SIRAKHA 8

₁U songo imedzana na muḓivhalea,

wa vho ḓo wela zwanḓani zwawe.

₂U songo luṱana na mupfumi,

a sa ḓo u tsika nga lupfumo lwawe.

Hufha musuku wo kombodza vhanzhi,

wa xedza mihumbulo ya mahosi.

₃U songo hanedzana na muthu a ambesaho,

u sa ḓo khuṱhedza mulilo wawe.

₄U songo ḓowelana na ḽihwarahwara,

a sa ḓo nyefula vhomakhulukuku wau.

₅U songo sathula muvhi o laṱaho vhuvhi hawe,

elelwa uri roṱhe ri na mulandu.

₆U songo nyadza muthu o no vhaho wa maḓuvha,

hufha vhaṅwe vhashu na vhone vha tshi ḓo tshena mmvi.

₇U songo pembelela lufu lwa muṅwe,

u songo hangwa uri roṱhe ri ḓo fa.

₈U songo nyadza nyambo ya vhaṱali,

u gude mirero yavho.

U ḓo wana ndayo khavho,

wa kona u shumela vhahulwane.

₉U songo landula mvelele ya vhakalaha

ye vha i guda kha vhokhotsi avho;

u ḓo wana nḓivho khavho

wa kona u fhindula zwo fanelaho.

₁₀U songo honza khuni dza muvhi,

u sa ḓo fhiswa nga khavhu ya mulilo wawe.

₁₁U songo tenda muthu wa u ḓihudza a tshi u ṱunga,

a sa ḓo u fasha nga maipfi au.

₁₂Muthu a no u fhira nga maanḓa u songo mu hadzima tshithu,

wa mu hadzima, sokou zwi hangwa.

₁₃U songo ḓivhofha u lifhela muṅwe mulandu u no fhira zwine wa vha nazwo,

wa ḓivhofha, ḓiimisele u lifha.

₁₄U songo hwelela muhaṱuli,

hu sa ḓo pembela ene.

₁₅U songo fara lwendo na ḽihwarahwara,

a sa ḓo vha muhwalo wau.

A nga sokou tevhedza vhuhwarahwara hawe,

noṱhe na sala ni si na tshaṋu.

₁₆U songo hanedzana na muthu wa mbiti,

u songo mu tevhela hu si na vhathu;

u shulula malofha ene u vhona hu si tshithu,

ha sa vha na mulamuleli u ḓo u vhulaha.

₁₇U songo eletshedzwa nga tsilu,

a ḽi na tshidzumbe.

₁₈U songo tenda mutsinda a tshi ḓivha tshidzumbe tshau,

a u ḓivhi zwine a ḓo zwi dzumbulula.

₁₉Mbilu yau

u songo sokou i bvukululela vhoṱhe,

kana wa vha humbela u u thakha.