SIRAKHA 10

₁Muvhusi wa vhuṱali

u funza vhathu vhawe,

u gudisa vhalanda vhawe u hulisa milayo.

₂Muhaṱuli u edziswa nga magota awe,

muvhusi wa muḓi u edziswa nga vhadzuli vhawo.

₃Khosi i songo laiwaho i lozwa vhathu vhayo,

muḓi u bvela phanḓa nga vhuṱali ha vhavhusi vhawo.

₄Muvhuso wa ḽifhasi u zwanḓani zwa Muṋe washu,

u vhea munna

o fanelaho tshifhinga tshenetsho a vhusa.

₅U kona ha muthu hu zwanḓani zwa Muṋe washu.

Ndi Ene ane a ambadza vhahulwane khuliso.

₆U songo fara wa hau nga mbilu

kha tshiṅwe na tshiṅwe tshine a nga khakha,

u songo vhuya wa ita tshithu wó sinyuwa.

₇U ḓihudza hu sandwa nga Muṋe washu na vhathu,

na u piringanya khaṱhulo vha a hu vhenga.

₈Muvhuso u a sudzuluswa

u tshi bva kha luṅwe lushaka wa iswa kha luṅwe,

nga mulandu wa u piringanya khaṱhulo, na u ḓihudza na lupfumo.

₉Muthu ane a vha buse na milora a nga ḓihudza ngani?

Hufha mala awe a tshi nukha nangwe a tshi kha ḓi tshila.

₁₀Vhulwadze vhu sa fholi vhu dzumbulula vhutsilu ha dokotela;

khosi ya ṋamusi ndi tshitumbu tsha matshelo.

₁₁Musi vhathu vha tshi fa,

ifa ḽavho ndi ḽithihi:

ndi zwikhokhonono na mavhanda na mbungu.

₁₂U ḓihudza hu thoma nga u landula Mudzimu,

mbilu yau ya furalela Muvhumbi wau.

₁₃Vhunga u ḓihudza hu tshi thoma nga vhutshinyi,

ane a vhu nambatela u ḓo ṱanza tshika.

Ndi zwine Mudzimu a laṱisa vhatshinyi vhá songo humbula,

a vha lozwa tshoṱhe.

₁₄Muṋe washu u tekula khuluṋoni dza vha u ḓihudza,

a vhea vha ḓiṱukufhadzaho vhudzuloni havho.

₁₅Muṋe washu u tupula vha ḓihudzaho,

vhudzuloni havho a ṱavha vha ḓiṱukufhadzaho.

₁₆O phusukanya mashango a dzitshakha,

a dzi pwashekanya a guma nga miteo.

₁₇Vhuṱala ha vha u ḓihudza Mudzimu u vhu swielela kule,

a vha thutha vha si tsha humbulwa ḽifhasini.

₁₈U ḓihudza a ho ngo sikelwa muthu,

na mbiti dzo pwasheaho a dzo ngo sikelwa

vho bebwaho nga musadzi.

₁₉Lushaka lwo fanelaho u huliswa ndi lufhio?

Ndi lwa vhathu.

Lushaka lwo fanelaho u huliswa ndi lufhio?

Ndi vhane vha ofha Mudzimu.

Lushaka lwo fanelaho u nyadziwa ndi lufhio?

Ndi lwa vhathu.

Lushaka lwo fanelaho u nyadziwa ndi lufhio?

Ndi vhane vha pfuka milayo ya Mudzimu.

₂₀Murangaphanḓa u huliswa nga vha hawe;

ane a ofha Muṋe washu u huliswa nga Muṋe washu.

₂₁A nga vha e mupfumi kana muḓivhalea, kana mushai,

vhugala hawe ndi u ofha Muṋe washu.

₂₂A si zwone u nyadza muṱali arali e mushai,

nahone a si zwone u hulisa mutshinyi.

₂₃Mupfumi, muhaṱuli, muvhusi, vhoṱhe vha a huliswa,

hone a hu na a no fhira a ofhaho Muṋe washu.

₂₄Musi vhaḓilangi vha tshi shumela phuli ya vhuṱali,

munna wa nḓivho ha zwi soli.

₂₅U songo ṱana vhuṱali hau u tshi shuma mishumo yau,

musi u tshi ṱangana na vhuleme u songo ḓiita muthu-muthu.

₂₆Ndi khwiṋe u vha mushumi wa biko a sa shayi tshithu,

u fhira a no ḓiita ene-ene a si na na zwiḽiwa.

₂₇Ṅwananga, u songo ḓifhima uri u muthu-muthu,

ḓivhee ho u fanelaho.

₂₈Ndi nnyi ane a nga takalela ane a ḓihuvhadza?

Ndi nnyi ane a nga hulisa muthu ane a si ḓiṱhonifhe?

₂₉Mushai u huliselwa vhuṱali hawe,

u ḓi nga mupfumi a tshi huliselwa lupfumo.

₃₀Arali mushai na vhushai háwe a tshi huliswa,

a tshi vho pfuma, zwi ḓo tou ngani?

Arali mupfumi na u pfuma háwe a tshi nyadziwa,

a tshi vho shaya zwi ḓo tou ngani?