SIRAKHA 9

₁Mufumakadzi wa mbiluni yau

u songo mu itela lulindo,

u sa ḓo mu funza u u vhaisa.

₂U songo ṋea musadzi na muthihi maanḓa a u langa,

a sa vho ḓo u langa tshoṱhe.

₃U songo konana na musadzi wa phombwe,

u sa ḓo dzhena zwikwekweni zwawe.

₄U songo ḓowelana na musidzana wa muimbi,

u sa ḓo fashwa nga vhumbulu hawe.

₅U songo ṱalela musidzana nga u mu emula,

ni sa ḓo ḓidzhenisa mulanduni muthihi vhuvhili haṋu.

₆U songo ḓikumedza dziphombwe,

u sa ḓo lovhisa ifa ḽau.

₇U songo ṱalela mikoto ya muḓi,

u songo tendeleka na mikoto i si na vhathu.

₈Pfulusa maṱo au kha musadzi wa lunako,

u songo ṱalela lunako lwa mufumakadzi wa muṅwe.

Ho no lovha vhanzhi nga lunako lwa musadzi,

nyemulo dzazwo dzi fhisa unga mulilo.

₉U songo swiṱula na musadzi o vhingwaho,

kana wa tshingamela ḓafulani nae wa nwa waini,

mbilu yau i sa ḓo tswiwa ngae,

wa ḓihangwa wa dzhena khomboni.

₁₀U songo laṱa khonani ya kale;

khonani ntswa i nga si vhambedzwe nae.

Khonani ntswa i nga waini ya tuvhu,

i ḓifha yo no vha nashana.

₁₁U songo tama bvumo ḽa muvhi,

a u ḓivhi khombo yo mu lindelaho.

₁₂U songo ḓiphiṋa

nga zwine zwa takadza muthu a no nyadza Mudzimu;

elelwa uri a nga si vhuye a fa á songo laṱiswa.

₁₃Ivha kule na munna a re na maanḓa a u vhulaha muṅwe,

ndi hone u sa ḓo dzula u tshi ofha lufu.

Huno arali wa sendela khae,

u sedze hune wa kanda, a sa ḓo u vhulaha.

ḓivha uri u khou kanda vhukati ha zwikwekwe,

u khou tshimbila nṱha ha mulavhu.

₁₄Pfana na vhadzulelani vhau nga hune wa kona;

u eletshedzane na vhaṱali.

₁₅Konana na vho thanyaho,

ni ambe nga mulayo wa Muṋe washu kha mihani yaṋu yoṱhe.

₁₆Vha si na vhufhura

nga vha vhe khonani dzine wa ṅwata nadzo,

goliso ḽau nga ḽi vhe u ofha Mudzimu.

₁₇Mushumi wa vhutsila u khoḓelwa mushumo wawe,

hone murangaphanḓa wa vhathu, nungo dzawe dzi mulomoni.

₁₈Muthu wa luambo u a ofhiwa muḓini,

vavhi ḽi a nyaliwa.