽi ḓo vha ḽo lala u fhira Ashuru na Babilonia. Nṋe ndi a ḓivha na u tenda uri zwe Mudzimu a amba zwi ḓo khunyelela. Zwi ḓo itea, a hu na ipfi na ḽithihi ḽa vhuporofita ḽi no ḓo wela fhasi.

“Vha nga vha Majuda nga riṋe vha no dzula Israele, vhoṱhe vha ḓo vhaliwa, vha hwalwa shangoni ḽavho ḽavhuḓi vha iswa vhuthubwani. Shango ḽoṱhe ḽa Israele ḽi ḓo sala ḽi si na muthu, Samaria na Jerusalema hone hu ḓo sala hu soga! Nnḓu ya Mudzimu i re henefho i ḓo fhiswa ye lore, ha vhuya ha fhela tshifhinga i sa dzheni muthu. ₅Hone Mudzimu u ḓo dovha a vha khathutshela, a vha vhuedzedza shangoni ḽa Israele. Vha ḓo vusa iyo thembele, naho i sa nga fani na ya u ranga, ha vhuya ha khunyelela tshifhinga tsho vhewaho. Ngavhuya vhoṱhe vha ḓo vhuya vha tshi bva vhuthubwani, vha vusa Jerusalema wa vha na vhugala hawo hoṱhe ha kale. Hu ḓo vuswa na nnḓu ya Mudzimu ngomu hawo, nga he zwa ambiwa nga vhaporofita vha Israele vha tshi amba yone. ₆Vhathu vha tshakha dzoṱhe dza ḽifhasi vha ḓo rembuluwa, vha luvha Mudzimu vha sa hoyi. Vhoṱhe vha ḓo ṱutshela midzimu yavho ya zwifanyiso ye ya vha khakhisa. ₇Vha ḓo renda Mudzimu wa lini na lini vha sa hoyi. Vhaisraele vhoṱhe vhane vha ḓo vha vho tshidzwa misi yeneyo, vha ḓo humbula Mudzimu lwa ngoho, vha ḓo kuvhanganywa vha ya Jerusalema, vha dzula shangoni ḽa Abrahamu, ḽó lala, vha ṋewa ḽone ḽa vha ḽavho. Vhane vha funa Mudzimu nga mbilu yoṱhe vha ḓo pembela, hone vhane vha tshinya vha ita vhuvhi a vha tsha ḓo vha hone ḽifhasini.

₈“Zwino vhananga, ndi a ni laya ndi ri: shumelani Mudzimu ni sa hoyi, ni ite zwine zwa mu takadza. Ni funze vhana vhaṋu u ita zwi re zwone na u ṋea vhashai zwifhiwa, na u dzula vha tshi humbula Mudzimu, misi yoṱhe vha rende dzina ḽawe nga nungo dzoṱhe vha sa hoyi.

₉“Zwino ṅwananga, pfuluwa hafhano Ninive, u songo sala fhano. ₁₀Ḓuvha ḽeneḽo ḽine wa swiṱa mme au tsini hanga, u songo tsha lala fhano, u songo tsha lenga shangoni ḽino hune nda khou vhona hu tshi vhusa vhuvhi na vhufhura vhathu vha sa vhuyi vha shona. Humbula zwoṱhe ṅwananga zwe Nadaba a ita Ahikhara, ene we a mu alusa! A thi ri o kombetshedza Ahikhara u dzumbama tshaloni a tshi khou tshila! Nangwe zwo ralo Mudzimu o ita uri tshiṱuhu tsha Nadaba tshi ofhisaho tshi mu ḽe ṱhoho; Ahikhara o dovha a bva a vhona tshedza, hone Nadaba o dzhena swiswini ḽa lini na lini, nge a linga u vhulaha Ahikhara. Ahikhara o ponyoka tshifuni tshe a retshelwa nga Nadaba, nge a ṋea vhashai zwifhiwa. Hone Nadaba ene muṋe o wela tshifuni, khunḓa ya fasha muvei. ₁₁Zwino vhananga, ni vhe na nzhele, ni vhone uri u tonda vhashai zwi na mitshelo-ḓe, na uri vhuvhi vhu ḓisa mini: vhu a vhulaha! Hone zwino muya wanga u khou nṱutshela.”

₁₂Vha ladza Thobithi vhulaloni hawe a fa. A swiṱwa nga khuliso. Musi mme a Thobiasi vha tshi fa, Thobiasi a vha swiṱa tsini na khotsi awe. Ndi hone Thobiasi a tshi pfuluwa na mufumakadzi wawe na vhana vhawe vha livha shangoni ḽa Media, a yo dzula na makhulu wawe Reguele, muḓini wa Ekhibathana. ₁₃Thobiasi a hulisa vhomakhulu wawe Reguele na Edina a vha londola, a vhuya a vha swiṱa muḓini wa Ekibathana kha ḽa Media. Ndi hone a tshi vha muḽaifa wa thundu ya Reguele na ya khotsi awe Thobithi. ₁₄Thobiasi a lalamesa a tshi huliswa nga vhoṱhe, a fa e na miṅwaha ya ḓana na fumi na miṱanu na mivhili (117). ₁₅Hone musi a sa athu fa, a pfa zwa ndozwo ya Ninive, a vhona na mathubwa o thubwaho Ninive musi Kiakhasarese khosi ya Media a tshi vha khada vhe zwivhoxwa a vha isa vhuthubwani Media. Thobiasi a renda Mudzimu a tshi humbula zwoṱhe zwe a ita a tshi laṱisa vhadzulapo vha Ninive na vha Ashuru. O kona u pembelela u fhalala ha Ninive a tshi kha ḓi tshila, a renda Mudzimu Muṋe washu lini na lini. Amen.