SIRAKHA 6

₁ngauri arali wo ḓitshinya dzina u ḓo nga muvhi wa muya wa murwelahoṱhe,

wa shona wa solwa nga vhathu.

₂U songo hwalwa nga phapha dza mbiti,

dzi sa ḓo ṱhukhukanya nungo dzau unga mboho.

₃Dzi ḓo ḽa maṱari au,

dza kandekanya mitshelo yau,

iwe wa sala u thanda yo omaho.

₄Mbiti dzi lozwa muṋe wadzo,

dza ita uri maswina awe vha mu see.

₅Kuambele kwa vhulenda ku andisa dzikhonani,

wa amba nga khuliso u ḓo fhindulwa nga vhuthu.

₆Konana na vhathu vhanzhi,

hone mueletshedzi u nange muthihi kha tshigidi.

₇Arali u tshi vha na khonani,

ranga u mu linga,

u songo ṱavhanyedza u mu fulufhedza,

₈ngauri khonani dziṅwe dzi londa zwadzo fhedzi,

hone musi wa khombo dzi a u ṱamba.

₉Dziṅwe dzi shanduka maswina,

dza mbo ḓi zwi anea vhathuni, iwe wa shona.

₁₀Iṅwe ndi khonani ya zwiḽiwa,

hone musi wa khombo ya u ṱamba.

₁₁Musi zwi tshi u nakela, ndi murunzi wau,

u langa vhalanda vhau;

₁₂hone musi wo welwa nga khombo u a u shandukela,

a tshi u vhona a pambuwa.

₁₃Ivha kule na maswina au,

na khonani dzau u dzule wo dzi vhea ḽiṱo.

₁₄Khonani vhukuma ndi tshiṱangu tsho khwaṱhaho,

wa i wana wo wana lupfumo.

₁₅Khonani vhukuma a i na mutengo,

a hu na lupfumo lune lwa i renga.

₁₆Khonani vhukuma ndi mushonga une wa u lalamisa,

i wanwa nga a no ofha Mudzimu.

₁₇Ane a ofha Mudzimu

u ḓo vha na khonani dzi fulufhedzeaho;

muthu u vha na khonani i no nga ene.

₁₈ṅwananga, kuvhatedza ndayo u bva hanani hau,

ndi hone

u tshi ḓo ḓi wana vhuṱali vhuṅwe

wa vhuya wa tshena mmvi.

₁₉Lima vhuṱali unga a limaho a tshi zwala mbeu,

u kone u lindela khaṋo yaho yavhuḓi.

U tshi vhu zwala u ḓo shisha mabiko tshifhinganyana,

hone hu si kale wa ḽa mitshelo yaho.

₂₀Khundavhalai vhu dzi fara nga tshiṱuhu tshingafhani!

Tsilu ḽi nga si dzule naho.

₂₁Vhu ḓo mu lemedza unga tombo ḽa u mu linga,

ha nga lengi u vhu posa kule.

₂₂Ndi uri vhuṱali vhu nga dzina ḽaho,

a vhu waniwi nga vhanzhi.

₂₃ṅwananga, thetshelesa u vhe na nzhele ndi tshi u laya,

u songo landula nyeletshedzo yanga.

₂₄Longa ṋayo dzau kha mbofho dzaho,

u ṋekedze mutsinga u vhewe dzhogo yaho.

₂₅Vhu hwale nga mahaḓa au,

u songo fhela mbilu nga mbofho dzaho.

₂₆ḓowelana naho nga mbilu yau yoṱhe,

u tshimbile nḓilani dzaho nga nungo dzau dzoṱhe.

₂₇Vhu londolose, vhu tumbule,

vhu ḓo ḓidzumbululela iwe.

Wa vhuya wa vhu fara, u songo vhu ponyokisa.

₂₈Ndi hone ngavhuya vhu tshi ḓo u awedza,

ha vha dakalo ḽau.

₂₉Mbofho dzaho u ḓo wana dzi tshiṱangu tshi sa phulei,

khotho dzaho dza vha vhulungu

ha mutengo muhulu.

₃₀U ḓo vhu ambara ha vha khare yau ya vhugala,

wa vhu fuka ha vha khanzu yau ya maṱeleṱele.

₃₁U ḓo vhu ambara sa tshiambaro tsha khuliso,

sa khare ya dakalo.

₃₂ṅwananga,

arali u tshi zwi tama u nga funzwa;

arali wa ḓidina, u ḓo ṱalifha.

₃₃Arali u tshi funa u thetshelesa, u ḓo guda,

arali wa vha na nzhele u ḓo vha na vhuṱali.

₃₄ḓowelana na vhahulwane,

arali hu na muṱali, dzula nae.

₃₅ḓilugisele u pfa hu tshi ambiwa mafhungo a no bva kha Mudzimu;

u songo litsha mirero ya vhuṱali i tshi u ponyoka.

₃₆Arali wa vhona muthu wa ṱhalukanyo, mu bubele,

ṋayo dzau

nga dzi ṱahadze tshiukhuvha tshawe!

₃₇Elekanya ndayo dza Muṋe washu,

dzula u tshi elekanya milayo yawe.

Ndi hone a tshi ḓo vhonetshela mihumbulo yau,

a u ṋea vhuṱali vhune wa vhu tama.