SIRAKHA 7

₁U songo ita zwivhi,

ndi hone u sa nga welwi

nga zwithu zwivhi.

₂ṱutshela vhuvhi,

na hone vhu ḓo u ṱutshela.

₃U songo zwala tsimuni ya vhuvhi,

u sa ḓo vhu kaṋa kaṱanu na kavhili.

₄U songo ṱoḓa vhuimo vhuhulwane kha Muṋe washu,

na khosi u songo i humbela vhudzulo ha u huliswa.

₅U songo ṱanela Muṋe washu vhuvhuya hau,

u songo sumbedza khosi vhuṱali hau.

₆U songo itwa muhaṱuli,

nga u luka vhunwa

u sa ḓo kundwa u tupula vhuvhi,

kana wa ita tshiṱalula wa imelela muḓivhalea,

wa wanala ú songo tsha fulufhedzea.

₇U songo khakhela lushaka

wa vho ḓo nyadziwa nga vhoṱhe.

₈U songo tshinya luvhili,

hufha na luthihi u sa nga bvi ú songo rwiwa.

₉U songo ri, “Mudzimu u ḓo takalela nduvho dzanga nnzhi,

Waṱaḓuluṱaḓulu ha nga kundwi u ṱanganedza zwiṱhavhelo zwanga.”

₁₀U tshi rabela u songo timatima,

u songo litsha u ṋea vhashai zwifhiwa.

₁₁U songo sea muthu o vhaisalaho mbiluni,

elelwa Ene ane a ṱukufhadza a dovha a hulisa.

₁₂U songo ṱanzilela mazwifhi wa vhaisa ṅwana wa khotsi au kana khonani yau.

₁₃U songo zwifhelela muthu;

mazwifhi ha na tshivhuya.

₁₄Tshivhidzoni tsha vhahulwane u songo ambesa.

U tshi rabela u songo dovholola maipfi au.

₁₅U songo nyala mishumo i lemelaho, kana ya u lima;

i bva kha Waṱaḓuluṱaḓulu.

₁₆U songo ḓibaḓekanya na vhavhi,

elelwa uri Mudzimu ha nga lengi u vha lifhedza.

₁₇Ḓiṱukufhadze zwihulu;

tsho lindelaho muvhi ndi mulilo na mbungu.

₁₈U songo luṱana na khonani u tshi itela bindu ḽa mali,

kana wa luṱana na ṅwana wa khotsi au u tshi itela musuku wa Ofiri.

₁₉U songo ṱala mufumakadzi wavhuḓi wa ṱhalukanyo,

u vha nae na vhuthu hawe zwi fhira musuku.

₂₀U songo tambudza phuli i fulufhedzeaho,

kana mulanda o ḓikumedzaho mushumo wau.

₂₁Funa phuli yau ya vhuṱali nga mbilu yau yoṱhe,

u songo mu hanela u vhofholowa.

₂₂Arali u na zwifuwo, zwi londole;

arali zwi tshi u vhuedza, dzula nazwo.

₂₃Arali u na vhana, vha laye,

vha khothe mitsinga u bva hanani.

₂₄Arali u na vhananyana, vha linde vhukuma,

u songo vha tsinyela ḽiṱo.

₂₅Wa dzekisa ṅwananyana wau

u ḓo vha wo fhedza mushumo muhulu,

hone mu ṋee munnanna.

₂₆Arali u na mufumakadzi ane a u takadza,

u songo mu ṱala,

hone arali ni tshi nyalana, u songo mu fulufhedza.

₂₇Hulisa khotsi au nga mbilu yau yoṱhe,

u songo hangwa vhuṱungu

he mme au vha vhu pfa vha tshi u beba.

₂₈Elelwa uri ndi vhone vho u bebaho,

zwoṱhe zwe vha u ṋea u nga vha lifhela ngani?

₂₉Ofha Muṋe washu nga muya wau woṱhe,

u hulise na vhaphrista vhawe.

₃₀Funa Muvhumbi wau nga nungo dzau dzoṱhe,

u songo ṱutshela vhaḓinḓa vhawe.

₃₁Ofha Muṋe washu u ṱhonifhe muphrista,

mu ṋee mukovhe wawe nga he wa laiwa:

Mitshelo ya u ranga na nduvho ya u pfumelelwa,

na nduvho ya mavoho a zwifuwo,

na tshiṱhavhelo tsha u u ita mukhethwa,

na mitshelo ya u ranga ya zwithu zwikhethwa.

₃₂U ite na u ṋea vhashai zwifhiwa u si na vhutshivha,

uri mashudu au a vhe o fhelela.

₃₃U vhe mapakulile kha vhoṱhe vha tshilaho,

na vhafu u songo litsha u vha itela vhuthu,

u vha swiṱe nga khuliso.

₃₄U songo tinya vhalidzi,

lila na vha lilaho.

₃₅U songo litsha u dalela vhalwadze;

u ḓo funelwa zwenezwo.

₃₆Kha zwoṱhe zwine wa ita,

elelwa uri u ḓo vhuya wa fa,

ndi hone u sa ḓo tshinya.