Rafaele a tshi ḓiamba
1Musi vhuṱambo ha mbingano ho no fhela, Thobithi a vhidza murwa wawe Thobiasi, a mu vhudza a ri, “Ṅwananga, munna uyu we a u fhelekedza mu ṋee zwo mu fanelaho, u ite na u phaphelela malamba awe.” 2Thobiasi a ri, “Baba, ndi ḓo mu holela vhungana? Naho nda mu ṋea hafu ya thundu ye ra vhuya nayo, ndi ḓo ḓi pfa ho tondiwa nṋe. 3O nnyendedza nda vhuya ndo tsireledzea, o lafha mufumakadzi wanga, na mali o vhuya nayo, a ita na u fhodza vhone. Malamba awe ndi ḓo a phaphelela nga vhungana?” 4Thobithi a fhindula a ri, “Zwi nga vha zwavhuḓi ṅwananga arali a tshi nga ṋewa hafu ya zwoṱhe zwe a vhuya nazwo.” 5Ndi hone Thobiasi a tshi vhidza Rafaele a ri, “Dzhiani hafu ya zwoṱhe zwe na vhuya nazwo a vhe one malamba aṋu, ni tshimbile nga mulalo.”
Nyeletshedzo
6Rafaele a vhidzela vhanna avho vhavhili thungo a vha vhudza a ri, “Rendani Mudzimu! Ḓivhadzani zwivhuya zwinzhi zwe a ni itela ni tshi pfiwa nga vhoṱhe vha tshilaho. Khoḓani ni rende dzina ḽawe nga nyimbo. Ḓivhadzani vhathu vhoṱhe mishumo ya Mudzimu; vhukuma zwo mu fanela. Ni songo neta u mu livhuha. 7Tshidzumbe tsha khosi ri ita zwone ri tshi dzula ro tshi dzumba, hone mishumo ya Mudzimu nga i ḓivhadzwe i dzumbululwe; vhukuma zwo mu fanela. Itani zwivhuya, ndi hone ni sa ḓo welwa nga khombo. 8U rabela u tshi ḓidzima zwiḽiwa na u ṋea vhashai zwifhiwa nga mbilu i si na vhufhura zwi fhira lupfumo lwo vangana na vhuvhi. U tonda vhashai zwi fhira u ḓikhokhela musuku. 9Ndi uri u tonda vhashai zwi tshidza muthu lufuni zwa pfumelela vhuvhi hoṱhe. Vhane vha tonda vhashai vha ḓo lalama, 10hone vhatshinyi na vhaitazwivhi vha ḓiṱulela khombo.
Rafaele a tshi ḓiamba
11“Zwino ndi ḓo ni vhudza ngoho yoṱhe, a thi nga ni dzumbeli tshithu. Ndo no ḓi ni vhudza nda ri ndi zwavhuḓi u dzumba tshidzumbe tsha khosi, hone mishumo ya Mudzimu i fanela u dzumbululwa nga khuliso yo fanelaho. 12Zwino ndi nga ni vhudza uri musi inwi Thobiasi na Sara ni tshi khou rabela ndi nṋe we nda swikisa thabelo yaṋu vhugalani ha Muṋe washu. Zwi ḓi nga zwiḽa ni tshi ḓi swiṱa vhafu, 13musi ni tshi takuwa na sia tshiswiṱulo ni tshi yo swiṱa vhafu ni sa timatimi, 14ndi nṋe we nda vha ndo rumiwa uri ndi ni linge. Nda dovha nda vha nṋe we Mudzimu a nthuma uri ndi ni fhodze, ndi fhodze na mazwale waṋu Sara. 15Ndi nṋe Rafaele, muṅwe wa vharuṅwa vhaṱanu na vhavhili vhane vha dzhena vhugalani ha Muṋe washu vha mu shumela.”
16Vhanna avho vhavhili vha farwa nga nyofho, vha shuvhama. 17Hone Rafaele a vha vhudza a ri, “Ni songo ofha, mulalo u vhe na inwi. Rendani Mudzimu misi yoṱhe. 18A vha nṋe, musi ndo vha ndi na inwi, a tho ngo tou ḓiruma, ndo vha ndo ruṅwa nga Mudzimu. Ndi Ene ane na fanela u mu renda na u mu livhuha vhutshilo haṋu hoṱhe. 19Zwiḽa ni tshi mmbona ndi tshi khou ḽa na inwi, vhukuma ndo vha ndi sa khou ḽa, no vha ni tshi khou tou vhona bono. 20Zwino rendani Mudzimu ḽifhasini ni mu livhuhe. Zwino ndi khou gonya ndi vhuelela ha we a nthuma. Inwi ṅwalani zwoṱhe zwe zwa itea.” 21Ndi hone Rafaele a tshi gonya ṱaḓulu, vhone vha takuwa vha ima, vha si tsha mu vhona. 22Vhone vha ḓi endela u renda Mudzimu nga nyimbo, vha tshi livhuha mishumo iyo i mangadzaho ye a shuma, ngauri muruṅwa wa Mudzimu o ḓa khavho.
